"Azərbaycan Respublikasının Prezidenti İlham Əliyev 15 oktyabr 2003-cü ildə prezident seçildikdən sonra Ulu Öndər Heydər Əliyevin əsasını qoyduğu inkişaf strategiyasını uğurla həyata keçirdi. Demək olar ki, bu 20 il ərzində ölkə başçısı seçicilərinə və xalqa verdiyi bütün vədləri yerinə yetirmiş oldu. İlk növbədə Azərbaycanın iqtisadiyyatı gücləndirildi. Azərbaycanın qonşu dövlətlərlə, eyni zamanda qlobal güclərlə münasibətləri yüksək səviyyəyə qaldırıldı. Nəticədə ölkəmiz həm enerji resurslarının dünya bazarına çıxarılmasını həyata keçirərək iqtisadiyyatını gücləndirə bildi, həm də Azərbaycan logistik mərkəzə çevrildi". Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, hazırda Rusiya-Ukrayna müharibəsi fonunda Qərbdən-Şərqə və əksinə gedən logistik yükdaşıma xidmətləri Orta Dəhlizə böyük maraq göstərir: "Azərbaycan Prezidenti tərəfindən yaradılmış bu şəbəkə bugünkü gündə ən aktual və diqqət mərkəzində olan bir layihədir. Bütün bunlarla yanaşı, ölkə rəhbəri İlham Əliyev alternativ enerji mənbələrinin tapılması və "Yaşıl enerji"nin Avropaya çatdırılması üçün bir çox layihələr həyata keçirə bildi.
Bu gün Azərbaycan Avropanın enerji təhlükəsizliyində mühüm mövqe tutur. Azərbaycan qazı artıq Avropaya çatdırılıb. Digər qonşu dövlətlərin, xüsusilə Orta Asiyadakı enerji resurslarının Azərbaycan vasitəsilə Avropaya çatdırılması barədə danışıqlar həyata keçirilir. Azərbaycan müstəqillik illərində qarşılaşdığı bütün problemlərin həllini məhz dövlət başçısı İlham Əliyevin rəhbərliyi dövründə həll edə bildi. Azərbaycan torpaqlarının 20%-i işğal edilmişdi və bu problemin həlli ilə bağlı beynəlxalq təşkilatların qərarları, qətnamələri olsa da, bu problem sülh yolu ilə öz həllini tapmırdı".
Deputat xatırladıb ki, ATƏT-in Minsk Qrupunun nümayəndələri də münaqişəni dəstəkləmir və Azərbaycanı problemin hərb yolu ilə həllindən çəkindirmək istəyirdilər: "Azərbaycan öz gücü, qüdrəti və Ali Baş Komandanın qətiyyəti hesabına bu problemi həll edə bildi. Rəşadətli ordumuz canları bahasına torpaqlarımızı işğaldan azad etdilər. 44 günlük Vətən müharibəsindən sonra Qarabağda, Şərqi Zəngəzurda quruculuq-abadlıq işləri həyata keçirilir. 2023-cü ilin sentyabrında isə suverenliyimiz tam olaraq bərpa olundu. Bu gün işğaldan azad olunmuş ərazilərdə quruculuq-abadlıq işləri həyata keçirilir. Keçmiş məcburi köçkünlər artıq öz dədə-baba yurdlarına qayıdırlar. Azərbaycan Prezidenti İlham Əliyev Ulu Öndərin vəsiyyətini və arzularını reallaşdıra bildi. Azərbaycanın mədəniyyət paytaxtı olan Şuşa yeni inkişaf dövrünü yaşamaqdadır. Bu gün Şuşa yalnız Azərbaycanın deyil, ümumilikdə türk dünyasının döyünən ürəyidir.
Azərbaycanın 44 günlük müharibədə əldə etdiyi qələbəsi türk dünyasının bir-birinə yaxınlaşmasına bir vasitə oldu. Bugünkü gündə Türkiyə-Azərbaycan münasibətləri ən yüksək səviyyədədir. Digər türk dövlətləri də bu iki qardaş ölkə arasında olan münasibətləri nümunə götürərək daha da güclənirlər. Bir sözlə, Azərbaycan regionda yeni reallıq yaradıb".
N.Həmzəyev sözlərinə davam edərək bildirib ki, Azərbaycan Prezidenti İlham Əliyevin qlobal məkanda özünü təsdiqləməsi və 2020-ci ildə qələbə qazanması Avropada sayılan-seçilən ölkə rəhbəri səviyyəsinə çatıb: "Ölkə başçımız öz adını tək Azərbaycan yox, ümumilikdə dünya tarixinə yazıb. Azərbaycan çox qəliz bir regionda yerləşməsinə baxmayaraq müharibəni uğurla bitirən və separatizmin kökünü kəsə bilən yeganə dövlətlərdən biridir.
Azərbaycan Qoşulmama Hərəkatına da rəhbərlik etdiyi dövrdə çox mühüm layihələr reallaşdıra bildi. Bu gün Azərbaycan rəhbər ölkə olaraq Hərəkatın tarixində yeni bir dövrü başlada bilib. Ümumilikdə 20 illik prezidentlik dövründə ölkə başçısı İlham Əliyevin xalqın etimadını və sevgisini qazanıb. Xüsusilə də Qarabağ probleminin həll edilməsi dünya azərbaycanlılarının cənab Prezident İlham Əliyevin ətrafında sıx birləşməsinə gətirib çıxarıb".