Azərbaycan Qarabağda konstitusion hüquqlarını tam bərpa etdikdən sonra cinayətkar rejimin keçmiş "rəhbər" şəxsləri ölkəmizin ərazisindən qaçmağa çalışırlar. Amma Azərbaycanın hər zaman bəyan etdiyi kimi, xalqımıza qarşı qətliamlar, soyqırımlar törətmiş, əli günahsız, dinc əhalinin qanına batmış hər bir erməni terrorçu cəzasını çəkəcək. Elə bu istiqamətdə işlər də davam edir.
Separatçı rejimin keçmiş "prezident"ləri Araik Arutyunyanın, Arkadi Qukasyanın və Bako Saakyanın, "Daşnaksütyun" partiyasının "Qarabağ təmsilçisi" və separatçı rejimin keçmiş parlament sədri David İşxanyanın, sabiq "dövlət naziri" Ruben Vardanyanın törətdikləri cinayət əməllərinə görə barələrində aparılan cinayət işləri üzrə DTX tərəfindən Bakıya gətirilmələri göstərir ki, proses davamlı olacaq.
Məsələ ilə bağlı Milli Məclisin deputatı Naqif Həmzəyev bildirdi ki, qalib ölkə kimi Azərbaycan 44 günlük Vətən müharibəsi bitdikdən sonra Ermənistana sülh əlini uzatsa da, bu günə qədər Ermənistan tərəfinin səmimi olduğu görünmür. Onlar mütəmadi olaraq təxribatlar törədir və danışıqlar masasında oturaraq Azərbaycanın şərtlərini qəbul edib, amma sülh sazişini imzalamaqdan yayınırdılar: "Beləliklə, Azərbaycanın səbir kasası daşdı və bir günlük antiterror tədbirləri nəticəsində separatçıların və qanunsuz erməni silahlı birləşmələrinin ərazilərimizdən çıxarılmasına nail olundu. Azərbaycanın dinc sakinlərlə heç zaman işi olmayıb, humanitar hüquq qaydalarına tam olaraq əməl edib. Amma əli azərbaycanlıların qanına batmış, hərbi cinayətlər, soyqırımlar törətmiş və Azərbaycana qarşı separatçı fəaliyyətə rəhbərlik etmiş şəxslərin qanun qarşısında cavab verməsi labüd idi. Bunu da Azərbaycan dövləti etdi və hazırda cinayətkarlar bir-bir saxlanılaraq Bakıya gətirilir və onlar qanun qarşısında cavab verəcəklər".
N.Həmzəyev dedi ki, ilk növbədə istintaq aparılacaq, onların bildikləri məlumatlar öyrəniləcək. Onlar separatçı rejimə rəhbərlik etmiş şəxslərdir və hər biri qanlı cinayətlərdə ön sıralarda olublar. Bu baxımdan onların istintaqa cəlb edilməsi nəticəsində iştirak etdikləri cinayət əməlləri ilə bağlı yeni məqamlar ortaya çıxacaq. Bütün bunlar detallı şəkildə araşdırılacaq və istintaq nəticəsində digər cinayərkarlar da müəyyən olunarsa, onların da tapılaraq Azərbaycana gətirilməsi istiqamətində işlər görüləcək.
Bir çox cinayətkarın Qarabağdan qaçaraq Ermənistana sığındığını vurğulayan deputatın sözlərinə görə, onlar beynəlxalq axtarışa verilib və İnterpol vasitəsilə axtarışları davam edir. "Nə olursa-olsun Azərbaycan həmin cinayətkarların tapılıb qanun qarşısında cavab verməsinə nail olacaq. Düşünürəm ki, hazırda həmin şəxslərin Ermənistana verilməsi real deyil. Saxlanılanların hər biri bu proseslərdə yaxından iştirak edərək hərbi cinayətlər törədən şəxslərdir. Azərbaycan buna heç vaxt razılıq verməz. Bu günə qədər 4 minə yaxın azərbaycanlının taleyi bəlli deyil. Onların harada öldürüldüyü və yaxud başlarına hansı bəlalar gətirildiyini bilmək istəyirik. Eyni zamanda basdırılmış minaların xəritəsi bizim üçün önəmlidir".
Deputat hesab edir ki, yalnız istintaq başa çatdıqdan sonra bu məsələlərlə bağlı Azərbaycan dövləti lazımi və doğru qərarı verəcək. Ən əsası odur ki, Azərbaycanın qanunlarına və beynəlxalq hüquqa söykənərək istintaq və həbslər həyata keçirilib.