"Ermənistanda gərginliyin artması və mütəmadi olaraq etiraz aksiyalarının keçirilməsi normal haldır. Çünki revanşist qüvvələr bu hadisələrdən istifadə edərək öz mövqelərini gücləndirmək və Paşinyanı devirmək istəyirlər. Hətta ötən gün bir çevrilişə cəhd oldu və Ermənistan Xüsusi Xidmət Orqanları tərəfindən həmin şəxslər həbs edildi. Bu cür hallar hələ davam edəcəkdir. Amma istənilən halda Paşinyanın devrilməsi nə Rusiyaya, nə də Qərb dairələrinə xeyir vermir. Üstəlik hər hansı bir hakimiyyət dəyişikliyi Ermənistanı daha da zəiflədəcək". Bu sözləri açıqlamasında Milli Məclisin deputatı Naqif Həmzəyev deyib.
Onun sözlərinə görə, bu baxımdan Paşinyan çətin də olsa, bu prosesləri arxada qoyacaq: "Eyni zamanda, Azərbaycan üçün də Paşinyanın hakimiyyətdə qalması daha əlverişli variantdır. Çünki uzun müddətdir ki, Paşinyanla təmaslar olub, sülh danışıqları ətrafında müəyyən razılıqlar əldə olunub. Paşinyan hökuməti ilə bu prosesləri davam etdirmək daha rahatdır. Eyni zamanda, Qərb dairələrinin də Paşinyanı sonuna qədər müdafiə edəcəklərini düşünürük. Bu baxımdan etiraz aksiyaları davam edəcəkdir".
Deputat sözlərinə davam edərək bildirib ki, xüsusilə də Xankəndi və onun ətrafından Ermənistana gedən ailələrin sosial təminat məsələləri yaxşı formada təmin edilməyəcəyi təqdirdə etiraz aksiyaları daha uzunmüddətli olacaq: "Ona görə Paşinyan hökumətini çox çətin bir sınaq gözləyir. Əgər onlar bu sınağın da öhdəsindən gəlsələr, daha sonra Azərbaycanla sülh masasına qayıdıb tez bir zamanda bu prosesləri yekunlaşdırmağa nail ola bilərlər. Düşünürəm ki, ümumilikdə bu proseslər Azərbaycanın güclənməsinə xidmət edir. Ermənistan tərəfi isə hələ uzun müddət etirazlar və narazılıqlar fonunda öz həyatını davam etdirmək məcburiyyətində qalacaqdır".