on şans...
İnanırıq ki, erməni əsilli əhali Azərbaycanın humanist mövqeyindən düzgün istifadə edəcək
Qarabağın erməni sakinlərinə reinteqrasiya üzrə planlar təqdim edilib. Bu barədə Azərbaycan Respublikası Prezidentinin Administrasiyasının açıqlamasında bildirilib. Vurğulanıb ki, konstruktiv və müsbət mühitdə keçən görüşdə Azərbaycan Respublikasının Konstitusiyası və qanunları əsasında Qarabağın erməni əhalisinin reinteqrasiyası, infrastrukturunun bərpası və fəaliyyətinin təşkil olunması məsələləri üzrə müzakirələr aparılıb. Həmçinin, Bakıdan 20 tonluq ilk humanitar yardım artıq Ağdam yolu ilə Xankəndinə yola salınıb. Məlumat üçün deyək ki, sentyabrın 21-də Yevlax şəhərində Qarabağın erməni sakinləri ilə təmaslar üzrə müəyyən edilmiş məsul şəxs Ramin Məmmədov Qarabağın erməni sakinlərinin təmsilçiləri qismində Sergey Martirosyan və David Melkumyan ilə bir araya gəlib. Rusiya-Türkiyə Birgə Monitorinq Mərkəzinin Rusiya tərəfinin rəhbəri kontr-admiral Oleq Semyonov iştirakçı qismində dialoqa qatılıb. Xatırladaq ki, bundan öncə, 29 avqust tarixində Azərbaycan Qızıl Aypara Cəmiyyəti tərəfindən Xankəndidə yaşayan erməni əhaliyə 40 ton yük göndərilsə də separatçılar yükün Xankəndiyə keçidinə imkan verməyib. Rusiya Qızıl Xaç Komitəsinin göndərdiyi yük isə bir neçə gün Azərbaycan ərazisində gözlədikdən sonra sentyabrın 12-də Xankəndiyə keçib. Bu gün isə ermənilər özləri Azərbaycandan yardım istəyir. Azərbaycanın lokal antiterror tədbirlərindən sonra bütün bu maneələr aradan qaldırılıb. Separatçılar tərksilah edildikdən sonra nəinki humanitar təşkilatların, hətta Azərbaycan şirkətlərinin yük avtomobilləri ermənilərin öz istəyi ilə mülki əhaliyə humanitar yardım aparır.
Erməni əsilli britaniyalı jurnalist Onnik Krikoryan “X” sosial şəbəkəsində yazıb ki, erməni əhalinin Azərbaycan cəmiyyətinə reinteqrasiyası mümkündür və buna dəstək vermək lazımdır: “Daha əvvəl imtina etmələrinə baxmayaraq, ötən gün Qarabağ ermənilərinin nümayəndələri Yevlaxda Azərbaycan mərkəzi hakimiyyətinin təmsilçiləri ilə görüşüblər. Bunun Ermənistanla heç bir əlaqəsi yoxdur və onlara uğurlar arzulayıram”. Onun sözlərinə görə, kənar müdaxiləyə son qoymaq məqsədilə addımlar atmağın vaxtı çatıb.
Millət vəkili Naqif Həmzəyev açıqlamasında bildirib ki, hazırda tarixi və şərəfli günlər yaşayırıq. Deputat deyib ki, nəhayət ki, suverenliyimiz tam bərpa olunmaqdadır: "44 günlük müharibədən sonra demək olar ki, proseslərin böyük hissəsi həllini tapmışdı. Erməni əsilli əhalinin Azərbaycan cəmiyyətinə reinteqrasiyası və həmin ərazilərdəki separatçı-xunta rejiminin tamamilə məhv olunması isə zaman məsələsi idi: "Ermənilər üçün kifayət qədər zaman ayırdıq, şanslar verdik. Yəni humanist mövqedən çıxış etdik. Ancaq təəssüflər olsun ki, Ermənistan və separatçılar bu münasibəti düzgün dəyərləndirə bilmədi. Ən pisi isə ondan ibarətdir ki, Ermənistan bu müddət ərzində qanunsuz yollarla həmin ərazilərdə silah-sursatın sayını artırdılar, müdafiə səddləri qurdular, təxribatlarını artırdılar. Bu da Azərbaycanın səbr kasasının daşması ilə nəticələndi. Sonuncu mina terroru proseslərin kuliminasiya nöqtəsi oldu. Azərbaycan Silahlı Qüvvələrinin bir sutka ərzində keçirtdiyi antiterror tədbirləri nəticəsində düşməni təslim olmağa, ağ bayraq qaldırmağa məcbur etdi.
Şərtlərimizdən biri olaraq Yevlax şəhərində erməni sakinlərin nümayəndələri ilə Azərbaycan hökumətinin təmsilçiləri arasında müzakirə baş tutdu. Bu dialoq çox konstruktiv və qarşılıqlı müzakirə əsasında təşkil olundu. Erməniləri təmsil edən nümayəndələrə reinteqrasiya proqramı təqdim edildi. Onların istəkləri əsasında bölgəyə yardım göndərildi. Bu da Azərbaycanın humanist siyasətinin real sübutudur. Rəsmi Bakı verdiyi sözlərin hamısını birmənalı yerinə yetirir. Sözümüz imzamız qədər dəyərlidir. İnanıram ki, erməni əsilli əhali Azərbaycanın səmimi, humanist mövqeyindən düzgün istifadə edəcəklər və onlar da nəhayət səmimi olacaqlar. Reinteqrasiyanı sürətləndirəcəklər. Həmçinin, həmin bölgələrdə yaşamış Azərbaycan vətəndaşlarının öz yurdlarına geri dönməsi ilə birgəyaşayışın mümkünlüyünün şahidi olacağıq. Əgər bundan sonra hansısa təxribatlar baş verəcəksə, qarşısı dərhal alınacaq və çox sərt cavabı veriləcək".