Dünən Birləşmiş Millətlər Təşkilatının (BMT) Təhlükəsizlik Şurasında Qarabağla bağlı iclas keçirilib.
Ermənistan hər zaman olduğu kimi, yenə də ölkəmizə qarşı əsassız iddialarla çıxış edib. Amma Azərbaycanın xarici işlər naziri Ceyhun Bayramov reallıqları dünya ictimaiyyətinin diqqətinə faktlarla çatdırıb.
O vurğulayıb ki, Azərbaycan Silahlı Qüvvələri yalnız qeyri-qanuni hərbi obyektlərin zərərsizləşdirilməsi üçün yüksək dəqiqliyə malik döyüş sursatlarından istifadə etməklə özünü nümunəvi peşəkarlıqla aparıb. Nazir qeyd edib ki, Azərbaycan Silahlı Qüvvələri mülki şəxslərə dəyə biləcək yan təsirlərdən yayınmaq üçün yaxınlıqda olan legitim hərbi obyektlərə zərbələr endirməkdən qəsdən çəkinib:
“Fotolardan göründüyü kimi, əgər məqsəd dinc sakinləri hədəf almaq və ya guya “etnik təmizləmə” aparmaq olsaydı, Azərbaycan Silahlı Qüvvələri başqa cür hərəkət edərdi”.
Ceyhun Bayramov onu da əlavə edib ki, antiterror tədbirləri Ermənistanın üçtərəfli Bəyanata əsasən, Azərbaycan əleyhinə bütün hərbi fəaliyyətlərin dayandırılması və Azərbaycanın beynəlxalq səviyyədə tanınmış ərazilərindən qüvvələrini çıxarmaq barədə götürdüyü öhdəliklərin əksinə olaraq saxladığı silahlı hərbiləşmənin miqyasını nümayiş etdirib.
Beləliklə, rəsmi İrəvan növbəti dəfə beynəlxalq platformalarda Azərbaycana məğlub oldu. Daha doğrusu, haqq-ədalət növbəti dəfə öz yerini tapdı. Ermənilər bütün yalanlarına, iftiralarına, böhtanlarına və əssassız ittihamlarına rəğmən yenə də öz məkrli məqsədlərinə nail ola bilmədilər. Çünki Azərbaycan bütün dünya tərəfindən tanınan öz suveren ərazisində terrorçulara qarşı lokal antiterror əməliyyatı keçirib. Bu isə beynəlxalq hüququn norma və prinsiplərinə tamamilə uyğundur.
Ona görə də rəsmi Bakının haqlı mövqeyi dünya birliyi tərəfindən də təsdiqləndi. Azərbaycan Ermənistanı döyüş meydanında məğlub etdiyi kimi, dipomatik cəhətdən də məğlub edir. Bununla da Azərbaycan növbəti diplomatik zəfərə imza adıb.
Milli Məclisin deputatı Naqif Həmzəyev açıqlamasında bildirib ki, 44 günlük Vətən müharibəsinin gedişində və ondan sonra Ermənistanla Fransanın təşəbbüsü ilə dəfələrlə Azərbaycan əleyhinə BMT Təhlükəsizlik Şurasında iclas keçirilib:
“Bütün iclaslarda ermənilər və onların havadarları Azərbaycanın əleyhinə sənədlərin qəbuluna cəhd etdilər. Lakin onların bütün niyyətləri ürəklərində qaldı və planları iflasa uğradı. Çünki ilk növbədə Azərbaycan haqq savaşı həyata keçirib və öz ərazilərini işğaldan azad edib.
Bu gün də Azərbaycan öz ərazilərində lokal antiterror tədbirləri həyata keçirdi. Ən əsası odur ki, Ermənistan rəsmi olaraq Azərbaycanın ərazi bütövlüyünü tanıyıb və Qarabağın ölkəmizin daxili məsələsini olduğunu qəbul edib. Bundan öncə də Laçın yolu üzərində “humanitar böhran”la bağlı “şou” əsasında keçirilən BMT Təhlükəsizlik Şurasındakı iclasda da Ermənistan və Fransa öz istəyinə çatmadı. Onlar bu iclasdan da əliboş qayıtmaq məcburiyyətində qaldılar.
Antiterror tədbirlərinin 1 gün ərzində uğurla icra edilməsi və separatçıların Azərbaycanın şərtlərini qəbul edərək təslim olması bu iclasda bizim əleyhimizə hansısa sənədin qəbulu ehtimalını azaltdı. Buna baxmayaraq, rəsmi Bakı çox ciddi hazırlıq gördü”.
Millət vəkili vurğulayıb ki, dünən xarici işlər naziri Ceyhun Bayramov da çıxışında faktlarla bir daha sübut etdi ki, Azərbaycan öz suveren hüquqlarını bərpa edib və öz ərazisində separatizmin kökünü kəsib:
“Qarabağda Ermənistan tərəfindən ciddi hərbi manelər formalaşdırılmışdı və separatçılar mina terroruna da davam edirdilər. Bunun nəticəsində də vətəndaşlarımız şəhid olmuşdu. Ümumiyyətlə, 3 il ərzində 300-dən çox Azərbaycan vətəndaşı mina terrorunun qurbanı olub.
Çox təəssüflər olsun ki, bu proses qanunsuz erməni silahlı birləşmələri tərəfindən davam etdirilirdi. Biz dəfələrlə sülh və danışıqlar yolu ilə bu problemin həllinə çalışdıq, amma onlar bunu anlamadılar. Bu baxımdan da, BMT Təhlükəsizlik Şurasında Azərbaycan əleyhinə sənədin qəbulu ehtimalı çox az idi”.
Naqif Həmzəyev diqqətə çatdırıb ki, Azərbaycan tərəfi bütün humanitar qaydalara, beynəlxalq hüquq və konvensiyalara əməl edərək addımlar atdı:
“Düşünürəm ki, BMT Təhlükəsizlik Şurasında keçirilən iclasda Ceyhun Bayramovun Azərbaycanın mövqeyini yüksək peşəkarlıqla təqdim etməsi alqışlanmalıdır. Bu, Azərbaycan diplomatiyasının növbəti uğuru kimi dəyərləndirilməlidir. Ümumilikdə Azərbaycan Prezidenti cənab İlham Əliyevin həyata keçirdiyi daxili və xarici siyasət hər gün öz bəhrəsini verir. Biz hər dəfə uğurlarla bu prosesi yekunlaşdıra bilirik. İnanıram ki, reinteqrasiya prosesi də uğurla reallaşacaq və biz tezliklə erməni əsilli əhali ilə yaşayışı tam olaraq təmin edəcəyik”.