Çox təəssüflər olsun ki, hələ də regionumuzdakı reallıqları dərk etməyən və yaxud qəbul etmək istəməyən qüvvələr var. Xüsusilə də erməni lobbisinin təsiri altında Ermənistana dəstəklərini davam etdirən siyasi qüvvələr də var. Onlar faktiki olaraq Azərbaycanın haqq savaşını görməzdən gəlirlər. Azərbaycanın suverenliyinin bərpa edilməsini qəbul edə bilmirlər. Azərbaycanın qələbəsi nəticəsində münaqişənin bitməsi nəticəsində təzyiq alətlərinin əllərindən çıxmasını heç cür qəbul edə bilmirlər. Bu baxımdan düşünürəm ki, Cozep Borrelin bəyanatı əslində problemin həllinə və yaxud hansısa narazılıqların aradan qaldırılmasına hədəflənlənməyib. Onlar ədalətli mövqe tutmurlar və açıq-aşkar Ermənistana öz dəstəklərini göstərirlər. Onların bu məsələdə əsas hədəf və məqsədləri Ermənistanı, xüsusilə də Paşinyan hökumətinin daha gücləndirmək və Rusiyanın Ermənistana təsirini azaltmaqdır. Eyni zamanda, onlar görürlər ki, Azərbaycan öz gücü hesabına suverenliyini bərpa edib. Onların planlarının əksinə olaraq hətta erməni əsilli əhali ilə də artıq dialoq baş tutub və onlar Azərbaycanın şərtlərini qəbul ediblər. Bu, demək olar ki, ermənipərəst qüvvələrin, xüsusilə Cozep Borrel kimi siyasətçilərin planı alt-üst olub.
Bu fikirləri açıqlamasında Milli Məclisin deputatı Naqif Həmzəyev bildirib.
Onun sözlərinə görə, erməni lobbisinin olduğu hər yerdə yerdə, o cümlədən Avropa İttifaqında böyük rüşvətxorluq faktları aşkarlanıb. Əminliklə deyə bilərəm ki, bu cür siyasətçilər onlar üçün əsas alət olan bəhanələrin azalması hesabına öz gəlirlərindən kənarda qalırlar. Ona görə ölkəmizə qarşı qərəzli mövqe sərgiləyirlər. 30 il ərzində doğma torpaqlarından didərgin düşmüş Azərbaycan vətəndaşlarının taleyi heç vaxt onları maraqlandırmayıb. Əsassız iftiralar səsləndirən Borrel kimilər səlibçi psixologiyasından əl çəkə bilmirlər.
Naqif Həmzəyev bildirib ki, onların nə deməsindən, hanıs iftiranı atmasından asılı olmayaraq Azərbaycan haqlı, ədalətli tərəfdir və öz addımlarını beynəlxalq hüquq və konvensiyalara uyğun atır. Humanitar qaydalara tam əməl etmişik. Bu baxımdan da düşünürəm ki, Avropa İttifaqının xarici əlaqələr və təhlükəsizlik siyasəti üzrə nümayəndəsinin bu cür qərəzli mövqe sərgiləməsinə ehtiyac yoxdur. Bu mövqeləri ilə onlara olan inamı, etibarı heçə endiriblər.
Deputat qeyd edib ki, azərbaycanlılara qarşı törədilən hərbi cinayətlər, mina terrorları təəssüflər olsun ki, məhz Avropa İttifaqı və onu kimi bir çox beynəlxalq təşkilatların gündəliyində belə yoxdur. Onları yalnız birtərəfli olaraq xristian təəşübkeşliyi və öz maraqlarını bu regionda qoruya bilmək üçün Ermənistanı dəstəkləyirlər. Amma zamanla Ermənistan da anlayacaq ki, bu qüvvələr əslində onları çox çətin və pis vəziyyətə salıblar. Ermənistanın tək və yeganə çıxış yolu Azərbaycanla münasibətləri yaxşılaşdırmaq, sülh anlaşmasını imzalamaq, Türkiyə ilə də qonşuluq siyasəti, səmimi münasibətlər qurmaqdır. Qərəzli bəyanatlar, iftiralar Azərbaycanın iradəsinə təsir edə bilməz. Proseslərə real yanaşmaq, real münasibətlər qurmaq və ikili standartlardan əl çəkmər lazımdır. Bu baxımdan da Cozep Borrelin bəyanatının heç bir əsası yoxdur. Onlar bu günə qədər verdiyi heç bir sözü tutmayıblar. Çox təssüüflər olsun ki, hələ də ikili standartlar mövqeyindən çıxış edirlər. Düşünürəm ki, Azərbaycan öz üzərinə düşən işi layiqincə yerinə yetirir və tezliklə biz regionumuzda uzunmüddətli və dayanıqlı sülhə nail ola biləcəyik.