“Biz hazırda çox tarixi və şərəfli günlər yaşayırıq. 44 günlük Vətən Müharibəsindən sonra Azərbaycan humanist addım ataraq, Ermənistana sülh əlini uzatdı. Lakin təəssüflər olsun ki, Ermənistan Siyasi Hərbi Rəhbərliyi və ərazimizdə mövcudluğunu davam etdirməyə çalışan separatçı rejim bu humanist addımı dəyərləndirməyi bacarmadı. Gec-tez bu prosesləri durdurmaq lazım idi”.
Bu sözləri Millət vəkili Naqif Həmzəyev deyib. Onun sözlərinə görə, Azərbaycanın hər bir bölgəsində suverenliyimizi bərpa etmək, bizim ən başlıca məqsədimiz olub: “Son 3 ildə Azərbaycan işğaldan azad edilmiş torpaqlarımızda, Şərqi Zəngəzurda yüksək səviyyəli abadlıq işləri həyata keçirdi, orduya nəzarəti olduqca gücləndirdi. Türkiyə ordu modelinə bənzər komanda tipli hərbi hissələr yaratdı. Bu tədbirlərin əsas məqsədi bizə qarşı törədilən təxribatların qarşısını alaraq, düşmən tərəfin layiqli şəkildə cavabını verməkdan ibarət idi. Bu tarixi gün- 19 sentyabr gününə nəsib oldu. Ermənistan tərəfi, separatçılar ətraf ərazilərə minalar yerləşdirməyə başladı. Təəssüflər olsun ki, nəticə olaraq, 2 mülki şəxs həyatını itirdi, 6 şəhid verdik. Suverenliyimiz uğrunda canlarını qurban verən şəhidlərimizin, qazilərimizin qisası yerdə qalmadı. Azərbaycan dövləti, Ali Baş Komandan İlham Əliyevin rəhbərliyi altında lokal antiterror əməliyyatı həyata keçirdi. 24 saat ərzində rus sülhməramlıları kontingentinin fəaliyyət göstərdiyi ərazilərdə seperatçıların və qanunsuz erməni hərbi birləşmələrinin 90-dan çox postunu, hərbi obyektlərini, silah-sursatlarını, hərbçiləri, terrorçuları məhv etməyə nail olduq. Bu, çox böyük, qürurverici uğurdur. Qısa müddətdə bu cür ağır şəraitli ərazilərdə qələbə çalmaq, sadəcə peşəkar orduların həyata keçirəcəyi bir işdir. Azərbaycan ordusu bunu bacardı. Xalq olaraq biz bu günə çox sevinirik. Şükürlər olsun ki, separatçıların fəaliyyətinə tam şəkildə son qoyuldu. Yevlax şəhərində görüş baş tutdu, qarşı tərəfə reinteqrasiya ilə əlaqədar proqram təqdim edildi. 2 il müddətində Ermənistan tərəfinin Azərbaycan cəmiyyətinə reinteqrasiyası həyata keçiriləcək. Qarabağ və Şərqi Zəngəzurun hər bir ərazisində aparılan yenidənqurma, abadlıq işləri bundan sonra bizim üçün çox əziz olan Xankəndi, Xocalı, Əsgəran, Ağdərə və bütün kəndlərdə də davam etdiriləcək. Düşünürəm ki, sözügedən ərazilərdə yaşayan erməni əhalisi də bu abadlıq işlərindən faydalanacaq. 2 il ərzində Azərbaycan vətəndaşları məhz bu ərazilərə qayıdacaq, dövlətimiz xalqın rahat, birgə yaşayını təmin edəcək".
Millət vəkili vurğulayır ki, bu uğurları əldə etsək də, təhlükə tam şəkildə bitməyib: "Əksinə, ən gərgin dövrə qədəm qoyduq. Növbəti 2 il müddətində çalışmalıyıq ki, daha az itki ilə reinteqrasiya prosesin həyata keçirək. Bu ərazilərdə Azərbaycan hökumətinin bütün strukturları öz fəaliyyətlərini təşkil etməlidir. Əhalinin Azərbaycan qanunları çərçivəsində fəaliyyət göstərə bilməsi üçün hüquqi qanunlar həyata keçirilməlidir. Azərbaycan hərbçilərinə, xalqımıza qarşı döyüşmüş, vuruşmuş, cinayətlər törətmiş şəxslər qanun qarşısına çıxmalı, bütün quldurlar Azərbaycana təhvil verilməli, eyni zamanda Ermənistanla sülh sazişi imzalanmalı və qarşı tərəfin öhdəliklərinin yerinə yetirilməsi həyata keçirilməlidir".
Naqif Həmzəyev hesab edir ki, gələcək günlərdə ən başlıca məqsədlərimiz Naxçıvan və Azərbaycan arasında quru əlaqələrin yaradılması, Ermənistanla kommunikasıya əlaqələrinin bərpası, didərgin düşmüş Qərbi Azərbaycan vətəndaşlarının da öz dədə-baba yurdlarına qayıtması, mümkün olduqda, Ermənistanın vətəndaşlığını qəbul etməsidir: "
Düşünürəm ki, bu həssas müddətdə belə, xalqımız, ordumuz, vətəndaşlarımız Ali Baş Komandanımızın ətrafında sıx birləşərək, birlik olub, bütün çətinliklərin öhdəsindən gələcək. Şanlı Qələbədən sonra Azərbaycanın, xalqımızın rifahı yaxşılaşacaq, iqtisadiyyatımız daha da güclənəcək, dövlətimiz gücünə güc qataraq, vətəndaşlarının daha yaxşı, firəvan yaşaması üçün əlindən gələni edəcək, köçkünlər öz dədə-baba yurdlarına qayıdacaq, əhali daha xoşbəxt həyata qədəm qoyacaq. Qarabağ və Şərqi Zəngəzurun güclənməsi, Azərbaycanın iqtisadiyyatını olduqca gücləndirəcək. Amma bu uğurla əsla rahatlıq hissi keçirməməliyik. Əksinə, daha da irəli getməli, birlik olmalı, bu qələbəni bizlərə yaşadan şəhidlərimizi daim yad etməliyik”.