“Ermənistan təxribat törətməkdə davam edir. Mütəmadi olaraq atəşkəsi pozaraq sanki sülh istəmədiklərini və yaxud da bu şərtlərlə sülhü qəbul etmədiklərini göstərməyə çalışırlar”.
Bu fikirləri açıqlamasında Milli Məclisin deputatı Naqif Həmzəyev bildirib.
Onun sözlərinə görə, ermənilərin sülh danışıqlarına hazır olmadığı hər kəsə məlum idi:
“Rəsmi İrəvan həqiqətə uyğun olmayan xəbərlər yayaraq özlərini sülh istəyən tərəf kimi göstərir. Əslində isə prosesləri öz xeyrinə dəyişmək üçün fürsət gözləyən mövqedən çıxış edir. Artıq onların qeyri-səmimi mövqeləri ekspertlər tərəfindən də qeyd edilir. Ermənistanın ordusuna daxil etdiyi yeni silah-sursat və hərbi texnikalardan sonra daha da aktivləşməsi onu deməyə əsas verir ki, havadarları rəsmi İrəvanı yeni müharibəyə hazırlayır. Xüsusilə də Paşinyan hökumətinin verdiyi sonuncu açıqlamalardan da məlum olur ki, Ermənistan bu günə qədər çox yanlış mövqedən çıxış edib. İndi də siyasi hakimiyyətlərini, daxili auditoriyada nüfuzunu itirməmək üçün sülh sazişinin imzalanmasını ləngidirlər. Separatçı “liderlərin” vəzifələrindəki dəyişikliklər də buna hesablanıb. Separatçıların Sarkisyan, Köçəryan komandasına bağlı olduğunu nəzərə alsaq görərik ki, Paşinyan ilə onların mövqeyi üst-üstə düşmür”.
Deputatın fikrincə, Ermənistan Azərbaycanın ərazi bütövlüyünü tanıdığını bəyan etsə də realda bunu qəbul etmək istəmir: “Ermənistanda faktiki olaraq Azərbaycana qarşı nifrət hissi var. Təəssüflər olsun ki, ölkəmizin Xankəndiyə göndərdiyi humanitar yardımın qəbul edilməməsi, əksinə ölkəmizə qarşı nifrət videolarının yayılması sülhdən uzaq olduqlarını bir daha bəyan etmiş oldu. Atəşkəsi pozmaqla Avropa İttifaqının müşahidə missiyasının Ermənistanda hələ uzun müddət də qalmasını hədəfləyirlər”.
Naqif Həmzəyev yaxın vaxtlarda Rusiya və Ermənistan arasında münasibətlərin daha da soyuyacağını və gərginləşəcəyini düşünür: ” Paşinyanla Rusiya arasında münasibətlər soyuduqca rəsmi Moskva alternativ qüvvələrin güclənməsi üçün öz səylərini daha da artıracaq. Bu da nəticə etibarilə separatçıların Azərbaycan ərazilərini tərk etməsinə və girov saxladıqları erməniəsilli əhalinin cəmiyyətimizə reinteqrasiyasına maneə yaradacaq. Rəsmi Bakı İrəvanı sülhə məcburetmə siyasətini uğurla həyata keçirir. Beynəlxalq ictimaiyyət nə qədər erməni dezinformasiyasına aldansa da beynəlxalq hüquq qarşısında ölkəmizə heç nə edə bilmirlər”.
Deputat Ermənistanın atəşkəsi pozmasının onun əleyhinə işlədiyini vurğulayıb: ” Günü-gündən zəifləyən Ermənistan daha çox havadarlarından asılı vəziyyətə düşür. Rəsmi İrəvan qısa müddət içərisində Bakı ilə sülh müqaviləsini imzalamalı, Türkiyə və Azərbaycanla münasibətləri normallaşdırmalı, regionda ölkəmizin yaratdığı yeni reallıqlar fonunda yeni iqtisadi inkişaf modelini qurmalıdır. Lakin çox təəssüf ki, rəsmi İrəvanın havadarları onu bu yoldan çəkindirir. Ermənistan təxribatları artıracağı təqdirdə Azərbaycan Silahlı Qüvvələri bütün təhlükə mənbələrinin məhv edilməsinin öhdəsindən layiqincə gələcək”.