Ötən gün BMT Təhlükəsizlik Şurası Laçın-Xankəndi yolunun guya "bağlanmasından” sonra yaranmış "humanitar böhran”ın müzakirəsi üçün iclas keçirib. Müzakirələr erməni iddialarının ifşası və Azərbaycan diplomatiyasının parlaq qələbəsi ilə yekunlaşıb.
Mövzu ilə bağlı Milli Məclisin deputatı Naqif Həmzəyev açıqlama verib.
Deputat bildirib ki, BMT Təhlükəsizlik Şurasında Ermənistanın istəyi ilə müzakirələr təşkil edilib.
"Bu müzakirənin əsas mövzusu guya Azərbaycan ərazisində yaşayan erməni sakinlərin humanitar böhranla qarşılaşması idi. Bu müzakirələr zamanı biz bir daha dünyaya nümayiş etdirdik ki, Azərbaycan regionda uzunmüddətli və dayanıqlı sülh istəyir. Erməni sakinlərə qarşı heç bir humanitar böhran təhlükəsi yoxdur. Əksinə, Ermənistan və onun havadarları dezinformasiya yayaraq Azərbaycana təzyiqlər etmək və dolayısıyla Azərbaycan ərazisinə iddialarını başqa formada davam etdirmək istəyirlər. Bu baxımdan da Azərbaycan ötən gün BMT Təhlükəsizlik Şurasında keçirilən görüşdə növbəti dəfə uğur qazandı".
Deputat onu da qeyd edib ki, Cənab Prezident İlham Əliyevin rəhbərliyi altında post münaqişə dövründə, yəni üç ilə yaxın müddət ərzində mərhələli şəkildə Ermənistanı sülhə məcbur etmə siyasəti uğurla həyata keçirilir.
"Azərbaycan bütün kriteriyalar üzrə üstün olmasına baxmayaraq, regionda sülh istəyir və bunun üçün də bütün səylərini səfərbər edibdir. Ancaq təəssüflər olsun ki, Ermənistan sülh danışıqları zamanı və danışıqlardan sonra ümumiyyətlə, bütün bu prosesin gedişatı boyu təxribatlara meylli olduğunu dəfələrlə göstərib və hər dəfə də müxtəlif səpgidə təxribatlar törədibdir. Son 10 gün ərzində xarici media orqanlarında Azərbaycan əleyhinə dərc edilmiş yazılar, hesabatlar Ermənistan tərəfindən növbəti təxribatın tərkib hissəsi kimi dəyərləndirilməlidir. Onlar elə bir fon yaratmışdılar ki, sanki Azərbaycan bu məsələdə haqsızdır. Ümid edirdilər ki, bu yaranmış süni təzyiqlər hesabına BMT Təhlükəsizlik Şurasında da Azərbaycana qarşı hansısa bəyanat və ya sənəd qəbul etdirə biləcəklər. Ancaq bu belə olmadı. Ermənistan nümayəndə heyəti və onların havadarları BMT Təhlükəsizlik Şurasının iclasında növbəti dəfə iflasa uğradılar, əliboş qaldılar. Azərbaycan və onun dostları, haqq-ədalət tərəfdarı olan dövlətlərin nümayəndələri haqlı mövqeyimizi müdafiə etdilər".
N.Həmzəyev əlavə ediib ki, Azərbaycanın daxili işlərinə heç kimin qarışmağa haqqı yoxdur.
"Azərbaycan öz ərazilərində nəyi necə və hansı formada edəcəyini hamıdan yaxşı bilir. Bütün bunlarla yanaşı, Azərbaycan bu günə qədər beynəlxalq hüquqa, beynəlxalq konvensiyalara, beynəlxalq təşkilatların bütün sənədlərinə hörmətlə yanaşıb, məhz Xankəndində yaşayan erməni sakinlərə qarşı da ədalət prinsipindən çıxış etməkdədir. Azərbaycan Ermənistana alternativ yollar təklif edib. Düşünürəm ki, Laçın yolunu istifadə etməkdənsə, Xankəndi-Ağdam yolu daha təhlükəsizdir. Bu yoldan istifadə edilsə, həm də reinteqrasiyanı sürətləndirmiş olarıq".
Deputat vurğulayıb ki, sonuncu hadisələrdən sonra ermənilərin sülh yox, vaxt qazanmaq istədikləri hamıya məlum oldu.
"Ermənilər nəyin hesabına olursa olsun, Azərbaycandan qisas almaq istəyirlər. Onlar revanşist fikirlərlə yaşayırlar. Azərbaycan isə Ermənistan və onu dəstəkləyənlərin bizim qarşımıza çıxardığı bütün maneə və təxribatların qarşısını bu günə kimi məharətlə alıb. Bu gündən sonra da bütün maneələri və təxribatları dəf etmək iqtidarındadır. Cənab Prezident İlham Əliyevin rəhbərliyi altında bütün sahələr üzrə Azərbaycan inkişaf edir. Ermənistan BMT Təhlükəsizlik Şurasının iclasının toplantısından növbəti məğlubiyyətini aldı. Bu, Ermənistan üçün növbəti bir şans ola bilər. Onlar reallıqları dərk etməlidirlər. Ermənistan Azərbaycanın sülh təklifini dəyərləndirərək ən qısa zamanda sülh masasına qayıtmalıdır. Azərbaycanın irəli sürdüyü beş baza prinsip əsasında sülh anlaşması imzalanmalıdır. Azərbaycanla Naxçıvan arasında kommunikasiyalar bərpa edilməli, Azərbaycan ərazisindəki qanunsuz erməni silahlı dəstələri, qanunsuz və qondarma vəzifələr tutan separatçılar bu vəzifələrdən çəkilməli, Azərbaycan ədalətinə sığınmalı və cənab Prezidentin söylədiyi kimi onlara şamil edilmə ehtimalı ola bilən əfvdən yararlanmalıdırlar. Əks təqdirdə onların aqibətinin nə ilə nəticələnəcəyi hər kəsə bəllidir və biz əminliklə deyə bilərik ki, Azərbaycan öz istəklərinə çatacaq. Ermənistanın bütün təxribatları məharətlə dəf ediləcəkdir".