Azərbaycanın Qarabağ bölgəsinin erməni sakinlərinin nümayəndələri razılıqları son anda pozub.
Bunu Azərbaycan Xarici İşlər Nazirliyinin Mətbuat xidməti idarəsinin rəisi Ayxan Hacızadə Rusiyanın “Kommersant” qəzetində dərc edilmiş məqalədə əksini tapmış fikirlərə münasibət bildirərkən deyib. Onun sözlərinə görə, son günlər ərzində beynəlxalq tərəfdaşların səyləri nəticəsində Ağdam-Xankəndi yolundan BQXK tərəfindən yüklərin daşınması üçün istifadə olunması və bundan 24 saat sonra Laçın yolundan BQXK vasitəsilə keçidin daha da intensivləşməsinə dair razılıq mövcud idi: "Bununla yanaşı, Azərbaycan tərəfinin təklifi əsasında Yevlaxda Azərbaycan tərəfinin nümayəndələri ilə Qarabağda yaşayan erməni sakinlərin nümayəndələri arasında görüşün keçirilməsi razılaşdırılmış və bütün logistik məsələlər yekunlaşmışdı. Bütün bu razılıqlara baxmayaraq, Azərbaycanın Qarabağ bölgəsinin erməni sakinlərinin nümayəndələri razılıqları son anda pozub".
A.Hacızadə vurğulayıb ki, ermənilərin bu mövzunu siyasi manipulyasiya alətinə çevirməsi qarşı tərəfin sülh və sabitlikdə maraqlı olmadıqlarını bir daha nümayiş etdirib.
Millət vəkili Naqif Həmzəyev açıqlamasında deyib ki, Azərbaycan 44 günlük Vətən müharibəsindən sonra Ermənistana sülh əlini uzadıb və İrəvanla sülh anlaşmasının imzalanması üçün bütün mümkün vasitələrdən edib.
Deputatın sözlərinə görə, təəssüflər olsun ki, Ermənistan hər vəchlə sülh prosesini uzadır, yubadır, təxribatlar törədir: "Ermənistan çalışır ki, prosesləri öz xeyrinə dəyişsin. Heç kəsə sirr deyil ki, Azərbaycanda rus sülhməramlılarının nəzarətində olan ərazilərdə yaşayan ermənilər məhz separatçılar tərəfindən əsir saxlanılır. Erməni əhali ilə dialoqun yaranması və onların Azərbaycan cəmiyyətinə reinteqrasiyası ilə əlaqədar görülmüş işlərdən xəbərdarıq. Yevlaxda növbəti görüşün baş tutmasını gözləyirdik. Hətta rəsmi dairələrin verdiyi məlumata görə, ilkin razılıq olub və son anda görüşdən imtina edilib. Görünən odur ki, Ermənistanın havadarları yaxınlaşmanı istəmirlər. Heç bir vasitəçi olmadan Azərbaycan və erməni tərəfi arasında görüşlərin intensivləşməsinə qarşı çıxırlar. Çünki bu dialoqlar həmin havadarların Cənubi Qafqazla bağlı planlarının puça çıxmasına və Azərbaycanın daxili işlərinə qarışmaq vasitələrinin əldən buraxılmasına səbəb olar”. Deputat qeyd edib ki, bu baxımdan Azərbaycan prosesin nə dərəcədə çətin və ağır bir yolla getdiyini hər kəsə göstərir. Bu yolu seçməkdə hədəfimiz regionda uzunmüddətli və dayanıqlı sülhü əldə etməkdir. N.Həmzəyevin sözlərinə görə, ermənilərin və onların havadarlarının isə hədəfi təxribatlar törətməklə Azərbaycanı anti-terror əməliyyatına təhrik etmək və bunu əllərində bayraq edərək dünyaya car çəkməkdir: “Bununla göstərməyə çalışacaqlar ki, "azərbaycanlılarla birlikdə yaşaya bilmərik", "Qarabağda erməni əhalinin təhlükəsizliyini rəsmi Bakı təmin edə bilməz". Ancaq Azərbaycan tərəfi dəfələrlə Ermənistana və himayədarlarına bildirib ki, erməni əsilli vətəndaşlarımızın təhlükəsizliyini tam təmin etməyə, onlara digər etniklər kimi bərabər hüquqlar tanımağa hazırıq. Əfsuslar olsun ki, separatçılar Qarabağdakı ermənilərin reinteqrasiyasına, Bakı ilə dialoqa mane olurlar. Özlərinin qondarma "vəzifələri"ni davam etdirir və durmadan silanlanırlar".
Deputat əlavə edib ki, rus sülhməramlılarının da öz mandatından kənar fəaliyyət göstərməsinin də şahidi oluruq: "Bu məsələdə də çox müəmmalı məqamlar var. Həmçinin, Avropa İttifaqının müşahidə missiyasının Azərbaycan-Ermənistan şərti sərhədlərində tez-tez görünməsi, sərsəm açıqlamalar vermələri göstərir ki, hətta Rusiya-Ukrayna müharibəsində belə vahid nöqtəyə gələ bilməyən Qərb nə hikmətdirsə, Ermənistan məsələsində dərhal bir araya gəlirlər. Həmçinin, Qərb, Rusiya və İranın eyni mövqe sərgilədiyinin şahidi oluruq. Ona görə də bizim sülh çağırışlarına Ermənistan tərəfi təxribatlarla cavab verir. Şərti sərhədlərə silah-sursat, hərbi texnika cəmləyirlər. Bu da ermənilərin növbəti təxribatlara hazırlaşması deməkdir. İstənilən halda problemin birdəfəlik həllini Qarabağda yaşayan ermənilərin Azərbaycana reinteqrasiyasında görürük. Gec-tez bu proses baş tutmalıdır. Ümid edirik, Ermənistan tərəfi nəhayət, bunu dərk edəcək. Havadarlarının onlara zərbə vurduğunu anlayacaq və qanunsuz erməni silahlı dəstələrini bölgədən çıxaracaqlar".