Prezident İlham Əliyevin Xocalının işğaldan azad olunan kəndlərinə səfəri ötən günün ən diqqət çəkən məqamlarından oldu. Bu səfər regiona maraqlı olan xarici qüvvələrə konkret və açıq mesaj kimi dəyərləndirilir.
Xüsusilə hazırkı proseslər fonunda bu səfər həm də bir növ Rusiyaya cavab olaraq qəbul edilir.
Bəs indiki məqamda bu səfər necə qiymətləndiirlməlidir? Rusiyadan gələn təhdid fonunda Prezidentin Xocalıda görünməsi nə kimi ciddi mətləblərdən xəbər verir?
Mövzu ilə bağlı danışan Milli Məclisin deputatı Naqif Həmzəyev Qarabağdakı mövcud vəziyyət fonunda səfərin mahiyyətini dəyərləndirb:
“Azərbaycan Ermənistanı sülhə məcburetmə siyasətini uğurla həyata keçirir. Sonuncu Brüssel görüşündə anladıq ki, danışıqlar prosesində xeyli irəliləyiş əldə olunub. Ermənistanın mütəmadi olaraq təxribat törətməsi, prosesləri öz xeyrinə dəyişməyə çalışmasına baxmayaraq, Bakı beynəlxalq ictimaiyyətə sülhün alternativinin olmadığını sübut edə bilib. Azərbaycan öz daxili məsələsinə beynəlxalq birliyin qarışmasını istəmir. Laçın yolunda sərhəd-buraxılış məntəqəsinin qurulması, hazırda isə Qarabağın erməni əhalisinin reinteqrasiyasına start verilməsi buna nümunədir. Təəssüf ki, separatçılar hələ də öz havadarlarının çaldığı musiqiyə uyğun hərəkət edirlər. Onlar Azərbaycan ərazisində yaşayan erməni əsilli sakinləri əsir tuturlar. Özlərini sanki həmin sakinlərin hüquqlarını müdafiə edimiş kimi göstərirlər”.
Deputat bildirib ki, prezident İlham Əliyevin səfəri bəzi qüvvələrə açıq mesaj idi:
“Proseslərin bu formada cərəyan etdiyi bir məqamda Prezident İlham Əliyevin Xocalı rayonunun işğaldan azad olunmuş kəndlərinə səfəri hər kəsin diqqətini cəlb etdi. Düşünürəm ki, hazırda Prezidentin səfəri birbaşa beynəlxalq güclərə və Ermənistanın havadarlarına mesajdır. Bununla onlara bir daha başa salmaq istəyir ki, bizim daxili işlərimizə heç bir qarışmamalıdır. Nəyi nə zaman və necə edəcəyimizi hər kəsdən yaxşı bilirik. Ən qısa zamanda Xankəndi onun ətrafındakı ərazilərdə də Azərbaycan bayrağı dalğalanmalı, erməni əsilli əhali bizim qanunlarımıza uyğun yaşamalıdır.
Separatçılar əgər yaxın müddətdə silahı yerə qoyaraq ərazilərimizi tək etməsələr, hər an onlara qarşı antiterror əməliyyatı həyata keçirilə bilər. Hesab edirəm ki, Nikol Paşinyan və ümumilikdə Ermənistan hökuməti bu istiqamətdə ciddi addımlar atmalıdır.
“Görünən odur ki, işğaldan azad edilən ərazilərimiz yenidən qurulur, dirçəlir, keçmiş məcburi köçkünlərimiz öz dədə-baba yurdlarına qayıdırlar. Prezident İlham Əliyevin uğurlu siyasəti nəticəsində bütün məcburi köçkünlərimiz öz torpaqlarına qayıdacaqlar. Bu, Xankəndidə yaşamış soydaşlarımıza da aiddir”-deyə, o bildirib.