Təbriz, Üskü və Tufarqan şəhərlərinin İran parlamentindəki nümayəndəsi Ruhullah Mütəfəkkir Azad millət vəkillərimizi - Razi Nurullayev və Naqif Həmzəyevi həyasızcasına "terrorizmi" dəstəkləməkdə ittiham edib.
O, bu barədə özünün tvitter hesabında yazıb. Bildirib ki, iki deputatın Parisdə Xalq Mücahidləri Təşkilatının iclasında iştirakı "terrora" açıq dəstəkdir.
Onun sözlərinə görə, bu, "sionistlərlə münasibətlərin nəticəsidir".
İranlı deputat Azərbaycan Respublikasını aşağılamaq üçün "Bakı parlamenti" ifadəsindən istifadə edib. Mütəfəkkir Azad bundan əvvəl də müxtəlif məsələlərlə bağlı Azərbaycan Respublikasına qarşı çıxışlar edib. Xatırladaq ki, İran Xalq Mücahidlərinin iyulun 1-də Parisdə baş tutan toplantısında dünyanın bir sıra siyasətçiləri ilə yanaşı, Milli Məclisin üzvləri də iştirak edib. İran mediası, xüsusilə SEPAH-a yaxın mətbuat orqanları və “Səhər” televiziyası da azərbaycanlı millət vəkillərinin İran Milli Müqavimət Şurasının təşəbbüsü ilə Parisdə keçirilən "Azad İran - 2023" beynəlxalq konfransında iştiraklarını geniş müzakirəyə çıxarıblar.
Millət vəkili Naqif Həmzəyevin iranlı deputatın sərsəmləməsinə cavabı qısa olub: "Ruhullah Mütəfəkkiri kimilər Xocalı terrorunu törətmiş Ermənistana və ermənilərə verdikləri dəstəyi, 30 ilə yaxın Azərbaycan torpaqlarının işğal edilməsinə göz yumduqlarını xatırlasınlar. Azərbaycan səfirliyində törədilmiş terror hadisəsi, deputat Fazil Mustafaya sui-qəsd kimlərin həqiqi terrorist olduğunu ortaya qoyur. Onun kimilərinə əlavə sözə ehtiyac yoxdur. Sadəcə onu deyim ki, Ruhullah Mütəfəkkirilər İrandakı 40 milyon Azərbaycan türkünə öz dilində məktəb açmaq hüququnu tanımazsa, gec-tez haqq-ədalət öz yerini tapacaq...".