İyulun 5-də Bakı Konqres Mərkəzində Qoşulmama Hərəkatının Əlaqələndirmə Bürosunun “Qoşulmama Hərəkatı: meydana çıxan çağırışlarla mübarizədə birgə və qətiyyətli” mövzusunda nazirlər görüşü keçirilib. Bu nüfuzlu beynəlxalq tədbirdə çıxış edən Prezident İlham Əliyev görüşün səmərəli və nəticəyönümlü müzakirələrlə yadda qalacağına əminliyini ifadə edib.
Milli Məclisin deputatı Naqif Həmzəyev açıqlamasında Azərbaycanın sədrliyi dövründə Qoşulmama Hərəkatının fəaliyyətini yüksək dəyərləndirdi.
N.Həmzəyev bildirdi ki, məlum olduğu kimi, 2019-cu ildən etibarən Azərbaycan Qoşulmama Hərəkatının (QH) üzv ölkələrinin yekdil qərarı ilə üç il müddətinə Hərəkata sədrliyi həyata keçirməyə başladı: “Azərbaycanın sədrliyi dövründə gördüyü işlərə, irəli sürdüyü təşəbbüslərə və təsisatın fəaliyyətinin genişləndirilməsi, beynəlxalq aləmdə nüfuzunun artması istiqamətində atdığı addımlara görə ölkəmizə etimadın göstəricisi kimi quruma sədrliyimiz daha bir il uzadıldı. Qoşulmama Hərəkatı dünyada BMT Baş Assambleyasından sonra ən böyük beynəlxalq təsisatdır. Azərbaycan Prezidenti İlham Əliyevin sayəsində ölkəmiz bu təsisata uğurla rəhbərlik etməklə onun beynəlxalq aləmdə nüfuzunu və rolunu gücləndirib, böyük uğura imza atıb.”
N.Həmzəyev qeyd etdi ki, Azərbaycan Qoşulmama Hərəkatına sədrlik etdiyi dönəmdə bu təsisat özünün çox uğurlu bir dövrünü yaşayıb: “İlk növbədə bu hərəkata üzv olan dövlətlər arasında koordinasiya yüksək səviyyəyə çatdırılıb. Pandemiya dövründə Prezident İlham Əliyevin təşəbbüsü ilə Qoşulmama Hərəkatı bir çox təşəbbüslərlə çıxış etdi. İlk növbədə, cənab İlham Əliyevin təşəbbüsü ilə ədalətli vaksin bölüşdürülməsi ilə bağlı BMT tərəfindən növbədənkənar xüsusi iclas keçirildi. Burada digər dövlətlərə vaksinlərin çatdırılması məsələsi müzakirə olundu. Bununla yanaşı, Azərbaycan tərəfindən Qoşulmama Hərəkatına üzv olan və ehtiyacı olan 80-dən çox dövlətə humanitar yardım göstərildi. Ölkəmizin sədrliyi dövründə çox önəmli məsələlərdən biri yalnız Azərbaycanın mövqeyi və maraqları deyil, bu təşkilata üzv olan bütün dövlətlərin maraqlarının qorunması üçün vacib addımlar atıldı.”
Deputat bildirdi ki, hətta Prezident İlham Əliyev bundan öncəki çıxışlarında və bugünkü iclasda çıxışı zamanı Fransanın Afrikada və bir çox ərazilərdə müstəmləkə siyasəti yeritdiyini, həmçinin soyqırımı həyata keçirdiyini və keçmişdə törətdiyi bu cinayətlərə görə üzr istəməsinin vacibliyini qeyd etdi: “Bununla yanaşı, Qoşulmama Hərəkatı Azərbaycanın sədrliyi dönəmində vahid mexanizm kimi işləməyə başlayıb. Dövlət başçımızın təşəbbüsü ilə bu hərəkatının parlament şəbəkəsi yaradılıb. Bu da yeni bir çağırışdır. Düşünürəm ki, parlament şəbəkəsi ədalətli və bərabər inkişafı təmin edə biləcək qanunvericilik mübadiləsi, parlament diplomatiyasının inkişaf etdirilməsinə böyük töhfə olacaq. Həmçinin Azərbaycanın sədrliyi dönəmində Prezident İlham Əliyevin təşəbbüsü ilə Qoşulmama Hərəkatının Gənclər Təşkilatı yaranıb. Düşünürəm ki, bu, çox önəmli və vacib qərarlardan biridir. Hərəkatın Gənclər Təşkilatı gənc liderlərin bir araya gətirilməsi və Qoşulmama Hərəkatına üzv dövlətlərin gənclərinin birgə təşəbbüslərlə çıxış edə bilmə imkanlarını daha da yaxşılaşdırdı, bu işlərin koordinasiyalı həyata keçirilməsini təmin etmiş oldu.”
N.Həmzəyevin sözlərinə görə, Qoşulmama Hərəkatına sədrliyimiz dövründə 44 günlük Vətən müharibəsinin gedişatında və daha sonra BMT Təhlükəsizlik Şurasında Fransa və Ermənistanın birgə təşəbbüsü ilə Azərbaycana qarşı bir çox qətnamələrin qəbul edilməsi planlaşdırılırdı: “Azərbaycan bu proseslərin qarşısını aldı, Qoşulmama Hərəkatına üzv olan dövlətlər ölkəmizin haqq səsini dəstəklədilər, Fransanın bu qətnaməni qəbul etdirməsinə qarşı çıxdılar. Bu baxımdan da Azərbaycan həmişə bizə dəstək olan dövlətlərə təşəkkür edir. Prezident İlham Əliyev öz çıxışında Qoşulmama Hərəkatına üzv olan dövlətlərə və onları təmsil edən nazirlərə təşəkkürünü çatdırdı və Azərbaycanın həmişə haqqın yanında olduğunu bildirdi. Dövlət başçısı Azərbaycan Hərəkata üzv olan dövlətlərin maraqlarını qorumaqla yanaşı, bu dövlətlərin ədalətli addım ataraq ölkəmizin haqq savaşını dəstəkləməsini bir daha vurğuladı.”
Deputat onu da qeyd etdi ki, keçirilən görüş zamanı Prezident Azərbaycanın qarşılaşdığı bir çox çətinliklərlə də bağlı öz fikirlərini bildirdi: “Xüsusilə də Ermənistanın götürdüyü öhdəlikləri yerinə yetirməməsi, Zəngəzur dəhlizinin işə düşməsinə maneçilik törətməsi, həmçinin Rusiya sülhməramlılarının nəzarətində olan Azərbaycan ərazilərindəki qanunsuz erməni silahlı birləşmələri tərəfindən mütəmadi olaraq təxribatların törədilməsi və bütün bu baş verənlərin əsas səbəbkarının Ermənistan olmasını bir daha tədbir iştirakçılarının diqqətinə çatdırdı. Hər dəfə Qoşulmama Hərəkatı platformasında keçirilən görüşlərdə Azərbaycan öz reallıqlarını həmin dövlətlərə çatdırmaq üçün bu imkanı düzgün dəyərləndirir. Ermənistan-Azərbaycan münasibətlərində normallaşma ilə bağlı son vəziyyət haqqında bir növ həmin ölkələr məlumatlandırılır. Eyni zamanda, bügünkü toplantıda İran xarici işlər nazirinin iştirak etməsi də çox maraqlı bir məqam idi. Düşünürəm ki, Prezident İlham Əliyevin çıxışlarından İran tərəfi də öz payını götürəcək və anlayacaq ki, Azərbaycan regionda sülhün və əmin-amanlığın əldə olunması üçün səylərini səfərbər etmiş bir tərəfdir. Ermənistan isə təəssüflər olsun ki, bu proseslərdən qaçır və prosesləri öz xeyrinə dəyişmək istəyir.”
N.Həmzəyev vurğuladı ki, İranın da gec-tez Ermənistanı yox, Azərbaycanı dəstəkləməsi ən düzgün seçim olardı: “Nəticə etibarilə bu, regionda sülhün və əmin-amanlığın daha tez və uzun müddətə qorunub saxlanmasına töhfə verərdi. Ümumilikdə, Azərbaycanın sədrliyi dövründə Qoşulmama Hərəkatı tarixinin ən uğurlu dövrünü keçirməkdədir. Gələcəkdə, hətta ölkəmizin bu təsisata sədrlik etmədiyi dönəmdə də Azərbaycanın təcrübəsindən, bu Hərəkatın idarəetməsinə gətirdiyi yeniliklərdən yararlanaraq təsisatı daha güclü formaya çatdırmaq mümkün olacaq. Azərbaycan həmişə Qoşulmama Hərəkatının aparıcı dövlətlərindən biri olaraq qalacaq. Düşünürəm ki, Azərbaycan Qoşulmama Hərəkatına cənab Prezidentin rəhbərliyi ilə sədrlik etməsi və burada qazanılmış təcrübə dünya ictimaiyyətində əldə edilmiş müsbət rəy gələcəkdə digər böyük təşkilatlara da Azərbaycanın sədrlik etməsinə bir zəmin yaradacaq. Azərbaycan böyük platformalarda təşəbbüskar və ədalətli mövqedən çıxış edən dövlət olaraq həmişə öz statusunu qoruyacaq.”