“Ermənistan tərəfindən Türkiyə Naxçıvan sərhədinə yaxın ərazidə iri metallurgiya zavodunun tikintisinin planlaşdırılması faktiki olaraq bu ərazilərin ekologiyasına ciddi ziyan vurmaq və bu yolla da Azərbaycana zərər vurmaq üçün hədəflənib”.
Bu fikirləri açıqlamasında deputat Naqif Həmzəyev deyib.
O bildirib ki, metallurgiya zavodunun tikintisinə sərf olunan sərmayenin 70 milyonu Amerika Birləşmiş Ştatları tərəfindən qoyulacaq:
"Ekologiyanın müdafiəçisi kimi çıxış edən, dayanıqlı inkişafın qorunması üçün böyük layihələr reallaşdıran Amerikanın belə bir layihəyə maliyyə dəstəyi göstərməsi sual doğurmaqdadır. Böyük ehtimalla bu səhmdarlar məhz Ermənistanın bu xislətindən ya xəbərsizdir, ya da sadəcə bir layihə olaraq gündəmə gətirilib. Ərazinin seçilməsinin onlar üçün bir əhəmiyyəti olmayıb. İstənilən halda metallurgiya zavodunun tikilməsi ekosistemin dağıdılmasına gətirib çıxarılacaqdır”.
Deputat qeyd edib ki, bu məsələ xüsusilə də Naxçıvan ərazisində kənd təsərrüfatında çalışan insanların məşğulluq probleminin yaranmasına səbəb olacaq:
“Burada flora və faunaya böyük ziyan dəyəcək, havaya zəhərli qazlar buraxılacaq. Bu da bütün ərazinin ekosisteminə mənfi təsir göstərəcək. Düşünürəm ki, həm Azərbaycan, həm də Türkiyənin eko-fəalları bu məsələyə sakit qalmamalıdırlar. Beynəlxalq təşkilatlar qarşısında bu məsələ qaldırılmalıdır. Ermənistanı bu planından çəkindirməli deyil, bu layihənin gerçəkləşdirmək üçün tamamilə başqa bir ərazi təklif edilməlidir. Sırf Naxçıvan sərhədində metallurgiya zavodunun tikintisi həmin ərazinin flora və faunasına, həm də insanların məşğulluq probleminə çox böyük zərər vuracaqdır. Mən bu zavodun tikintisinin əleyhinəyəm. Bütün həmkarlarımı, ekofəalları, QHT nümayəndələrini Ermənistanın növbəti məkrli planını dayandırmağa çalışıram”.