“İran Azərbaycana qarşı münasibətlərini səmimiyyət üzərində qura bilməyib. Təəssüf ki, ölkəmizə qarşı açıq formada təhdidlər yağdırmaqda davam edir”.
Bunu Milli Məclisin deputatı Naqif Həmzəyev İranın Daxili İşlər naziri Əhməd Vahidinin Azərbaycan Respublikası sərhədində ölkəmizə qarşı təhdid və istehzalar səsləndirməsinə, “Azərbaycan Respublikasının İran hökumətindən yaxşı dostu olmayacaq. İslam Respublikası ilə düşmənçilik edən hər kəs uduzmuş olar” kimi fikirlərinə münasibət bildirərkən deyib.
Onun sözlərinə görə, İran tərəfindən təhdidlər əvvəlki qədər kəskin və gərgin formada hiss olunmasa da hələ də davam etdirilir:
“Xüsusilə də İranın Daxili işlər naziri Əhməd Vahidinin rəsmi Bakı ilə bağlı səsləndirdiyi fikirlər onu deməyə imkan verir ki, rəsmi Tehranın siyasi dairələrində hələ də istehzalı, təhdid xarakterli düşüncələr mövcuddur. Onların bu siyasəti davam etdirməkdə əsas məqsədi Cənubi Azərbaycanda yaşayan 40 milyondan çox Azərbaycan türkünün müəyyən dərəcədə fikirlərini dəyişməyə çalışmaqdır. Bu yolla da Cənubi azərbaycanlıların könlünü almaq istəyirlər. Lakin heç kəsə sirr deyil ki, rəsmi Tehran açıq şəkildə Ermənistanı dəstəkləyir. Azərbaycanın 44 günlük Vətən müharibəsindən sonra əldə etdiyi uğurları və yaratdığı yeni reallıqları qəbul etmək istəmir”.
Deputatın fikrincə, xüsusilə də Azərbaycanda İranın narkoticarətinin qarşısının alınması onların qəzəbinə səbəb olub: “Qarabağ, Şərqi Zəngəzur ərazilərində İrana bağlı şirkətlər, şəxslər narkotik ticarəti ilə məşğul olurdular. Həmin yerlərdən tranzit ərazi olaraq istifadə edirdilər. Bütün bu ticarət də faktiki olaraq məhv olub. İran da hər vəchlə Ermənistanla münasibətlərini yüksək səviyyədə saxlamaq, Avropa və dünyaya yeganə çıxış yolunu əlindən buraxmaq istəmir. Bu baxımdan Azərbaycan əleyhinə təhdidlər səsləndirməkdə davam edirlər. İstənilən halda rəsmi Bakı öz mövqeyində qətidir. İranla da dostluq münasibətlərinin olmasını istəyirik. Lakin Azərbaycan İranın son dövrdə həyata keçirdiyi siyasət qarşısında öz mövqeyini ortaya qoymalı idi. Tehran əvvəlcə səfirliyimizə qarşı baş verən terror aktına dair istintaqın səmimi, ədalətli aparılmasını təmin etməlidir. Bu cinayətin arxasında duran şəxslər cəzasını almalıdır. Azərbaycan ərazisindəki cəsus şəbəkəsinin fəaliyyəti dayandırılmalıdır. Ölkəmizə qarşı təhdidlər yağdıran, ərazilərimizdə “dövlət” yaratmağa çalışan qurumların üzərindən əlini çəkməlidir. Bu sadalananlar müsbət həllini tapdıqdan sonra tərəflər arasında münasibətlər normallaşa bilər “.