Qərbi Azərbaycan mövzuzu beynəlxalq platformalarda daimi gündəm olmalıdır
“İlk növbədə 1988-ci ildə deportasiya olunmuş Azərbaycan türklərinin beynəlxalq qaçqın statusu almasına nail olmalıyıq”
Qərbi Azərbaycan İcması növbəti bəyanat yayıb. Vurğulanıb ki, Ermənistanın xarici işlər naziri Ararat Mirzoyan və digər rəsmilər bu günlərdə verdikləri bəyanatlarında Azərbaycanda yaşayan ermənilərin hüquqları məsələsi ilə bağlı spekulyasiya edərək ölkəsinin aqressiv və riyakar siyasətini nümayiş etdirməkdə davam edirlər. İcma xatırladıb ki, Ermənistan hökuməti bu ölkədə vaxtilə kompakt şəkildə yaşamış yüz minlərlə azərbaycanlının hamısını qovub və onların mədəni irsini sistemli şəkildə dağıdıb.
Ermənistan hökuməti həmin insanların qanuni təmsilçisi olan Qərbi Azərbaycan İcmasının qayıdış hüququnun təmin edilməsi üzrə dialoqa başlamaq çağırışlarına cavab vermir. Bəyanatda daha sonra vurğulanıb ki, Ermənistan hökuməti Qərbi Azərbaycan İcmasının dialoq çağırışını cavabsız qoyur, separatist ünsürlər üçün hansısa beynəlxalq mexanizmin yaradılmasına çalışır: "Ermənistan, öz ərazisindən qovduğu azərbaycanlıların qayıtmaq hüququnu təmin etməkdən nümayişkəranə şəkildə imtina etməsi azmış kimi, Azərbaycanda yaşayan ermənilərin hüquqlarının qorunması bəhanəsi altında Azərbaycan Respublikasının ərazi bütövlüyünə zidd olan və dövlətlərin daxil işlərinə qarışmaq prinsipini pozan yanaşma sərgiləyir.
Ermənistan rəsmiləri Azərbaycanda yaşayan ermənilər ilə bağlı hansısa beynəlxalq mexanizm yaradılması kimi sərsəm ideyalarını səsləndirməkdə davam edirlər. Qərbi Azərbaycan İcması Ermənistan hökumətindən beynəlxalq hüquqa və insan haqlarına zidd siyasətdən əl çəkməyi, qovduğu azərbaycanlıların beynəlxalq verifikasiya və zəmanət mexanizmləri çərçivəsində öz evlərinə təhlükəsiz və ləyaqətli şəkildə qayıtmalarına şərait yaratmağı tələb edir". Xatırladaq ki, ötən gün Qərbi Azərbaycan İcmasının yeni loqosu təqdim olunub. İcma sədri Əziz Ələkbərli tədbiri giriş sözü ilə açaraq icmanın bir illik fəaliyyəti barədə məlumat verib: "Biz il ərzində fəaliyyətimizlə bərabər, loqo barəsində də müzakirələr etdik və loqonun qurumun məqsəd və məramını ifadə edən, aydın və sadə bir loqo ərsəyə gətirməyi qərara aldıq". O, icmanın konsepsiyasının icrası barədə də fikirlərini bölüşüb: "Bütün bunlar hamısı Qərbi Azərbaycan Konsepsiyasının həyata keçirilməsini sürətləndirmək və prosesi bütün dünyada tanıtmaq məqsədi daşıyır. Biz cənab Prezidentin müəyyən etdiyi bəlli xətt üzrə fəaliyyətimizə davam edir və Qərbi azərbaycanlıların öz ata-baba yurdlarına qayıtması istiqamətində maksimum sürətli işləyirik".
Millət vəkili Naqif Həmzəyev açıqlamasında bildirib ki, Azərbaycan 44 günlük müharibədən sonra Ermənistana sülh əlini uzadaraq İrəvanı dialoqa dəvət etdi. Deputat vurğulayıb ki, ötən müddət ərzində Azərbaycan tərəfindən Ermənistanın sülhə məcbur edilməsi siyasəti uğurla həyata keçirilib: "Cənab Prezident İlham Əliyevin uğurlu siyasəti nəticəsində Ermənistan rəsmiləri Azərbaycanın ərazi bütövlüyünü tanıdıqlarını bildirirlər. Əvvəlki dövrlərdən fərqli olaraq hazırda Azərbaycanda yaşayan ermənilərə hansısa "status" verilməsi məsələsi gündəmdə deyil. Laçın yolunda sərhəd-keçid məntəqəsinin qurulması məsələsi də öz həllini tapıb. Tezliklə Zəngilandan Naxçıvana uzanacaq dəmir yolu xəttinin də istifadəyə verilməsinin şahidi ola biləcəyik. Bununla bağlı Azərbaycan tərəfində lazımi işlər yekunlaşmaq üzrədir. Bir sözlə, Azərbaycan öz gücü hesabına regionda sülhün bərqərar edilməsinə çalışır. Həmçinin Qarabağdakı ermənilərin təhlükəsizliyinə zəmanət verir. Buna paralel olaraq Qərbi Azərbaycan İcması öz dədə-baba yurdlarında yaşamaq hüququnu özlərində saxlamaqdadırlar. Qərbi Azərbaycan İcması bununla bağlı dəfələrlə bəyanat verib. Təəssüflər olsun ki, Ermənistanın siyasi rəhbərliyi hələ də Qərbi Azərbaycanda yaşamış azərbaycanlıların təmsilçisi olan İcmanın çağırışlarına cavab vermir. Onlar Azərbaycan ərazisində ermənilərin yaşamaq hüququndan danışırlar, ancaq Qərbi azərbaycanlıların öz yurdlarına geri dönmək hüququndan, onlara zəmanət verilməsindən qətiyyən söz açmırlar. Heç kimə sirr deyil ki, Ermənistanın Azərbaycanla şərti sərhədində olan kəndlərin əksəriyyəti boşaldılıb. Ən yaxşı halda həmin kəndlərdə 4-5 erməni ailəsi yaşayır. 200-dən çox kənd boş, sahibsiz vəziyyətdədir. Həmin bölgədə Qərbi azərbaycanlıların yaşama hüququnu bərpa etmək olar. Bu, Ermənistan üçün də faydalı olar. Qərbi Azərbaycan İcması öz fəaliyyətini daha da gücləndirməlidir. İlk növbədə Qərbi Azərbaycandan 1988-ci ildə deportasiya olunmuş Azərbaycan türklərinin beynəlxalq qaçqın statusu almasına nail olmalıyıq. Beynəlxalq platformalarda bu məsələni daim gündəmdə saxlamalıyıq. Zamanla Ermənistanın da haqq yoluna gələcəyinin şahidi olacağıq".