Azərbaycan və Türkiyə arasında imzalanan Şuşa Bəyannaməsinin ikinci ili tamam olur.
Belə ki, Şuşa Bəyannaməsi 2021-ci il 15 iyun tarixində Azərbaycanın mədəniyyət paytaxtı Şuşada imzalanıb.
Azərbaycan Prezidenti İlham Əliyevin və Türkiyə Prezidenti Rəcəb Tayyib Ərdoğanın təkbətək görüşündən sonra imzalanan “Azərbaycan Respublikası ilə Türkiyə Respublikası arasında müttəfiqlik münasibətləri haqqında Şuşa Bəyannaməsi” iki ölkə arasındakı münasibətlərin daha da dərinləşməsinə hesablanmış önəmli addım idi.
Hələ o dövrdə ciddi rezonans doğuran Şuşa Bəyannaməsi müttəfiqlik münasibətlərinin geostrateji əhəmiyyətini artırır. Şuşa Bəyannaməsi imzalanmadan əvvəl də qardaşlığın yeni tarixi mərhələsi olaraq ifadə olunurdu.
Azərbaycan ilə Türkiyə arasında müttəfiqlik münasibətləri haqqında Şuşa Bəyannaməsinin imzalanmasından sonra iki qardaş ölkə arasındakı münasibətlərin bütün müstəvilərdə davamlı inkişafını təmin edir.
Qeyd edək ki, Şuşa Bəyannaməsi bir çox sahələri əhatə edir. Hərbi müttəfiqlik, İnformasiya müharibəsində birgə addımlar, iqtisadi-ticari əlaqələr, eyni zamanda Azərbaycan və Türkiyəni birləşdirən Zəngəzur dəhlizinin açılması məsələsi Şuşa Bəyyanaməsinin əsas müddəalarındandır.
Mövzu ilə bağlı danışan deputat Naqif Həmzəyev deyib ki, Şuşa Bəyannaməsi həm tarixi, həm siyasi, həm də iqtisadi baxımdan ciddi əhəmiyyətə malikdir:
“Qeyd edim ki, Şuşa Bəyannaməsinin məhz Azərbaycan xalqının Qurtuluş Günü - 15 iyun tarixinə və Qarabağ, Zəngəzur üçün çox vacib sayılan Qars müqaviləsinin 100-cü ildönümünə təsadüf etməsinin xüsusi əhəmiyyəti var.
Azərbaycan və Türkiyə bununla bir daha tarixi qardaşlıq münasibətlərinin daha da inkişaf etdirəcəyinin mesajı verildi. Bu mesajın Şuşadan verilməsi də dünyaya verilən mesaj oldu. Azərbaycan bir daha dünyaya çatdırdı ki, Şuşa tarixi Azərbaycan torpaqlarıdır və buranın əsas sahibi Azərbaycan xalqıdır”.
Deputat əlavə edib ki, Şuşa Bəyannaməsi geosiyasi və geostrateji baxımdan da regionun mənzərəsini dəyişdi:
“Şuşa Bəyannaməsi ilk növbədə region üçün yeni gerçəkliklər deməkdir. Artıq Türkiyənin Azərbaycanın strateji müttəfiqi olaraq Qafqazda olmasının bir mesajıdır. Xüsusilə də 44 günlük Vətən müharibəsində əldə olunan tarixi qələbədən sonra regionun siyasi, iqtisadi, hərbi baxımdan ən güclü ölkəsi Azərbaycandır.
Dünya gücləri sırasında ön sıradan yer alan Türkiyə ilə imzalanan Şuşa Bəyannaməsi isə Azərbaycanın möqeyini daha da gücləndirir. Bu gün dünya ölkələri yaxşı başa düşür ki, Qafqazda Azərbaycanın razılığı olmadan heç bir beynəlxalq layihə icra oluna bilməz. Azərbaycanın bu gücünün arxasında isə bir çox amillər, o cümlədən də Şuşa Bəyannaməsi dayanır”.