“Azərbaycanın müstəqilliyini tanıyan ölkələrdən biri də Fransa olub. Azərbaycan-Ermənistan münaqişəsinin sülh yolu ilə aradan qaldırılmasında əsas vasitəçi olan ATƏT-in Minsk Qrupunun keçmiş həmsədrlərindən biri olan Fransa bu münaqişənin həll olunmasını dəstəkləyən ölkələrdən idi. Heç vaxt açıq şəkildə hiss etdirməsə də, Fransa Ermənistana dəstək nümayiş etdirirdi. Bununla belə Azərbaycan ilə münasibətlərini inkişaf etdirməyə maraq göstərirdi. Bir sözlə, Fransada Azərbaycanın mövqeyi dəstəklənirdi”. Bu sözləri açıqlamasında deputat Naqif Həmzəyev deyib.
Onun sözlərinə görə, lakin Makronun hakimiyyəti dönəmində biz bunun əksini gördük: “Fransa Prezidenti açıq-aşkar Cənubi Qafqazda ölkəsinin mövqeyinin artması istəyini nümayiş etdirir. 44 günlük Vətən müharibəsinin gedişində isə çəkinmədən Azərbaycan əleyhinə sənədlərin, qətnamələrin qəbul edilməsinin tərəfdarı kimi çıxış edirdi. Müharibə bitdikdən sonra Fransa Ermənistanın mövqeyini müdafiə etməyə davam etdi. Hətta danışıqlar prosesində tərəf kimi iştirak etmək istəyi sülh danışıqlarında müəyyən qədər gecikməyə gətirib çıxardı. Ancaq istənilən halda Fransa artıq Azərbaycanın mövqeyini qəbul etməkdədir. Fransa anlayır ki, Azərbaycanın haqqı olan ərazinin bərpası məsələsini özü həll edib və Cənubi Qafqazda ən güclü dövlətdir”.
Deputat sözlərinə davam edərək bildirib ki, Azərbaycan yalnız qonşu dövlətlərlə deyil, Avropa İttifaqı, ABŞ, Çin və digər böyük güclərlə yaxın münasibətlər qurmağı bacaran bir dövlətdir: “Bu baxımdan Fransa Azərbaycanın mövqeyini hörmətlə qarşılamalı və Ermənistanın sülh anlaşmasını imzalamasına kömək göstərməlidir. Biz cənab Prezident İlham Əliyev tərəfindən Fransanın Avropa və xarici işlər naziri Ketrin Kolonnanın qəbul edilməsi və bu zaman aparılan müzakirələri nəzərdən keçirdikdən sonra belə bir qənaətə gələ bilərik ki, Fransanın xarici siyasətində müəyyən dərəcədə yumşalma müşahidə edilməkdədir. Fransanın son dövrlərdə müxtəlif yollarla Azərbaycana təzyiq etmək cəhdlərinin uğursuz olması onları dövlətimizlə münasibətlərə yenidən baxmağa vadar edib. Azərbaycanın öz mövqeyində qəti şəkildə dayanması onun haqlı olduğunu nümayiş etdirir. Düşünürəm ki, yaxın dövrdə sülh razılaşmasının əldə olunması üçün Fransa da öz səyini artırmalıdır. Fransa dərk etməlidir ki, Azərbaycan ərazi bütövlüyü çərçivəsində və separatçıların bizim ərazimizdə fəaliyyətinin dayandırılması şərtilə bu sülhün əldə olunması əslində Ermənistan üçün də faydalıdır. Bu sülh olacağı təqdirdə yaxın gələcəkdə Ermənistanda da hansısa tərəqqidən danışmaq mümkün ola bilər”.