Biz Qərbi Azərbaycan həqiqətlərini bilən, məlumatı olan gənclik yetişdirməliyik
Ötən gün Qərbi Azərbaycan İcmasında “Qərbi Azərbaycan həqiqətlərinin dünya ictimaiyyətinə çatdırılmasında könüllülərin fəaliyyətinin təşviq edilməsi” məqsədilə məlumatlandırma sessiyası keçirilib. İcma sədri deputat Əziz Ələkbərli məhz bu cür çağırışların dünya ictimaiyyətinə çatdırılmasında gənclərin fəaliyyətinin intensivləşdirilməsinin zəruriliyini qeyd edib. Bildirib ki, biz Qərbi Azərbaycan həqiqətlərini bilən, məlumatı olan gənclik yetişdirməliyik:
"Biz Qarabağla bağlı həqiqətlərimizi yavaş-yavaş dünyaya çatdırmaqdayıq. İndi isə Qərbi Azərbaycanla bağlı həqiqətləri dünyaya çatdırmaq, təbliğ etməyin zamanıdır və bu, bir nəfərin işi deyil". Əziz Ələkbərli soydaşlarımızın tarixi torpaqlarına sülh yolu ilə qayıtması məsələsinə toxunub. İcma sədri qərbi azərbaycanlıların öz yurdlarında təhlükəsizliyinin vacibliyini diqqətə çatdırıb. O, məhz bu cür çağırışların dünya ictimaiyyətinə çatdırılmasında gənclərin fəaliyyətinin intensivləşdirilməsinin zəruriliyini qeyd edib. Gənclər və idman nazirinin müavini İndira Hacıyeva isə gənclərin azərbaycanlıların öz yurd-yuvasına geri qayıtması uğrunda apardığı bu haqq mübarizəsində daha yaxından iştirak etməsinin çox böyük önəm daşıdığına diqqət çəkib: "Azərbaycan gəncliyi istər ölkə daxilində, istərsə də xaricdə bu mübarizəyə dəstək verəcək kifayət qədər gücə və əzmə malikdir". Sonra Gənclər Fondunun, “Regional İnkişaf” İctimai Birliyinin və Azərbaycan Könüllü Təşkilatları İttifaqının nümayəndələri çıxış ediblər. Çıxışlar zamanı Qərbi Azərbaycan mövzusunun hər bir azərbaycanlının milli məsələsi olması və gənclərin bu məsələdə fəallıq göstərməli olduğu xüsusilə vurğulanıb. Daha sonra Qərbi Azərbaycan İcmasının Gənclər Birliyinin sədri, millət vəkili Ramin Məmmədovun təqdimatı baş tutub. Yekunda Qərbi Azərbaycandan olan könüllülər çıxış edərək yaxınlarının və özlərinin bu deportasiyalar və soyqırımları nəticəsində yaşadıqları ağrı-acılardan bəhs edərək Qərbi azərbaycanlılar və onların yaşadıqları, eləcə də geri qayıdış hüquqları ilə bağlı gənclərin daha da fəal iştirak edəcəyini bildiriblər.
Millət vəkili Naqif Həmzəyev açıqlamasında bildirib ki, Qərbi Azərbaycan İcması bütün fəaliyyətini bir müddət öncə hazırladığı Qayıdış Konsepsiyasına uyğun həyata keçirir. Deputatın sözlərinə görə, Qərbi Azərbaycandan deportasiya olunmuş azərbaycanlılarla bağlı təfsilatlı, dəqiq siyahı hazırlanmaqdadır:
"İcma tərəfindən bir çox beynəlxalq qurumun rəhbərliyinə, ölkə başçılarına müraciətlər ünvanlanıb. Yəni bu istiqamətdə mühüm işlər görülməkdədir. Təbii ki, görülən işlərlə yanaşı, Azərbaycanda fəaliyyət göstərən gənclər təşkilatları və ictimai fəallarla Qərbi Azərbaycan həqiqətlərinin həm ölkəmizdə, həm də əsasən xaricdə geniş təbliği ilə bağlı xüsusi işlər görməliyik. Gənclərimizin Qərbi Azərbaycanın tarixi, yer adları və soydaşlarımızın məruz qaldıqları ədalətsizliklə, hüquqsuzluqla bağlı məlumat sahibi olması üçün ciddi çalışmalar ortaya qoyulmalıdır.
Gənclərimiz Qərbi Azərbaycanı çox yaxşı tanımalı və bütün imkanları ilə dünyaya tanıtmalıdırlar. Həmçinin Qayıdış Konsepsiyasının həyata keçirilməsi ilə bağlı da öz töhfələrini verməlidirlər. Bu baxımdan İcma gənclər təşkilatları və könüllülərlə təmaslarını sıxlaşdırır. Yaxın dövrdə Qərbi Azərbaycan İcmasının Gənclər Birliyinin də bu istiqamətdə gördüyü işlərin şahidi olacağıq. İnanırıq ki, hər bir gəncimiz Qərbi Azərbaycanla daha yaxından maraqlanacaq, öyrənəcək və qayıdış prosesinin sürətlənməsi üçün əlindən gələni əsirgəməyəcək".