“Hər kəsə bəllidir ki, İranda insan haqlarından, beynəlxalq hüquqdan danışmaq gülünc olar. İran faktiki olaraq beynəlxalq hüququn bütün qaydalarını pozur”.
Bu fikirləri açıqlamasında millət vəkili Naqif Həmzəyev deyib.
Millət vəkili bildirib ki, orada insan, media azadlığından söhbət gedə bilməz: “Təəssüf ki, İran mediasında uzun müddətdir Azərbaycana qarşı ittihamlar, əsassız və tamamilə yanlış informsiyalar yayılır. Bundan başqa ölkəmizə qarşı təhqir və təhdidlər müşahidə olunmaqdadır. Bilirsiniz ki, uzun müddətdir İranda etiraz aksiyaları keçirilir. Bu da insan haqlarının olmamasına dəlalət edir. Və yaxud hansısa milliyyətçilik adı altında insanları edam edirlər”.
Millət vəkili əlavə edib ki, beynəlxalq hüququn İranda işləməsi mümkün deyil və bu səbəbdən də İrana qarşı Qərb tərəfindən sanksiyalar tətbiq olunmaqdadır: “Hətta islam dəyərləri baxımından da İranda vəziyyət ürəkaçan deyil. Ən əsas odur ki, İran müsəlman qardaşları olan Azərbaycanı deyil, təəssüf ki, azərbaycanlıların timsalında müsəlmanlara qarşı soyqırımlar törətmiş Ermənistanı dəstəkləməkdədir. Bu baxımdan da İranın verdiyi notanın əsası yoxdur. İran ilk növbədə Tehranda Azərbaycan səfirliyinə edilən terror hücumu ilə bağlı üzr istəməli, bu terror hadisəsinin düzgün araşdırılmasını təmin etməlidir. Həmçinin hazırda istintaqı davam edən deputat həmkarımız Fazil Mustafaya qarşı törədimiş terror aktı ilə bağlı düşünürəm ki, maraqlı məqamlar ortaya çıxacaq. Artıq ilkin versiyalar onu deməyə imkan verir ki, burada da İran terror təşkilatlarının əli var. Bir sözlə din istismar edilməməlidir. Din pərdəsi altında hansısa şəxsi maraqlar təmin olunmamalıdır
Qonşularla bağlı səmimi siyasət yürüdülməlidir. Qonşuların səbr kasasının dolmasına şərait yaradılmamasına çalışılmalıdır. İran hazırda bunu etməkdədir. Məncə İran anlamalıdır ki, Azərbaycanda təhdid dilində danışmaq Azərbaycanda hansısa terror hadisələrini törətməklə nəyisə əldə etməyəcək. İranın verdiyi notanın həqiqəti əks etdirməməsi və faktiki olaraq bu notanın Azərbaycanla bağlı hissəsinin reallığı əks etdirməməsi onu deməyə əsas verir ki, İran ilk növbədə özündəki problemləri görməli və həll etməlidir. Azərbaycana qarşı yürütdüyü yalnış siyasətə düzəliş etməlidir”.