“Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı hazırlanıb. Bildiyimiz kimi, 2020-ci ilin noyabr ayında Azərbaycan tarixi zəfər qazandı və bundan sonra Qarabağ və Şərqi Zəngəzura qayıdış proqramı ilə əlaqədar olaraq təxirəsalınmaz işlər həyata keçirildi”. Bu sözləri açıqlamasında deputat Naqif Həmzəyev deyib.
Onun sözlərinə görə, Birinci Dövlət Proqramında məhz Qarabağ və Şərqi Zəngəzura Böyük Qayıdışı təmin etmək üçün xüsusi dövlət proqramının həyata keçirilməsidir: “Burada ilk növbədə ərazilərin bərpası və yenidənqurulması üzrə mövcud vəziyyətin araşdırılması həyata keçirilir və ən əsası bu ərazilərin minalardan təmizlənməsinə önəm verilir. Çünki hədəf və məqsəd birbaşa olaraq bu ərazilərdə təhlükəsiz həyatı təmin etməkdir.
Bununla yanaşı, burada daimi və dayanıqlı həyatın təmin olunması ilə bağlı dayanıqlı icmaların yaradılmasına da çox böyük önəm verilir və bu ərazilərdə yalnız köç prosesinin həyata keçirilməsi yox, həmçinin yaşayacaq soydaşlarımızın məşğuliyyətinin, sosial həyatının təmin edilməsi, onların həyat təhlükəsizliyinin təmin edilməsi ən əsas proseslərdən biridir”.
Deputat sözlərinə belə davam edib: “Bütün bunlarla yanaşı, bu ərazilərdə ekoloji terror həyata keçirilibdir və ərazilərin landşaftının qorunub saxlanılması, burada flora və faunanın bərpa edilməsi, təbiətin əvvəlki görkəminə qayıtması üçün də təxirəsalınmaz işlər həyata keçiriləcək. Cənab Prezidentin bundan öncə verdiyi sərəncamlara uyğun olaraq bütün bu ərazilər yaşıl ərazi elan edilib və burada alternativ enerji mənbələrindən istifadə olunacaq.
Ağıllı şəhər, ağıllı kənd və ağıllı qəsəbə konsepsiyaları reallaşdırılacaq. Artıq bunun ilkin versiyası Ağalı kəndində həyata keçirilib. Digər ərazilərdə də biz buna bənzər və bundan daha yaxşı lahiyələrin icrasının şahidi ola biləcəyik.
Bir sözlə, I Dövlət Proqramı Qarabağ və Şərqi Zəngəzura Böyük Qayıdışa bir zəmin yaradacaq və Böyük Qayıdışla bağlı işlərin həyata keçirilməsinin sistemli reallaşmasını təmin edəcək. Bu birinci dövlət proqramında bütün bu iddialar birbaşa olaraq işin daha çevik, daha yaxşı və daha məqsədəuyğun həyata keçirilməsi üçün həyata keçirilir. Biz düşünürük ki, I Dövlət Proqramı reallaşdıqdan sonra növbəti dövlət proqramlarının da şahidi ola biləcəyik”.