Milli Məclisin noyabrın 18-də keçirilən plenar iclasında “Azərbaycan Respublikasının İsrail Dövlətində (Tel-Əviv şəhərində) Səfirliyinin təsis edilməsi haqqında” qanun layihəsi müzakirəyə çıxarılıb. Millət vəkilləri müzakirələrdən sonra qanun layihəsini səs çoxluğu ilə qəbul ediblər.
Bu tarixi addımın əhəmiyyətini şərh edən Milli Məclisin Azərbaycan-İsrail parlamentlərarası əlaqələr üzrə işçi qrupunun və Yeni Azərbaycan Partiyası Təftiş komissiyasının üzvü Naqif Həmzəyev bildirib ki, İsrailda çox sayda azərbaycanlılar yaşayır.
Deputatın sözlərinə görə, həmin azərbaycanlıların mütləq əksəriyyəti vaxtilə Azərbaycanda yaşamış yəhudilərdir: "Bəlkə də Azərbaycan dünyada yeganə ölkədir ki, burada yəhudilərə qarşı təqib və təzyiq həyata keçirilməyib. Tolerantlıq və multikulturalizmin həyat tərzinə çevrildiyi Azərbaycanda bütün milli və dini fərqliliyi olan insanlara, o cümlədən də yəhudilərə daim hörmət göstərilib, xoş münasibət sərgilənib. Bizlər bir ailənin üzvü kimi daim sülh, əmin-amanlıq içində yaşamışıq. Zərurət yarananda Azərbaycanın ərazi bütövlüyünün müdafiəsinə də birlikdə qalxmışıq. Birinci Qarabağ müharibəsi şəhidi, milliyyətcə dağ yəhudisi olan tankçı-kapitan Albert Aqarunovun Azərbaycan xalqı və dövləti qarşısında xidmətləri buna əyani misaldır. Milli Qəhrəmanımızın Şuşanın müdafiəsi uğrunda göstərdiyi şücaət, rəşadət gələcək nəsillərə nümunədir. Bu günün özündə də yəhudilərlə digər etnik mənsubiyyətə aid olan azərbaycanlılar, eləcə də İsraillə Azərbaycan arasında dostluq əlaqələri çox güclüdür. Bu baxımdan İsraildə Azərbaycan səfirliyinin açılması müsbət addımdır".
Millət vəkilinin qənaətincə, İsraildə səfirliyimiz çoxdan fəaliyyət göstərməli idi: "Bəlkə də bu səfirliyin açılması çoxdan reallaşmalıydı. Buna bir az zaman lazım idi. Uzun illərdir Azərbaycanda İsrail səfirliyi fəaliyyət göstərir. Ən əsası 44 günlük Vətən müharibəsində biz qardaş Türkiyə ilə yanaşı, bir çox dövlətlərin, xüsusən də İsrailin mənəvi, siyasi dəstəyini hiss etdik. Hal-hazırda da mövcud şərait İsraildə Azərbaycan səfirliyinin açılmasını zəruri edirdi. Bu qərar əsla hansısa xarici dövlətə qarşı atılmış addım deyil. Yalnız və yalnız ölkələrimiz arasında hərtərəfli əlaqələrin daha da inkişafına, milli təhlükəsizlik maraqlarımızın təmin olunmasına, İsrail və Azərbaycan xalqlarının dostluğunun möhkəmləndirilməsinə, İsraildəki Azərbaycan dostlarının və azərbaycanlıların hüquqlarının, istəklərinin müdafiəsinə hesablanmış addımdır. Səfirliyin açılması bütün bu maraqlara xidmət edəcək. Təbii olaraq bu qərarı alqışlayırıq. Hesab edirəm ki, gələcəkdə də İsrail və Azərbaycan dövlətləri arasında əməkdaşlıq ən yüksək səviyyəyə çatdırılacaqdır. Hər iki ölkənin milli təhlükəsizliyinin təmini, mədəni, siyasi, iqtisadi, hərbi əlaqələrin ən yüksək səviyyəyə çatdırılması üçün birlikdə addımlayacağıq".