Azərbaycanın İsraildə səfirliyi təsis ediləcək.
Bununla bağlı məsələ Milli Məclisin ötən gün keçirilən iclasının gündəliyinə əlavə edilən "Azərbaycan Respublikasının İsrail Dövlətində (Təl-Əviv şəhərində) Səfirliyinin təsis edilməsi haqqında" qanun layihəsində əksini tapıb.
Qanun layihəsi müzakirələrdən sonra bir oxunuşda qəbul edilib.
Qeyd edək ki, xalqımız tərəfindən də uzun müddətdir ki, Azərbaycanın İsraildə səfirlik açması ilə bağlı qərarı gözlənilirdi. Hər zaman Azərbaycana qarşı dost və qardaş münasibəti bəsləyən İsrail dövləti, xüsusilə tarixi qələbəmizlə yekunlaşan 44 günlük Vətən müharibəsində haqq savaşımızda yanımızda olduğunu bütün dünyaya göstərdi. Üstəlik, İsraildən aldığımız “Harop” dron-kamikadzelərin müharibənin gedişatına birbaşa təsir etdi.
Unutmayaq ki, İsrail Ermənistanın tələbinə rəğmən sözügedən dronları onlara satmaqdan imtina etmişdi.
Bütün bunların və əlaqələrimizin inkişaf etməsi fonunda İsraildə səfirliyimizin açılması labüd idi. Verilən bu qərar İsraildə də böyük məmnuniyyətlə qarşılandı. İsrailin Baş naziri Yair Lapid Azərbaycanın İsraildə səfirlik açmaq qərarını alqışladığını bildirib. İsrailin Xarici İşlər Nazirliyi isə Azərbaycanın Təl-Əvivdə səfirlik açmasını tarixi qərar adlandırıb.
Milli Məclisin deputatı Naqif Həmzəyev açıqlamasında bildirib ki, İsraildə Azərbaycan səfirliyi çoxdan açılmalı idi:
"İsraildə çoxlu azərbaycanlılar yaşayır. Bəlkə də Azərbaycan dünyada yeganə ölkədir ki, burada heç vaxt yəhudilərə qarşı təqib və yaxud da hansısa təzyiq həyata keçirilməyib. Bu baxımdan da yəhudi və Azərbaycan xalqı arasında dostluq əlaqələri çox güclüdür. İsraildə Azərbaycan səfirliyinin açılması çoxdan reallaşmalı idi, ancaq bir az zaman lazım idi. 44 günlük Vətən müharibəsində biz qardaş Türkiyə dövləti ilə yanaşı, bir çox dövlətlərin və ən əsası isə İsrailin mənəvi və siyasi dəstəyini hiss etdik. Hazırda da mövcud şərait İsraildə Azərbaycan səfirliyinin açılmasını zəruri edir".
Millət vəkili vurğulayıb ki, bu, heç bir dövlətə qarşı atılmış addım deyil:
"Bu, yalnız Azərbaycanın milli təhlükəsizliyinin qorunması, eləcə də İsrail və Azərbaycan dostluğunun daha da möhkəmləndirilməsinə xidmət edir. Həmçinin, səfirlik İsraildəki Azərbaycan dostlarının və azərbaycanlılarının hüquqlarının müdafiəsinə, habelə istəklərinə xidmət etmək üçün açılacaq. Biz bu qərarı alqışlayırıq. Düşünürəm ki, gələcəkdə də İsrail və Azərbaycan dövlətləri əməkdaşlıqlarını ən yüksək səviyyəyə çatdıracaqlar. Həm İsrailin, həm də Azərbaycanın milli təhlükəsizliyi, eyni zamanda mədəni və siyasi əlaqələrinin ən yüksək səviyyəyə çıxarılması üçün birlikdə addımlar atılacaqdır”.