“Sərnişindaşıma xidməti ilə məşğul olan bütün sürücülər, xüsusilə də, taksi sürücüləri adi sürücülərdən mütləq fərqlənməlidir. Onlar ilk növbədə xidmət göstərdikləri vətəndaşların təhlükəsizliyinin təmin edilməsi, daha ehtiyatlı avtomobil sürmələri, yol-hərəkət qaydalarına həmişə əməl etmələri istiqamətində vacib olan nüanslara xüsusilə diqqət edən şəxslər olmalıdır. Ancaq çox təəssüflər olsun ki, Azərbaycanda adi sürücülərlə taksi sürücülərinin arasında bilik səviyyəsinə və bacarığına görə heç bir fərq qoyulmur. İstənilən sürücülük vəsiqəsi əldə etmiş şəxs taksi xidməti də göstərə bilər. Bu baxımdan da müəyyən çətinliklərlə və problemlərlə qarşılaşırıq. Bu yalnız Azərbaycanda yox, bir çox ölkələrdə, xüsusilə də postsovet ölkələrində bunlara rast gəlmək mümkündür”.
Bu fikirləri açıqlamasında Milli Məclisin deputatı Naqif Həmzəyev deyib.
Deputat vurğulayıb ki, son dövrlər paytaxtda çoxlu sayda taksi xidməti göstərən şirkətlərin sayı artıb və müəyyən dərəcədə sağlam rəqabət pozulub.
“Çoxlu müştəri əldə etmək üçün qiymətlər çox aşağı endirilib. Nəticədə avtomobillər keyfiyyətsizdir, sürücülərin bilik və bacarıqları isə yüksək səviyyədə deyil. Yəni, sərnişinlərin təhlükəsizliyinin təmin edilməsi ilə bağlı taksi şirkətləri hansısa tədbirlərin görülməsinə diqqət yetirmirlər. Bu baxımdan da, bəzən heç də yüksək olmayan taksi xidmətləri ilə rastlaşırıq. Bilirisniz ki, bununla bağlı xüsusi sərəncam var. Bu sahədə xidmət səviyyəsinin yüksəldilməsi, sərnişinlərə daha yaxşı taksi xidmətinin göstərilə bilməsi üçün xüsusi komissiya işləyir. Biz düşünürük ki, ən qısa zamanda bununla bağlı xüsusi qərarlar veriləcək”.
Millət vəkili qeyd edib ki, narahat edən əsas məsələlərdən biri də taksi sürücülərinin piyadalara yol verməməsi məsələsidir:
“Bəzən piyada keçində piyadalara yol verilməməsinə şahidlik edirik. Ancaq o faktı da qeyd edək ki, piyadalar da çox vaxt belə məsələlərdə laqeydlik göstərirlər və haradan gəldi yolu keçirlər. Bu da yollarda xoşagəlməz hadisələrin baş verməsinə səbəb olur. Ümumiyyətlə, çox vaxt sürücülər harada gəldi avtomobillərini saxlayırlar. Nəticə etbarilə onsuz da tıxac və çətin olan yollarımızdakı vəziyyəti çətinləşdirirlər. Bu baxımdan düşünürəm ki, taksi xidməti göstərən şəxslərin mütləq əlavə təlimatlarla yaxından tanış olması vacibdir. Belə olacağı təqdirdə onlar həm yol-hərəkət qaydaları, həm sərnişinlərə daha rahat xidmət göstərmək, həmçinin təhlükəsizlik qaydalarının əməl olunması ilə bağlı müəyyən biliklər əldə etmiş olacaqlar”.
Millət vəkili sürücülük vəsiqələrinin verilməsində taksi sürücüləri üçün xüsusi bir kateqoqiya müəyyənləşdirməsinə, yaxud da onlar üçün hansısa sertifikatın verilməsinin vacibliyini vurğulayıb.
“Onları hansısa təlimlərə, qısa kurslara dəvət etmək olar. Çünki əksər Avropa və Qərb dövlətlərində bu cür hallar var. Taksi sürücüləri işə götürülmədən öncə onların bilik və bacarıqları mütləq yoxlanılır. Onları xüsusi təlimatlar arasında sorğu-suallar edirlər. Bir sözlə, həmin taksi sürücüləri adi sürücülərdən qat-qat bilikli və bacarıqlı olur. Bu sürücülər də sərnişinlərə xidmət göstərməyin nədən ibarət olduğunu çox yaxşı bilirlər. Konkret qaydalar və təlimatlar əsasında öz xidmətlərini göstərirlər. Bütün bunlarla yanaşı biz düşünürük ki, taksi xidməti göstərən avtomobillərin səliqəli olması, həmin avtomobillərin texniki vəziyyətinin yüksək olması vacib olan məsələlərdən biridir. Bu məsələlərə də diqqət edilsə, sərnişinlər daha məmnun olarlar. Ümumillikdə, bu xidmətin göstərilməsində həm taksi xidməti göstərən şəxslərin hüquqlarının müdafiəsi, həm də sərnişinlərin hüquqlarının müdafiəsi önəmlidir. İstənilən halda bu proses tənzimlənəcəyi təqdirdə düşünürəm ki, zamanla mövcud problemlər aradan qaldırılacaq”.