Vətən müharibəsinin başlamasından 2 il keçir.
Azərbaycan işğaldan azad etdiyi ərazilərdə minatəmizləmə, bərpa və quruculuq işləri aparır. Postmüharibə dövründə işğaldan azad edilmiş ərazilərə bir çox səfərlər təşkil olunur. Bu gün də Qarabağa səfərlər davam edir. Qarabağa səfər edəndə ilk olaraq işğal dövründə erməni vandalizminin şahidi olurur. Bunu işğaldan azad edilmiş torpaqlara gələn hər bir insan öz gözləri ilə görür.
Azad olunmuş bütün şəhərlərdə, kəndərdə, qəsəbələrdə erməni vəhşiliyinin təzahürlərini görmək mümkündür. Ermənistan işğal dövründə Azərbaycanın şəhər və kəndlərini yerlə-yeksan edib, bütün tarixi abidələri, məscidləri dağıdıb, ya da təhqir edib. 67 məsciddən 65-i tamamilə dağıdılıb, qalan yarıdağılmış məscidlərdə mənfur düşmən bütün dünya müsəlmanlarını təhqir etmək üçün inək, donuz saxlayırdı. Əslində bu faktlar işğal dövründə də bilinirdi, amma həmişə olduğu kimi bütün dünya buna susurdu. Bu gün xüsusilə də o torpaqlarda törədilən vəhşiliklərə dünyanın açıq şahidlik etdiyi bir vaxtda yenə də ermənipərəst mövqedən çıxış edən ölkələr var. Təcavüzkara dəstək isə elə təcavüz sayılır.
Deputat Naqif Həmzəyev məsələ ilə bağlı açıqlamasında deyib ki, Azərbaycan 44 günlük Vətən müharibəsində Zəfər çaldı və torpaqlarını işğaldan azad etdi:
“Nəticədə Ermənistan kapitulyasiya aktını imzalamaq məcburiyyətində qaldı. Ancaq biz torpaqları işğaldan azad etsək də, həmin ərzilərdə daşın daş üstə qalmadığını, hətta Ermənistan tərəfindən dini-milli abidələrimizə qarşı soyqırım törədiliyini, qəbiristanlıqlarımızın belə təhqir olunduğunu gördük. Müharibənin gedişində xatırlayırıq ki, əsgərlərimiz işğaldan azad etdikləri ərazilərdə Azərbaycan bayrağını ucaltmaq üçün dağıdılmamış bina tapmırdılar. Müharibədən sonra işğaldan azad olunmuş ərazilərə səfərlər zamanı da faktiki olaraq bütün şəhərlərin, rayonların, kəndlərin dağıdıldığını, tikinti materiallarının daşındığını, yalnız lazımsız daşların həmin ərazilərdə qaldığının şahidi olduq. Bəzən şəhərlərin və kəndlərin yerlərini belə tapmaqda çətinlik çəkirdik. Yalnız həmin əraziləri tanıyan mütəxəssislər, kənd sakinlərinin sayəsində yerləri müəyyənləşdirmək mümkün olurdu. Çox təəssüflər olsun ki, Ermənistan tərəfindən 30 ilə yaxın işğal altında saxlanılan bu ərazilər tamamilə dağıdılıb və bu ərazilərdə yenidən insanların qayıdaraq yaşamasını mümkünsüz etmək üçün bu cür vandal siyasət həyata keçirilib”.
Deputat əlavə edib ki, eyni zamanda, Ermənistan tərəfindən Azərbaycan əraizləri minalarla çirkləndirilib, bu yolla həmin ərazilərə sürətli qayıdışın qarşısının alınması planlaşdırılıb:
“Ermənistanın minalama siyasəti nəticəsində ötən iki il ərzində 200-dən çox dinc sakin və hərbçilər yaralanıb və ya şəhid olub. Göründüyü kimi, Ermənistan bu əraziləri elə bir hala salıb ki, normal həyata qayıtmaq üçün uzun illər tələb olunur. Azərbaycan isə 2 il ərzində bu işin öhdəsindən layiqincə gəldi və torpaqlarımızın yenidən cənnətə çevrilməsi üçün təxirəsalınmaz işlər gördü. İşğaldan azad olunmuş ərazilərə hökumət tərfindən Azərbaycanda fəaliyyət göstərən diplomatik korpus rəhbərlərinin, hərbi attaşelərin, beynəlxalq təşkilat rəhbərlərinin səfəri təşkil edilir. Ermənistanın bu ərazilərdə törətdiyi vandalizmin üzə çıxması üçün layihələr həyata keçirilir”.
Naqif Həmzəyev 2022-ci ilin “Şuşa ili” elan edilməsini xatırladıb:
“Bu ildə Şuşa şəhərinə beynəlxalq təşkilatların səfərləri təşkil olundu və bir çox beynəlxalq tədbir keçirildi. Şuşa artıq əvvəlki görkəmini, funksionallığını bərpa etməkdədir. Şuşa Azərbaycanın mədəniyyət paytaxtıdır. 2023-cü il üçün isə türk dünyasının mədəniyyət paytaxtı seçilib. Azərbaycan işğaldan azad olunmuş əraziləri bərpa etməyə nəqliyyat və kommunikasiya xətlərinin qurulması ilə başladı. Artıq Füzuli və Zəngilanda beynəlxalq hava limanlarının inşası başa çatıb. Laçın Hava Limanının isə inşası davam etdirilir. Elektrik enerjisinin bərpası ilə bağlı da təxirəsalınmaz işlər görüldü. Yarımstansiyalar, SES-lər, ötürücü qurğular tikildi, bərpa edildi. Ümumilikdə isə işğaldan azad olunmuş torpaqlar “yaşıl ərazilər” elan edilib. Burada daha çox alternativ enerji mənbələrindən istifadə ediləcək. Göründüyü kimi, Azərbaycan qısa müddət ərzində Qarabağ və Şərqi Zəngəzurda böyük işlər görür. Düşünürəm ki, bu ərazilər tədricən minalardan təmizlənəcək və necə ki, Ağalı kəndində qayıdışın şahidi olduq, digər şəhər və kəndlərə də “Böyük Qayıdış”ın şahidi olacağıq. Keçmiş məcburi köçkünlər öz dədə-baba yurduna qayıdacaqlar”.