“Kəpəz”in Premyer Liqaya çıxması bizi çox sevindirdi. Ancaq təəssüflər olsun ki, aldığımız bu xəbər bütün “Kəpəz” azarkeşlərini, o cümlədən də bizi məyus etdi”.
Bu sözləri açıqlamasında Millət vəkili Naqif Həmzəyev deyib.
Gəncə şəhərinin deputatı “Kəpəz”in stadionunun qəzalı vəziyyətdə olmasına görə ev oyunlarını Bakıda keçirməsinə münasibət bildirib. O, bunu klub və azarkeşləri üçün utancverici adlandırıb. Həmzəyev bildirib ki, komanda ev oyunlarını kiçik sayda azarkeşin iştirakı ilə Gəncədə keçirməlidir:
“Səbəbi tam olaraq bilinməsə də, ehtimal olunur ki, Fövqəladə Hallar Nazirliyinin Gəncə şəhər stadionunda müəyyən qüsurların olması haqda verdiyi rəyə əsasən komandanın ev oyunlarının Bakıda keçirilməsi qərara alınıb. Bu da “Kəpəz” və onun azarkeşləri üçün çox utancverici bir xəbərdir. “Kəpəz” Gəncənin komandasıdır və öz tarixi var. Buna görə də “Kəpəz”in ev oyunlarının kiçik sayda – 1000-1500 azarkeşin iştirakı ilə Gəncədə keçirilməsi yaxşı olardı. Çünki “Kəpəz” həmişə öz gücünü azarkeşlərdən alıb. Bu baxımdan da mən AFFA rəsmilərindən və aidiyyatı qurumlardan xahiş edirəm ki, “Kəpəz” azarkeşlərinin istəyini nəzərə alaraq az bir sayda tamaşaçı iştirakı ilə komandanın ev oyunlarının məhz Gəncədə keçirilməsinə icazə verilsin. Belə olcağı təqdirdə bu, digər klublar üçün də maraqlı olacaq və Azərbaycan Premyer Liqası təkcə Bakıda yox, bölgədə də keçiriləcək. Klublar avtobus və ya təyyarə ilə Gəncəyə səfər edər. Bu, çox maraqlı olar və ümumilikdə Azərbaycan futboluna töhfə verər".
Millət vəkili onu da bildirib ki, “Kəpəz” ilk oyunda olmasa da, növbəti matçları mütləq Gəncədə keçirməlidir: “Son illər “Kəpəz”in ev oyunları həmişə Gəncədə keçirilib. Yalnız iki sektor qəzalı olduğu üçün ora tamaşaçılar buraxılmırdı. Ancaq indiyədək heç bir ciddi problemlə qarşılaşmamışıq. Düşünürəm ki, ilk oyuna çatmasa da, növbəti ev matçları mütləq Gəncədə keçirilməlidir. Belə olmasa, “Kəpəz”dən istədiyimiz nəticəni ala bilməyəcəyik və növbəti uğursuzluqla qarşılaşacağıq”.