Son günlər narkotik istifadə edib sükan arxasında oturan sürücülərin sayının artması cəmiyyəti narahat edən əsas mövzulardan birinə çevrilib. Hətta bu sürücülər arasında avtobus idarə edənlər də var. Bu kimi hallar hər gün taksidən və marşrut avtobuslarından istifadə edən minlərlə insanın həyatına ciddi təhlükə deməkdir.
Məsələn, bu gün Sulutəpə qəsəbəsindən paytaxt istiqamətində hərəkətdə olan “MİDİBUS” markalı, 90-CT-684 dövlət qeydiyyat nişanlı avtobusun sürücüsü Rəşad Nəcəfov Ekoloji Nəzarət üzrə YPX Bölüyünün əməkdaşları tərəfindən saxlanılıb. Sənədlərin yoxlanılması zamanı sürücünün hərəkətləri şübhə doğurduğundan onun tibbi müayinədən keçməsi təmin olunub. Müayinə zamanı Rəşad Nəcəfovun narkotik maddə qəbul etməsi müəyyən edilib və o, narkotik istifadəçisi olduğunu etiraf edib.
Məsələni şərh edən Milli Məclisin deputatı Naqif Həmzəyev bildirib ki, ölkəmizdə sürücülərin narkotik vasitə istifadə edərək və ya spirtli içki içərək nəqliyyatda çalışması artıq böyük bir problemə çevrilib. Deputat vurğulayıb ki, artıq cəmiyyət bu problemin həllini tələb edir:
“Xatırlayırsınızsa, mən Milli Məclisin plenar iclaslarının birində sürücülərin, xüsusilə də ictimai nəqliyyat sürücülərinin fəaliyyətinə nəzarətinin zəif olduğunu, onların tibbi müayinədən keçirilmədiyini, xüsusi qaydalara əməl olunmadığını bildirmişdim. Ən acınacaqlı vəziyyət ondan ibarətdir ki, həm daxili, həm də şəhərlərarası avtobus sürücülərinin tibbi müayinəsi düzgün həyata keçirilmir. Yaxud da ki, bu müayinəni həyata keçirən tibb məntəqələrində lazımi müasir avadanlıqlar yoxdur. Orada yalnız və yalnız təzyiq, hərarət ölçülür. Bu da təbii ki, həmin sürücünün hazırki vəziyyətini, hər hansı spirtli içki içib-içmədiyini, yaxud narkotik vasitə qəbul edib-etmədiyini müəyyən etmir. Bu baxımdan da hesab edirəm ki, aidiyyatı qurumlar bu məsələyə diqqəti artırmalıdırlar”.
Deputat ictimai nəqliyyatı idarə edən sürücülərin məsuliyyətinin daha çox olduğuna diqqət çəkib:
“Onlar tək özlərini yox, sərnişinlərin həyatlarının məsuliyyətini daşıyırlar. Fikrimcə, vaxtilə qaldırdığım məsələyə diqqət yetirilsəydi, hazırda bu cür xoşagəlməz hallar da olmazdı. Bununla yanaşı, taksi sürücüləri arasında belə hallar var və bir çox avtomobil qəzasının baş verməsinin səbəbi məhz bu cür sürücülərə nəzarətin zəif təşkil edilməsi ilə bağlıdır. Bir daha aidiyyatı qurumlardan xahiş edirəm ki, ictimai nəqliyyatı idarə edən sürücülərin tibbi müayinədən keçirilməsinə dırnaqarası baxmasınlar. Onlar ciddi formada hər gün müayinədən keçirilsin. Təbii ki, bu reydlər 1 həftə, 10 gün yox, daimi aparılsın və sistemli hal olsun. Belə halda sürücülər, ictimai nəqliyyat şirkətləri də məsuliyyətli olacaqlar. Bununla da, sürücü və sərnişinlərin təhlükəsizliyi də təmin olunmuş olacaq. Hesab edirəm ki, vətəndaşlar özləri də bu kimi halların qarşısının alınmasında təşəbbüs göstərməlidir. Narkotik vasitə istifadə edən sürücüləri aşkarlayaraq üzə çıxarmaq, polisə xəbər vermək lazımdır. Bu, çox vacib məsələdir. Narkotik qəbul edib yola çıxmaq, bütün hərəkət iştirakçılarını təhlükəyə atmaq deməkdir”.