“Azərbaycanda "Bakı Marafonu"nun keçirilməsi sağlam həyat tərzinin təbliğinə müsbət təsir edən aksiya kimi dəyərləndirilməlidir. On minlərlə insanın bu tədbirə qoşulması, sağlam həyat tərzinin təbliği, insanların təmiz havada qaçması, əylənməsi, idmanı sevməyən insanlara da bu sevginin aşılanması gözəl təşəbbüsdür”.
Bunu Milli Məclisin deputatı Naqif Həmzəyev “Bakı Marafonu-2022” barədə danışarkən deyib.
Deputat bildirib ki, buna bənzər marafonların tək Bakıda deyil, ölkəmizin bütün böyük şəhərlərində, rayonlarında keçirilməsi vacibdir: “Belə olacağı təqdirdə biz kütləvi formada sağlam həyat tərzini təbliğ edəcəyik. Xüsusən, gənclərimiz gənc yaşda idmanı sevəcəklər. Vətəndaşlarımız həmişə sağlam yaşayacaq, canlarının qədrini biləcəklər. Eyni zamanda, bu proses getdikcə daha da kütləviləşəcək. “Bakı Marafonu”nun təşkil edilməsində iştirak edən bütün təşkilatlara, xüsusən Heydər Əliyev Fonduna dərin təşəkkürümüzü bildiririk. Bu cür aksiyaların mütəmadi olaraq keçirilməsini dəstəkləyirik”.