"Azərbaycan 44 günlük Vətən müharibəsində Zəfər çaldıqdan sonra Ermənistan kapitulyasiya aktını imzaladı və üçtərəfli bəyanatda nəzərdə tutulduğu kimi rus sülhməramlıları Azərbaycan ərazilərində yolunu azmış ermənilərin yerləşdiyi yerlərdə sülhməramlı missiyasını yerinə yetirməyə başladı". Bu sözləri açıqlamasında deputat Naqif Həmzəyev deyib.
Onun sözlərinə görə, təbii ki, ilk vaxtlarda gərginliklər olurdu və çox vaxt qanunsuz erməni silahlı birləşmələri təxribata əl atırdılar: "Azərbaycan Silahlı Qüvvələri tərəfindən bu təxribatların qarşısı mərdliklə alınırdı. Ancaq son dövrlərdə demək olar ki, rus sülhməramlıları öz missiyalarını layiqincə yerinə yetirirlər. Cənab Prezident İlham Əliyevin "Cənubi Qafqaz: inkişaf və əməkdaşlıq” beynəlxalq konfransında qeyd etdiyi kimi Rusiya sülhməramlılarının nəzarətində olan ərazidə vəziyyət ümumilikdə sabitdir. Əvvəlki dövrlərdən fərqli olaraq artıq onlar tərəf tutmur və erməni silahlı dəstələrinə hər hansı bir şərait yaratmırlar. Xüsusilə Laçın dəhlizində həmin ərazilərə keçid zamanı bəzən yoxlamalar olmadan yük marşrutlarını buraxırdılar. Hazırda vəziyyət tamamilə dəyişib.
Xatırlayırsınızsa, bir müddət bundan öncə erməni deputatlarının həmin ərazilərə daxil olmasına icazə verilmədi, onlar geri qaytarıldı. Həmin zaman Azərbaycan tərəfi ilə rus sülhməramlıları danışdı və Azərbaycan tərəfi razılıq vermədiyi üçün belə bir səfər baş tutmadı. Bir sözlə, artıq vəziyyət tamamilə dəyişib. Bütün sərhədboyu əməliyyat şəraiti Azərbaycannın Silahlı Qüvvələrinin nəzarətindədir. Bu gün rus sülhməramlıları öz missiyalarını yerinə yetirə bilirlər. Əminliklə deyə bilərik ki, onların mandatı başa çatdığı müddətdə rus sülhməramlıları bu əraziləri tərk edəcək. Çünki prosesə Azərbaycan tam nəzarət etdikdən, Azərbaycan ilə Ermənistan arasında sülh müqaviləsi imzalandıqdan sonra artıq sülhməramlıların burada hər hansı bir missiyasını yerinə yetirməyə ehtiyac qalmayacaq. Bütün proses Azərbaycanın Silahlı Qüvvələri tərəfindən həyata keçiriləcək. Orada yaşayan erməni əsilli insanların da təhlükəsizliyi silahlı qüvvələrimiz tərəfindən təmin olunacaq”.