"Dünya Azərbaycanlılarının V Qurultayının Şuşada keçirilməsi tarixi bir hadisədir. Bu qurultayda dünyanın müxtəlif yerlərində yaşayan azərbaycanlı soydaşlarımızın, diaspor nümayəndələrinin iştirak etməsi çox qürurverici bir hadisədir". Bu sözləri açıqlamasında deputat Naqif Həmzəyev deyib.
Onun sözlərinə görə, göründüyü kimi cənab Prezident İlham Əliyev bundan daha öncə baş tutmuş qurultaylarda çıxışı zamanı Azərbaycanın ərazi bütövlüyünün bərpa edəcəyini söyləyirdi: "Dünya Azərbaycanlılarının V Qurultayındakı çıxışı zamanı da bu məsələlərə xüsusilı toxundu. Bu Zəfərə qədər Azərbaycan çox çətin dövrlərdən keçib. Azərbaycan zəfərə qədər gedən yolda iqtisadi cəhətdən gücləndi, ordu quruculuğuna önəm verdi, beynəlxalq məsələlərdə öz mövqeyini gücləndirdi. Nəticə etibarilə 44 günlük Vətən müharibəsində əldə etdiyimiz hər bir üstünlüyümüzü postmünaqişə dövründə də diplomatik və siyasi üstünlüyə çevirə bildik. Cənab Prezident İlham Əliyev Zəfər Qurultayı zamanı Azərbaycanın humanist addım atdığını və Ermənistana sülh təklif etdiyini xüsusilə vurğuladı.
Əgər, Ermənistan bizim 5 bənddən ibarət sülhlə əlaqədar olan şərtlərimizi qəbul etməzsə, Azərbaycan Ermənistanın ərazi bütövlüyünü tanımayacağını bildirdi. Bu da, o deməkdir ki, Ermənistan reallıqları qəbul etməsə, 44 günlük Vətən müharibəsindəki “dəmir yumruq” yenidən Ermənistanın başına dəyə bilər. Bu, Ermənistan üçün çox nəticə verə bilər. Bu baxımdan da Ermənistan Zəfər Qurultayında səsləndirilmiş fikirləri düzgün qiymətləndirilməli və sülh prosesini sürətləndirilməlidir. Bildiyimiz kimi Ermənistan tərəfi Azərbaycana qarşı təxribatlar, soyqırım törədiblər. Biz sülh müqaviləsi imzalansa, belə biz bütün bunları unutmamalıyıq. Ümumilikdə Zəfər Qurultayının keçirilməsini çox müsbət dəyərləndiririk. Ümid edirik ki, növbəti qurultaylarımızda da yeni uğurların şahidi olacağıq”.