Dünya Azərbaycanlılarının V Qurultayının keçirilməsi ilə bağlı hazırlıq işləri yekunlaşmaq üzrədir.
Diasporla İş üzrə Dövlət Komitəsindən bildirilib ki, qurultayın Azərbaycanın mədəniyyət paytaxtı olan Şuşa şəhərində keçirilməsi nəzərdə tutulur.
Qurultay iştirakçıları əvvəlcə Bakı şəhərində Fəxri xiyabanı, Birinci və İkinci Şəhidlər xiyabanını ziyarət edəcək, daha sonra Şuşa şəhərinə yola düşəcəklər.
Tədbirdə 65 ölkədən 400 nəfərə yaxın diaspor nümayəndəsinin iştirakı gözlənilir. Qurultayın rəsmi açılış mərasimindən sonra Diasporla İş üzrə Dövlət Komitəsinin fəaliyyətinə dair hesabat verilməsi, “Postmüharibə dövründə Azərbaycan diasporunun qarşısında duran vəzifələr”, “Qarabağın bərpası və yenidən qurulmasına Azərbaycan diasporunun töhfələri” mövzularında müzakirələrin təşkili planlaşdırılır.
Mövzu ilə bağlı danışan Milli Məclisin deputatı Naqif Həmzəyev bildirib ki, uzun illərdir Azərbaycan torpaqlarının bütövlüyünü bərpa etmək üçün mübarizə aparıb:
“Azərbaycan dövləti hərtərəfli şəkil bu tarixi günlərə hazırlaşıb. Ölkədə aparılan sosial-iqtisadi, siyasi islahatlar, ordu quruculuğu kimi geniş, əhatəli bir prosesi şərtləndirən amillərin hər birinə xüsusi diqqətin ayrılması yalnız bir məqsədə xidmət edirdi. Bütün bunlarla yanaşı xaricdə yaşayan diaspora nümayəndələri də Azərbaycan həqiqətlərinin dünyaya çatdırılmasında səfərbər oldu. Azərbaycanın hüdudlarından kənarda məskunlaşmış milyonlarla soydaşlarımızın vahid bir amal ətrafında birləşdirilməsi istiqamətində görülən bütün işlər ümumilli liderimiz Heydər Əliyevin fəaliyyəti ilə bağlıdır. Bu gün də cənab Prezidenti İlham Əliyev bu siyasəti uğurla davam etdirir. İlham Əliyev Prezident seçilərkən belə bir fikir söyləmişdi: ” Mən bütün dünya azərbaycanlılarının Prezidentiyəm”. Həqiqətən də ölkə başçımız öz fəaliyyəti ilə bu dediklərini sübut edir. Bu gün də dünya azərbaycanlılarının Prezidenti olaraq hər kəsin fəxr etdiyi lider statusunu qoruyub saxlayır. Prezidentimizin uzaqgörən siyasəti nəticəsində biz torpaqlarımızı düşmən tapdağından azad etdik. 44 günlük Vətən müharibəsi dövründə xaricdə yaşayan bütün diaspora nümayəndələrinin qəlbi Azərbaycanla döyündü, onlar da Azərbaycanın haqq mübarizəsinə öz dəstəyini ifadə edərək dünyaya çatdırılmasında böyük rol oynadılar”.
Millət vəkilinin sözlərinə görə, postmünaqişə dövründə Prezident İlham Əliyevin rəhbərliyi altında uğurlu siyasətimiz davam etdirilir:
“Bu gün biz artıq işğaldan azad olunmuş ərazilərin quruculuq-bərpa işlərini həyata keçirdir, Qarabağ və şərqi Zəngəzuru cənnət məkanına çevirmək üçün çalışırıq. Dünya Azərbaycanlılarının V Qurultayının məhz Şuşa şəhərində təşkil olunması da əbəs yerə deyil. Çünki bu, hər bir azərbaycanlının, xüsusilə də xaricdə yaşayan vətən həsrəti çəkən soydaşlarımızın ən böyük arzusudur. Bu gün həmin diaspora fəallarını, bu sahədə çalışan liderləri uzun illər sonra Şuşa şəhərinə toplayırıq. Bu günə qədər diaspora fəaliyyətimizdəki strategiya torpaqlarımızın işğaldan azad olunmasına nail olmaq idisə, bu gündən sonra bu ideya tamamilə yeni hədəflərə yönləndirilir. Cənab Prezident İlham Əliyev bu Qurultay zamanı həmin strategiya və yeni hədəfləri səsləndirəcək. Artıq bu gündən sonra növbəti onilliklər boyu biz həmin hədəflərə doğru birlikdə çalışacağıq. Azərbaycanın qarşısına qoyduğu ən böyük hədəflərdən birinə çatıb, torpaqlarımız işğaldan azad olub. Ancaq unutmamalıyıq ki, Azərbaycanın daha da qüdrətli olması, müstəqilliyinin daimi və əbədi olması üçün bir yumruq kimi Prezidentimizin ətrafında sıx birləşməli, əvvəlkindən qat-qat artıq birlik və səfərbərlik nümayiş etdirməliyik. Əminəm ki, Şuşada keçiriləcək Zəfər Qurultayı dünyaya səs salacaq. Bu Qurultay bizim gələcək zəfərlərimizə gedən yolumuzda hələ başlanğıcdır”.
Milli Məclisin deputatı Vüqar İskəndərov bildirib ki, diaspor fəaliyyətinin genişləndirilməsi hər bir ölkə üçün çox vacib məsələdir:
“Azərbaycan dövlət müstəqilliyini bərpa etdikdən sonra ümummilli liderimiz tərəfindən bu sahəyə xüsusi diqqət ayrıldı.Diaspora fəaliyyəti hər ölkə üçün çox vacib məsələdir. Azərbaycan dövlət müstəqilliyini bərpa etdikdən sonra ümummilli liderimiz tərəfindən bu sahəyə xüsusi diqqət ayrıldı. Dünya azərbaycanlılarının təşkilatlanması, diaspor quruculuğunda ümummilli lider Heydər Əliyevin rolu əvəzsizdir. Dövlət tərəfindən diaspor fəaliyyətinin genişləndirilməsinə hər zaman xüsusi diqqət ayrılıb. Cənab Prezident İlham Əliyev də bu siyasəti müasir dövrə uyğun şəkildə uğurla davam etdirir. Xaricdə yaşayan azərbaycanlıların haqq səsimizi dünyaya daha yaxşı çatdırmasında, erməni lobbiçiliyi, Azərbaycana qarşı qərəzli mövqe nümayiş etdirən təşkilatlarla mübarizədə diasporamız çox qətiyyətli mövqe ortaya qoymağa başlayıb. Artıq dünyanın bir çox böyük ölkələrində konkret formalaşmış Azərbaycan diaspor təşkilatları mövcuddur. 44 günlük Vətən müharibəsindən sonra qazandığımız böyük qələbə bizi həm də müzəffər bir xalq obrazına gətirdi”.
Millət vəkilinin sözlərinə görə, Şuşa şəhərində keçiriləcək dünyanın müxtəlif ölkələrində yaşayan azərbaycanlıları özünə birləşdirəcək Dünya Azərbaycanlılarının 5-ci Qurultayı bir çox böyük mətləblərdən xəbər verir:
“30 ildən sonra Şuşada bu Qurultayın təşkili çox böyük tarixi hadisədir. Bir tarix yazılır, o tarix ki hər bir azərbaycanlıda böyük qürur hissi doğurur. Qurultaya artıq dünyanın müxtəlif ölkəsindən diaspor nümayəndələri dəvət olunub. Qurultayda diaspor fəaliyyətimizlə bağlı yeni yol xəritəsi çəkiləcək. Zəfər Qurultayının məhz Şuşada keçirilməsi bu tədbirə xüsusi özəllik qatır. Qurultayda iştirak edən, etməyən hər bir azərbaycanlının bu günlərdə ürəyi Şuşada döyünəcək. Həqiqətən də bu, çox qürurverici bir hadisədir. Bununla da Şuşanın Azərbaycanın döyünən ürəyi olduğunu dünyaya nümayiş etdirmiş oluruq. Diaspora fəaliyyətimizin genişləndirilməsi, dünyanın bir çox böyük ölkələrində yaşayan azərbaycanlıların təşkilatlanması üçün Zəfər Qurultayının önəmi böyükdür. Həmin gün tariximizə qızıl hərflərlə yazılacaq”.