“Cənab Prezident İlham Əliyev prezident seçildikdə söylədiyi fikirlərdən biri ondan ibarət idi ki, “mən dünyanın hər bir yerində yaşayan azərbaycanlıların prezidentiyəm””.
Bu sözləri açıqlamasında Milli Məclisin deputatı Naqif Həmzəyev deyib.
“Həqiqətən də cənab Prezident öz fəaliyyəti müddətində bunu sübut etdi. Hər bir azərbaycanlının, Azərbaycan üçün çalışan, xidmət edən, özünü azərbaycanlı hesab edən vətəndaşın hüquqlarının qorunması üçün dövlətin resurslarını səfərbər etdi. Unutmamalıyıq ki, Azərbaycan müstəqillik qazandıqda ulu öndər Heydər Əliyevin diasporun formalaşması və güclənməsi üçün çox səyləri və vacib addımları var idi. Ulu öndər öz səfərləri zamanı diaspor nümayəndələri ilə görüşür, onların bir araya gəlməsi, birlik nümayiş etdirməsi və Azərbaycan həqiqətlərinin dünyaya çatdırılması üçün səfərbər olmasını təmin etmək üçün çox vacib işlər gördü. Bu ənənəni cənab Prezident İlham Əliyev çox uğurla davam etdirdi. Azərbaycanla bağlı həqiqətlərin dünyaya çatdırılmasında diaspor nümayəndələrinin, xaricdə yaşayan azərbaycanlıların çox böyük əməyi var. Xüsusilə də 44 günlük Vətən Müharibəsində Azərbaycanın haqq savaşının dəstəklənməsi və Azərbaycan həqiqətlərinin dünyaya çatdırılması dünya azərbaycanlılarının, soydaşlarımızın üzərinə çox böyük yük düşürdü. Mütəmadi olaraq diaspor nümayəndələri Azərbaycanda toplaşır, onların fəaliyyəti ilə bağlı strategiya, hədəflər formalaşdırılırdı”.
Deputat bildirib ki, artıq Vətən Müharibəsindən sonra yeni baxışlar, yeni strategiya, yeni tapşırıqlar hazırdır.
“Bu dəfə keçiriləcək qurultay çox önəmlidir. Çox qürurverici bir andır ki, diaspor nümayəndələri işğaldan azad olunmuş Azərbaycanın mədəniyyət paytaxtı, Türk dünyansının mədəniyyət paytaxtı Şuşa şəhərində toplaşacaqlar. Bu dəfə cənab Prezident İlham Əliyevin xüsusi yol xəritəsi diaspor nümayəndələrinə bildiriləcək və diaspor nümayəndələri Azərbayanın yaratdığı yeni reallıqlar fonunda, yeni strategiya əsasında öz işlərini quracaqlar. Bu gün biz əminliklə deyə bilərik ki, dünyanın hər bir yerində yaşayan azərbaycanlı qürur hiss keçirir, fəxarət hissi keçirir. Çünki biz torpaqlarımızı işğaldan azad etmişik, artıq biz ilkin hədəflərimizə nail olmuşuq. Bu gündən sonra isə, Azərbaycanın ən böyük hədəfi regionda öz gücünü və mövqeyini qoruyub saxlaması, Azərbaycanın dayanıqlı inkişaf strategiyasını yerinə yetirmək, dünya dövlətləri ilə Azərbaycanın münasibətlərinin yaxşılaşdırılması, Azərbaycan həqiqətlərinin dünya dövlətləri və xalqları tərəfindən qəbul edilməsidir. Bununla əlaqədar da həm dövlət nümayəndələri, həm də diaspor nümayəndələri və soydaşlarımız səfərbər olaraq birlikdə çalışmalıdırlar. Bu gündən sonra daha çox birlik, vəhdəd nümayiş etdirməli və cənab Prezidentin ətrafında sıx birləşməliyik”.