“Ulu Öndər Heydər Əliyev prezident olduğu dövrdə dünya azərbaycanlılarının toplantıları və qurultayları keçirilirdi. Bu baxımdan həmin dövrdən əsası qoyulmuş bir ənənə var. Daha sonra cənab Prezident İlham Əliyev də bu ənənəni yüksək səviyyədə davam etdirdi. Dünyanın hər yerində yaşayan azərbaycanlılar bir məqsədə, bir hədəfə, bir amala xidmət etmək və Azərbaycanın gücünə güc qatmaq üçün səfərbər olundular”. Bu sözləri açıqlamasında deputat Naqif Həmzəyev deyib.
Onun sözlərinə görə, cənab İlham Əliyev prezident seçildiyi zaman bildirdi ki, mən bütün azərbaycanlıların prezidentiyəm: “Cənab Prezident fəaliyyəti zamanı da hər zaman sübut etdi ki, həqiqətən də dünyanın hər bir yerində Azərbaycan adına çalışan, dövlətimizə xidmət edən və özünü azərbaycanlı hesab edən hər kəsə yaxındır və onların hüquqlarının qorunması üçün dövlətin gücünü, potensialını səfərbər edir. Biz bunun dəfələrlə şahidi olduq və şükürlər olsun ki, 44 günlük Vətən müharibəsində Azərbaycan bu müharibənin qalib oldu, torpaqlarımızı işğaldan azad etdik və bütün sərhərlərimiz boyu Azərbaycan Silahlı Qüvvələri yerləşdi, möhkəmləndi".
Deputat fikirlərinə davam edərək həmçinin qeyd edib ki, bu gün Azərbaycan regionun ən güclü dövlətlərindəndir və ölkəmiz yeni reallıqlar yarada bilib: “Bu dəfə təşkil olunan Dünya Azərbaycanlılarının V Qurultayı əvvəlkilərdən çox fərqlənir. Çünki biz qalib ölkənin vətəndaşlarıyıq. Həm 44 günlük Vətən müharibəsi zamanı, həm də ondan öncəki bir çox proseslərdə dünyanın müxtəlif yerlərində yaşayan Azərbaycan diasporunun nümayəndələri öz cəbhələrində savaşdılar, Azərbaycanın haqq səsini bütün dünyaya çatdırdılar və cənab Prezidentin siyasətini dəstəklədilər. Biz zəfərimizin ədalətli və ləyaqətli olduğunu dünyaya göstəririk. Dünya ictimaiyyəti də bunu qəbul edir. Biz bu gündən sonra daha güclü Azərbaycanın qurulması, formalaşması üçün səfərbər olmalıyıq. Düşünürəm ki, cənab Prezident bu qurultayda diaspor nümayəndələri qarşısında fərqli məqsədlər və missiya qoyacaq. Növbəti onilliklərdə bu strategiya əsasında öz fəaliyyətimizi quracağıq. Mən qurultaya öz işində uğurlar arzulayıram. Çox sevindirici haldır ki, dünya azərbaycanlıları artıq işğaldan azad olunmuş Azərbaycanın, türk dünyasının mədəniyyətinin paytaxtı olan Şuşada toplaşacaq və öz gözləri ilə həsrətlərində olduqları torpaqları görəcəklər”.