"1990-cı illərin əvvəllərində Azərbaycan ərazilərinin 20%-i Ermənistan tərəfindən işğal olundu. Bu münaqişənin həll olunması ilə əlaqədar ATƏT-in Minsk Qrupu yaradıldı". Bu sözləri açıqlamasında deputat Naqif Həmzəyev deyib.
Onun sözlərinə görə, təəssüflər olsun ki, ATƏT-in Minsk Qrupu BMT-nin 4 qətnaməsinin yerinə yetirilməsi və tərəflər arasında sülh müqaviləsinin imzalanması və Azərbaycan ərazilərinin işğaldan azad olunması ilə bağlı real heç bir iş görə bilmədi: "Yalnız münaqişə zonasına turistik səfərlər etdi. Faktiki olaraq ATƏT-in Minsk Qrupuna verilmiş mandat düzgün istifadə edilmədi və nəticəsiz olaraq qaldı. Təcavüzkar və işğalçı olan Ermənistana qarşı bir dəfə də olsun hansısa bir təzyiq və yaxud qadağalar tətbiq olunmadı, Ermənistanı pisləyən hər hansı bir bəyanat yayılmadı. Ancaq göründüyü kimi yaranmış bu vəziyyət cənab Prezident İlham Əliyevin bütün beynəlxalq platformalarda da dediyi kimi Azərbaycan bu məsələni öz gücü ilə həll etdi. Azərbaycan işğala son qoymaq üçün Ermənistanın növbəti hücumunun qarşısını aldı və əks həmlə hücumları nəticəsində bu problemin həllinə nail oldu. Rəşadətli ordumuz 44 günlük Vətən müharibəsində döyüşərək, vuruşaraq torpaqlarımızı işğaldan azad etdilər. Faktiki olaraq ATƏT-in Minsk Qrupunun artıq missiyası başa çatıb".
Deputat fikirlərinə davam edərək həmçinin qeyd edib ki, Avropa İttifaqının Azərbaycan ilə Ermənistan arasında sülh danışıqları prosesindəki fəaliyyəti alqışlanmalıdır. Bu baxımdan da keçirilən Moskva, Odessa, Brüssel görüşləri faktiki olaraq Azərbaycan və Ermənistan arasında sülh müqviləsinin imzalanmasına birbaşa olaraq xidmət edir. Son Brüssel görüşündə Şarl Mişelin verdiyi bəyanatdan da görünən odur ki, münaqişənin həlli ilə bağlı artıq müsbət nəticələr əldə olunub. Ermənistan Azərbaycanın təklif etdiyi 5 əsas prinsipi şərti qəbul edib. Cənab Prezident İlham Əliyevin 3 ayın yekunlarına dair hesabat toplantısında da səsləndirdiyi kimi ATƏT-in Minsk Qrupu ilə bağlı bir nəticə yoxdur. Bu nəticə sıfıra bərabərdir. Cənab Prezident İlıham Əliyevin rəhbərliyi altında biz çox böyük uğurlara imza atacağıq".