“Erməni deputatların Azərbaycan ərazilərinə qanunsuz səfərinin qarşısının alınması onu deməyə imkan verir ki, artıq, Rusiya sülhməramlı qüvvələri missiyalarını Azərbaycan tərəfi ilə koordinasiyalı şəkildə həyata keçirirlər. Azərbaycanın əldə etdiyi üstünlüklər, bölgədə əməliyyat prosesinə tam nəzarət yeni reallıqları şərtləndirən əsas cəhətlərdən biridir. Üstəlik, Ermənistan parlamentində qondarma rejiminin tribunaya yapışdırılmış “bayrağı”nın məhz deputatlar tərəfindən çıxarılması da onların mövcud reallığı qəbul etdiklərinə işarədir”.
Bunu açıqlamasında Milli Məclisin deputatı Naqif Həmzəyev deyib.
Deputat bildirib ki, Ermənistan hər ötən günün onların əleyhinə işlədiyini başa düşür: “Ona görə də Ermənistan tərəfi qısa müddətdə Azərbaycanla sülh müqaviləsinin imzalanmasına razılıq ifadə edib. Əks təqdirdə, qlobal məkanda baş verən münaqişə və müharibələr fonunda Ermənistanın dövlət olaraq daha ağır vəziyyətə düşmə ehtimalı yüksəkdir. Bugünkü şəraiti formalaşdıran isə, sözsüz ki, Azərbaycanın postmünaqişə dövründə həyata keçirdiyi uğurlu xarici və daxili siyasətdir. Prezident İlham Əliyevin ötən gün ilin birinci rübünün iqtisadi göstəriciləri ilə bağlı keçirdiyi müşavirədə səsləndirdiyi kimi, hətta sülh müqaviləsi imzalansa da, qonşularımızın erməni olduğunu qətiyyən unutmamalı, tariximizi çox yaxşı öyrənməliyik. İstənilən halda, Azərbaycan sülhün tərəfdarıdır. Regionda dayanıqlı barışığın mövcudluğu, şübhəsiz ki, iqtisadi inkişafa və dayanıqlı əməkdaşlığa xidmət edəcək”.