Azərbaycan Brüsseldə növbəti diplomatic qələbəsini qazandı.
Bunu istər müzakirələrdə, istərsə də Avropa İttifaqı Şurasının prezidenti Şarl Mişelin səsləndirdiyi yekun bəyanatda görmək olur. Digər tərəfdən, Azərbaycan və Ermənistan arasında imzalanması nəzərdə tutulan sülh razılaşması üçün yeni bir proses yarandı.
Belə ki, Prezident İlham Əliyevin görüşləri və apardığı danışıqlar nəticəsində postmüharibə dövründə yeni format - Brüssel sülh gündəliyi yarandı. İlk üçtərəfli görüş 2021-ci il dekabrın 14-də keçirilib, bununla da Prezident İlham Əliyev və Şarl Mişel tərəfindən Brüssel sülh gündəliyinin əsası qoyulub. Proseslərin davamı və inkişafı olaraq tərəflər arasında intensiv təmaslar, telefon danışıqları olub.
Nəticə isə 6 aprel Brüssel görüşündə özünü açıq şəkildə büruzə verdi.
Deputat Nafiq Həmzəyev açıqlamasında deyib ki, Azərbaycan Prezidenti cənab İlham Əliyevin uğurlu daxili və xarici siyasəti nəticəsində Ermənistanla sülh razılığının əldə olunması ilə bağlı yeni gündəlik formalaşdı:
“Azərbaycan ilk gündən öz şərtlərini açıq-aşkar bəyan edib. Ermənistanın 10 noyabrda imzalanmış üçtərəfli Bəyanatın müddəalarının həyata keçirməsi üçün siyasət aparılıb. Çünki bu müddəaları Ermənistan tərəfi tam olaraq anlamırdı. Ermənistan vaxt udmaq, prosesləri öz xeyrinə dəyişmək istəyirdi. Amma cənab Prezidentin apardığı uğurlu daxili və xarici siyasət nəticəsində Ermənistanı danışıqlar masasına oturmağa məcbur etdi. Brüssel gündəliyinin formalaşması da bu proseslərin davamı kimi dəyərləndirilməlidir. Ən əsası isə odur ki, həm birinci, həm də ikinci Brüssel görüşündə gündəliyi cənab Prezident İlham Əliyev müəyyənləşdirib. İkinci Brüssel görüşündən öncə də Azərbaycan tərəfinin Ermənistana 5 əsas bənddən ibarət şərtləri təqdim etməsi onu deməyə əsas verir ki, bu, Qərb institutlarının da dəstəklədiyi platformadır. Buna heç kim qarşı çıxa bilməz. Qalib ölkə olan Azərbaycanın sülhü dəstəkləməsi də Avropa İttifaqı tərəfindən yüksək qiymətləndirilir”.
Deputat əlavə edib ki, Moskva və ya Qərb moderatorluğundan asılı olmayaraq, danışıqlarda Azərbaycanın gündəliyi eynidir:
“Azərbaycan sülh istəyir. Azərbaycan sərhədlərinin tanınmasına, kommunikasiya xətlərinin bərpasına, Zəngəzur dəhlizinin açılmasına, sülhməramlıların nəzarətində olan ərazilərdən erməni silahlılarının çıxarılmasına və regionada daimi sülhə nail olmaq istəyir. Göründüyü kimi, Azərbaycan moderatorluq edən hər iki tərəflə bərabər məsafəni qoruyub saxlaya bilir. Azərbaycan prosesləri soyuqqanlılıqla idarə edir. Brüssel görüşləri zaman da Avropa İttifaqı Şurasının prezidenti Şarl Mişel əvvəlcə tərəflərlə ayrılıqla görüş keçirdi. Daha sonra isə ikitərəfli görüş keçirildi və bu görüş 5 saata yaxın davam etdi. Bu, onu deməyə əsas verir ki, görüş çox məhsuldar olub. Azərbaycan öz şərtlərini bir daha diqtə edib. Ancaq bununla yanaşı hələ də razılaşdırılmayan məqamlar var.
Çünki Ermənistan bu görüşə böyük ümidlərlə gəlirdi. Onlar ümid edirdi ki, Qarabağda qanunsuz yaşayan ermənilərin hüququ məsələsini gündəliyə gətirib yekun bəyanata sala biləcəklər. Amma erməni mətbuatı və siyasilərin fikirləri ilə tanış olanda belə qənaət yaranır ki, Ermənistan tərəfi bu görüşdən narazıdır. Çünki Şarl Mişelin səsləndirdiyi yekun bəyanatda “Dağlıq Qarabağ” ifadəsi işlədilmir, ATƏT-in Minsk qrupunun adı çəkilmir. Bir sözlə, bu görüş də Azərbaycan diplomatiyasının və cənab Prezident İlham Əliyevin növbəti uğuru kimi dəyərləndirilməlidir. Sülhə gedən bu çətin və ağır yolda biz növbəti uğurlu addımı atmışıq. Hər bu cür uğurlu görüş prosesləri daha da möhkəmləndirir və sürətləndirir.
Ermənistanda hansısa qeyri-adi proseslərin baş verməyəcəyi təqdirdə düşünürəm ki, Avropa İttifaqının vasitəçiliyi, eyni zamanda Rusiya və ABŞ-ın yaxından iştirakı ilə biz sülhə nail ola biləcəyik. Azərbaycan və Ermənistan arasında sülh anlaşması yaxın gələcəkdə imzalanacaq. İstənilən halda Ermənistan bu prosesi uzatmağa çalışsa da, Azərbaycan yeritdiyi daxili və xarici siyasət nəticəsində Ermənistanı bu prosesə məcbur edəcək”.