"2018-ci il aprel ayının 11-də növbədənkənar keçirilən prezident seçkilərində Azərbaycan Respublikası Prezidenti postuna keçirilən sayca səkkizinci rəsmi seçki oldu. Bu seçki marafonunda 8 namizəd iştirak etdi. Cənab Prezident İlham Əliyev seçicilərin 86% səsini qazanaraq bir daha Azərbaycan Respublikasının Prezidenti seçildi". Bu sözləri açıqlamasında deputat Naqif Həmzəyev deyib.
Onun sözlərinə görə, cənab Prezident İlham Əliyevin prezidentlik dövründə xalqın inamını qazanması, dövlətçilik əsaslarının ciddi şəkildə möhkəmləndirə bilməsi, dövlətin gücləndirilməsi, möhkəmləndirilməsi istiqamətində ciddi işlər apardı: "Bununla yanaşı cənab İlham Əliyevin rəhbərliyi dövründə beynəlxalq müstəvidə mövqemiz xeyli dərəcədə gücləndi. İnsan amili, xalqın rifahı və milli maraqlar dövlət siyasətinin strateji prioritetlərindən biri oldu. Seçkilər həm beynəlxalq, həm yerli təşkilatlar tərəfindən müşahidə edilirdi. Seçkilər çox ədalətli, şəffaf və demokratik mühitdə keçirilib.
2003-2018-ci illər ərzində Prezident İlham Əliyevin rəhbərliyi altında həyata keçirilən xarici siyasət və bunun nəticəsində BMT, Avropa Şurası, NATO və digər nüfuzlu beynəlxalq təşkilatlarla Azərbaycan əlaqələri çox gücləndi. Ölkə başçısı həmişə təşkilat və təşkilat rəhbərləri tərəfindən hörmətlə qarşılanıb. Azərbaycan ərazi bütövlüyünün bərpası üçün çox mühüm sənədlərin qəbul edilməsi və Azərbaycanın ərazi bütövlüyünün dəstəklənməsinin şahidi olduq.
Bildiyimiz kimi iqtisadi yüksəliş cənab Prezident İlham Əliyevin dövründə çox böyük nəzərə çarpdı. 2003-2018-ci illərdə ümumi daxili məhsul 3,2 dəfə, büdcə gəlirləri isə 13,5 dəfə artdı. Ölkəmizin strateji valyuta ehtiyatları 26,6 dəfə çoxaldı. Maliyyə imkanlarımız əsaslı şəkildə yaxşılaşdı. Xarici ticarət dövriyyəsi 4,6 dəfə, ixracın həcmi isə 6 dəfə artdı. Regionlarda ümumi məhsul buraxılışı artımı 3,6 dəfəyə bərabər oldu. Əhalinin nominal gəlirləri 8,6 dəfə, minimum əmək haqqı isə 12,9 dəfə artdı. Ümumilikdə cənab Prezidentin 2003-2018-ci illərdəki rəhbərlik dövründə Azərbaycanın iqtisadi yüksəlişi müşahidə edildi. Bu da istər-istəməz 2018-ci ildə keçirilən növbədənkənar seçkilərdə cənab Prezident İlham Əliyevin xeyrinə vətəndaşlarımızın səslərini verməsinə birbaşa təsir göstərdi. Bununla yanaşı sosial infrastruktur inkişaf etdi, 3100-dən çox məktəb və 600-dən çox xəstəxana tikildi. Ümumilikdə regionların sosial-iqtisadi inkişafına 2018-ci ildə böyük önəm verildi. Bu da istər-istəməz paytaxt və regionların bərabər şəkildə inkişaf etməsinə səbəb oldu.
Göründüyü kimi 2003-2018-ci illərdə çox böyük işlər görülmüş və Azərbaycan həm iqtisadi, həm siyasi, həm də diplomatik cəhətdən çox böyük inkişaf yolu keçmişdir. Nəticə etibarilə Azərbaycan bu dövrdə özünün ən qüdrətli ən inkişaf etmiş dövrlərini yaşayıb. Bütün bu əldə olunan nəticələr cənab Prezidentin 2018-ci ildə növbəti dəfə keçirilən prezident seçkilərində qalib olmasına səbəb olub. 2018-ci ildə keçən müddət ərzində biz bir daha şahidi olduq ki, cənab Prezidentə səs verməklə çox düzgün hərəkət etmişik. Arxada qalan 4 il müddət ərzində cənab Prezident verdiyi bütün vədləri yerinə yetirmişdir.
Bir sözlə 2018-ci il 11 aprel tarixində keçirilən növbədənkənar prezident seçkilərində Yeni Azərbaycan Partiyasının namizədi və partiyanın sədri cənab İlham Əliyevin qalib gəlməsi növbəti uğurumuzun təzahürü idi".