Şuşa şəhəri 2023-cü ildə Türk Dünyasının Mədəniyyət Paytaxtı elan olunub. TÜRKSOY Daimi Şurasının ötən həftə Bursa şəhərində keçirilən növbədənkənar iclasında bununla bağlı qərar qəbul edilib.
Şuşanın Türk Dünyasının Mədəniyyət Paytaxtı seçilməsinin əhəmiyyəti barədə Modern.az-a danışan deputatlar TÜRKSOY-un qərarını yüksək qiymətləndiriblər.
Prezident İlham Əliyevin sərəncamı ilə 2022-ci ilin Şuşa ili elan edildiyini xatırladan deputat Naqif Həmzəyev söyləyib ki, torpaqlarımız işğaldan azad edildikdən sonra məhz 2021-ci ildə Şuşada möhtəşəm tədbirlər, festivallar keçirildi. Azərbaycana təşrif buyuran qonaqlar bu tədbirlərdə iştirak etdilər.
“Faktiki olaraq, bütün dünya qısa müddətdə Azərbaycanın Şuşanı cənnət məkana çevirmək üçün təxirəsalınmaz tədbirlər gördüyünün şahidi oldu. Bu il də diqqətlər Şuşanın üzərindədir. Çünki 2022-ci il Şuşa ili elan edilib, ona görə bu şəhərdə bir-birindən maraqlı tədbirlərin keçirilməsi, mədəniyyət ocaqlarının təməlinin qoyulması, açılışı planlaşdırılır. Bütün bu tədbirlərin fonunda daha bir xoş xəbər aldıq. Şuşa Türk Dünyasının Mədəniyyət Paytaxtı elan edildi. Bu, onu deməyə imkan verir ki, gələn il də Şuşada önəmli mədəni tədbirlərin şahidi olacağıq. Elm və mədəniyyət xadimləri, musiqiçilər Şuşada bir araya gələcəklər, Şuşa mədəniyyət və turizm mərkəzinə çevriləcək. Şuşanın tarixi-mədəni siması özünə qaytarılacaq, tamamilə yenilənəcək. Biz isə qürur duyacağıq ki, ölkəmizə gələn önəmli şəxslər, dünyaca tanınmış simalar şəhərimizi yaxından tanıyacaqlar. O zamana qədər keçmiş məcburi-köçkünlərimizin bir hissəsi dədə-baba yurdlarına qayıdacaq. Şuşanın mədəniyyət paytaxtı olmasını bütün türk dünyası bizim zəfərimizin 3 ili kimi qeyd edəcək.
Şuşanın işğaldan azad edən Azərbaycanın rəşadətli ordusuna, şəhidlərimizə və qazilərimizə borcluyuq. Bu Zəfərin nə demək olduğunu çox gözəl anlayırıq. Azərbaycan torpaqlarını işğaldan azad edən Ali Baş Komandan tarix yazdı.
Ümid edirik ki, 2023-cü ilə qədər Zəngəzur dəhlizi də işə düşəcək və qardaşlarımız Türkiyədən Azərbaycana quru yolu ilə, hətta öz fərdi avtomobilləri ilə gələcəklər. Türk dünyası üçün Zəngəzur dəhlizi körpü rolu oynayacaq, bizi birləşdirəcək”, - deputat vurğulayıb.
Deputat Əziz Ələkbərli bildirib ki, Şuşa bütün dövrlərin mədəniyyət mərkəzi kimi imicini qoruyur:
“2021-ci ilin yanvarın 5-də Azərbaycan Respublikasının Prezidenti İlham Əliyev Anar Kərimovu mədəniyyət naziri təyin olunması ilə əlaqədar videoformatda qəbul edərkən “Mən Şuşa şəhərini Azərbaycan mədəniyyətinin paytaxtı elan edirəm. Şuşa şəhəri buna layiqdir. Hesab edirəm ki, nəinki Azərbaycanın, bölgənin mədəni paytaxtı sayıla bilər”, – dedi. Həmin il mayın 7-də cənab Prezident “Şuşa şəhərinin Azərbaycanın mədəniyyət paytaxtı elan edilməsi haqqında” Sərəncam imzaladı. 5 yanvar 2022-ci il tarixdə isə Cənab Prezidentin Sərəncamı ilə 2022-ci il Şuşa ili elan edildi. İndi Şuşa şəhəri 2023-cü il üçün Türk Dünyasının Mədəniyyət Paytaxtı seçilib.
Deputat hesab edir ki, bütün bunlar təsadüfi deyil. Şuşa bizim ərazilərimizin 30 illik işğalına son qoyan Zəfərimizin, milli qürurumuzun, milli ləyaqətimizin bərpasının şəhəridir:
“Bu il Şuşa şəhərinin 270 illiyidir. Şuşa Azərbaycan mədəniyyət tarixinə elə möhtəşəm töhfələr, şəxsiyyətlər verib ki, biz onu Azərbaycanın bütün dövrlər üçün mədəniyyət mərkəzi hesab edirik. Şuşa eyni zamanda türk və dünya mədəniyyətinə böyük töhfələr verib, şəhər olaraq türk və dünya mədəniyyətinin nadir incilərindən biridir. Ona görə də Şuşanın 2023-cü il üçün Türk Dünyasının Mədəniyyət Paytaxtı elan olunması tamamilə doğru qərardır və hesab edirəm ki, bu, Azərbaycan həqiqətlərinin dünya ictimaiyyətinə obyektiv çatdırılmasında öz müstəsna rolunu oynayacaq. Dünya bir neçə min illlik tarixə malik olan Azərbaycan mədəniyyəti ilə heç bir tarixi kökü olmayan hibrid, erməni “mədəniyyətini” müqayisə etmək imkanı qazanacaqdır”.
Deputat Azər Badamov isə qeyd edib ki, Şuşa Cənubi Qafqazın mirvarisi, Azərbaycanın baş tacıdır:
“Təəssüf ki, ermənilər işğal altında saxladıqları 28 ildə digər ərazilərimiz kimi Şuşanı da dağıdıb, vandalizmə məruz qoyaraq, şəhərin azərbaycanlılara məxsusluğunu silməyə çalışıblar. Amma ermənilər nə qədər çalışsalar da Şuşa şəhərində mədəniyyətimizi və tarixi məxsusluğumuzu silə bilmədilər. Çünki Şuşanın hər bir daşında, hər bir abidəsində Azərbaycanın milli mədəniyyətinin notları həkk olunub və bu izləri silmək qeyri-mümkündür. İşğaldan azad olunmasından keçdiyi qısa bir zaman kəsiyində Şuşaya milli ruh qayıtdı və əvvəlki kimi Cıdır düzündə, Vaqif məqbərəsinin önündə mədəni kütləvi tədbirlərin yenidən keçirilməsinə başlanıldı. Şuşa bizim üçün müstəsna əhəmiyyətli şəhərdir. Cənab Prezident Şuşanı mədəniyyət paytaxtımız elan edib. O cümlədən İSESKO da Şuşanın İslam dünyasının mədəniyyət paytaxtı elan olunması üçün təşəbbüs irəli sürüb. 3 gün əvvəl isə Türkiyənin Bursa şəhərində keçirilən TÜRKSOY Daimi Şurasının İclasında Şuşa 2023-cü ildə Türk Dünyasının Mədəniyyət Paytaxtı elan olunub".
Deputatın fikrincə, Şuşanın Türk Dünyasının Mədəniyyət Paytaxtı seçilməsi bu tarixi-mədəni şəhərin həyatı üçün əhəmiyyətli olacaq:
"Türk dünyasının mədəniyyət paytaxtı kimi Şuşada 2023-cü ildə türk dövlətlərinin birgə müxtəlif mədəni-kütləvi tədbirləri keçiriləcək. Bu tədbirlərdə iştirak etmək üçün Şuşaya çoxlu qonaqlar gələcək. Qonaqların tərkibində mədəniyyət adamları, siyasətçilər, tarixçilər olacaqlar ki, onlar Şuşada və işğaldan azad olunmuş digər ərazilərimizdə ermənilərin törətdikləri vandallıqları, məscidlərimizin təhqir olunmasını görməklə əsl reallığın şahidi olacaqlar. Şuşanın əsası 270 il əvvəl Pənahəli xan tərəfindən qoyulub. Bu şəhərdə ermənilərə xas olan heç nə yoxdur. Bu il və gələn il keçirilən mədəniyyət tədbirləri Şuşa qapılarının türk dünyası üçün yenidən açılması deməkdir. Şuşa azaddır və dünyanın hər bir qitəsindən qonaqları qəbul etməyə hazırdır. Azərbaycanlılar ermənilərdən fərqli olaraq qonaqpərvər xalqdır. Şuşa şəhəri də bundan sonra öz qonaqpərvərliyi və qəbul etdiyi çoxlu qonaqları ilə daha xoşbəxt olacaq”.