"Hazırda Avropa qitəsində fəlakət yaşanır. Bu fəlakət iki slavyan xalq arasında baş verir. Dünya gücləri Ukraynaya müəyyən dəstək və yardımlar etsələr də, faktiki olaraq Ukraynaya hərbi dəstək verməyə çəkinirlər". Bu sözləri SİA-ya açıqlamasında deputat Naqif Həmzəyev deyib.
Onun sözlərinə görə, müharibənin başladığı ilk gündən həm Azərbaycan, həm də Türkiyə Ukrayna və Rusiya ilə münasibətlərini yaxşı saxlamağa, müharibənin sülhlə əvəz olunmasına dair öz töhfələrinin verməkdədirlər: "Ukrayna Prezidenti Volodimir Zelenski dəfələrlə həm Türkiyə Prezidenti Rəcəb Tayyib Ərdoğana, həm də Azərbaycan Prezidenti İlham Əliyevə təşəkkürlərini bildirib. Bildiyimiz kimi Volodimir Zelenski Rusiya ilə danışıqlara başlamamışdan öncə təklif etdiyi bir neçə şəhərlər var idi. Həmin şəhərlər arasında Azərbaycanın, Türkiyənin və Polşanın da şəhərləri var idi".
Deputat sözlərinə davam edərək həmçinin qeyd edib ki, bu danışıqlar ilkin olaraq Belarusda keçirildi: "Daha sonra isə Türkiyədə keçirilən Antalya Diplomatik Forumunda ilk dəfə olaraq Ukrayna və Rusiya xarici işlər nazirlərinin görüşləri baş tutdu. Bu görüşdən faktiki olaraq bir nəticə əldə olunmasa da, növbəti görüşlər üçün müsbət bir addım kimi qiymətləndirilir. Bir neçə gün öncə Türkiyənin İstanbul şəhərində tərəflər arasında növbəti danışıqlar baş tutdu. Görüşdən öncə Türkiyə prezidenti Rəcəb Tayyib Ərdoğan nümayəndə heyətləri ilə görüşdü və tərəfləri sülhə dəvət etdi. Görüşlərin çox gərgin keçəcəyi hər kəsə məlum idi. Birbaşa danışıqlar tamamilə sülhə gətirib çıxartmasa da, müəyyən razılıqlar əldə edildi. Bu razılıqların nəticəsində Kiyev və digər şəhərlərdə Rusiya hərbi əməliyyatları zəiflətməyi öhdəliyinə götürdü. Həmçinin kolidorların açılması, dinc əhalinin bu humanitar kolidorlardan istifadəsi təmin edildi. Ukrayna NATO-ya üzv olmayacağanı bildirdi. Bir sözlə, bu görüş hər iki tərəfi faktiki olaraq razılıq sənədinin imzalanmasına daha da yaxınlaşdırdı. Göründüyü kimi Türkiyə hazırda diplomatiya mərkəzinə çevrildi. Biz Türkiyənin bu mövqeyini alqışlayırıq. Türkiyənin də dəstəyi və birbaşa iştirakı ilə bu danışıqların sülhlə nəticələnəcəyini ümid edirik".