“Azərbaycan müstəqillik qazandığı dövrdən başlayaraq İslam Əməkdaşlığı Təşkilatı ilə ciddi əlaqələr qurub. Son 15 il ərzində bu əməkdaşlıq ən yüksək səviyyəsinə çatıb. İslam Əməkdaşlıq Təşkilatı Xarici İşlər Nazirləri Şurasının “Birlik, ədalət və inkişaf naminə tərəfdaşlığın qurulması” mövzusunda keçirilən sessiyasında Ermənistanın təcavüzü və Xocalı soyqırımı ilə bağlı 4 qətnamənin qəbul edilməsi Azərbaycan diplomatiyasının növbəti uğuru kimi qiymətləndirilməlidir. Bu fəaliyyət mütləq davam etdirilməli və Ermənistan tərəfindən törətdilən əməllərə görə məsuliyyətə cəlb olunmalar təmin edilməlidir. Həmin cinayətləri törədənlər beynəlxalq məhkəmələr qarşısında cavab verməlidirlər. Belə olan halda, haqq-ədalət öz yerini tapacaq”.
Bunu açıqlamasında Milli Məclisin deputatı Naqif Həmzəyev deyib.
Deputat qeyd edib ki, İslam Əməkdaşlıq Təşkilatı Azərbaycanın ərazi bütövlüyünü dəstəkləyir və həmin təşkilata üzv olan dövlətlər Azərbaycana dəstəK nümayiş etdirirlər: “Azərbaycan bu təşkilatın aparıcı dövlətlərindən biridir. Ölkəmizin bu təşkilatdakı yeri və önəmi böyükdür. Azərbaycan postmünaqişə dövründə Ermənistanın Azərbaycana qarşı törətdiyi təcavüz və soyqırımlarda dəymiş ziyanla bağlı bütün məsələləri araşdırır və beynəlxalq platformalarda Ermənistana təzyiq göstərilməsi və onların ədalət məhkəməsi qarşısında cavab verməsi, gələcəkdə Ermənistan və digər dövlətlər tərəfindən belə xoşagəlməz hadisələrin təkrarlanmaması üçün diplomatik fəaliyyətini davam etdirir. Faktiki olaraq, Azərbaycan işğaldan azad edilmiş ərazilərdə yenidənqurma və bərpa işlərini həyata keçirsə də, biz ermənilərin törətdiyi əməlləri qətiyyən unutmamalıyıq. Azərbaycanla Ermənistan arasında, hətta sülh sazişi imzalanacağı təqdirdə belə, keçmişi unutmamalı və Ermənistanın əməllərinə görə cavab verməsini, Azərbaycana dəymiş ziyanın qarşılanmasını təmin etməliyik”.