Hər addımında dövlətin, xalqın maraqlarını üstün tutan, sözlə əməl birliyini, monolitliyini daim qoruyan Yeni Azərbaycan Partiyası dünyanı lərzəyə salan qlobal təhlükəyə qarşı mübarizəyə qoşuldu və ölkə Prezidentinin tapşırığı əsasında Azərbaycan hökumətinin həyata keçirdiyi tədbirləri dəstəklədi.
Bunu YAP Gəncə şəhər təşkilatının sədri, millət vəkili Naqif Həmzəyev bildirib. Millət vəkili qeyd edib ki, Azərbaycan Pespublikasının Prezidenti İlham Əliyevin 19 mart tarixli sərəncamı ilə yaradılan “Koronavirusla Mübarizəyə Dəstək Fondu”na 200 min manat məbləğində vəsait ödəyən Yeni Azərbaycan Partiyası partiyanın bütün yerli strukturlarına və üzvlərinə “Koronavirusla Mübarizəyə Dəstək Fondu”na imkanları daxilində dəstək göstərməyi tövsiyə edib.
Tutduğu yola sadiqliyi, populizmdən uzaq olan hakim partiya eyni zamanda “Sağlamlığımız milli həmrəyliyimizdədir” adlı aksiya da başladıb. Partiyanın rayon və şəhər təşkilatları, fəal üzvləri koronavirusun ölkə ərazisində yayılmasına qarşı həyata keçirilən operativ profilaktik və mübarizə tədbirlərinə qoşulub, maarifləndirmə işində fəallıq göstərirlər.
Partiya üzvləri ölkəmizdə infeksiyanın yayılmasının qarşısını almaq məqsədi daşıyan profilaktik tədbirlərə əhalinin də dəstək verməsi, sosial həmrəylik nümayiş etdirmələri üçün bütün imkanlardan istifadə edirlər. Sosial şəbəkələrdə, yaşadıqları ərazilərdə, qohum-tanışlar arasında virusdan qorunmağın yolları barədə tövsiyələr verməklə görülən işlərin daha səmərəli nəticə verməsinə töhfələrini verirlər.
Partiyanın respublikada həyata keçirilən sosial izolyasiya tədbirlərinə dəstək olmaq məqsədi ilə keçirilən nəcib aksiyasına qoşulan YAP Gəncə şəhər təşklatının fəalları tərəfindən aztəminatlı ailələrin üzvlərinə tibbi spirt, maska və əlcəklər paylanıb. Onlar həmçinin vətəndaşlara bir daha gigiyena qaydalarına riayət olunmasının əhəmiyyətini çatdırıb, özlərinin və yaxınlarının müəyyən edilimiş qayda və tövsiyələrə əməl edərək sağlamlıqlarını qorumalarının vacibliyini xatırladıblar.
Bütün müasir dünyamızı cənginə alan təhlükədən uzaq olmaq üçün hər kəs ölkə Başçısına koronavirusa qarşı mübarizədə dəstək olmalı, Operativ Qərargahın qoyduğu qaydalara ciddi əməl etməlidir.
İnanırıq ki, ölkəmiz Azərbaycan Prezidenti İlham Əliyevin vətəndaşlarımızı qorumaq üçün apardığı tədbirlər sayəsində bəşəriyyətin sınağına çevrilən koronavirus təhlükəsindən alnıaçıq çıxacaq.