44 günlük Vətən müharibəsində şəhid olmuş mayor Muxtarov Sərxan İlqar oğlunun yaşadığı evdə barelyefinin açılışı olub.
Açılış mərasimində şəhidin ailə üzvləri, Yeni Azərbaycan Partiyası Gəncə şəhər təşkilatının əməkdaşları, Nizami və Kəpəz rayon bələdiyyələrinin sədrləri, şəhidin yaxınları, dostları və ictimaiyyət nümayəndələri iştirak ediblər.
Mərasimdə Prezident, Müzəffər Ali Baş Komandan İlham Əliyevin rəhbərliyi ilə qazanılan Qələbədə şəhid olan əsgərlərimizin cəsarətindən danışılıb, Vətən qarşısında öz borclarını ləyaqətlə yerinə yetirənlərin xatirəsinin xalqımız tərəfindən daim əziz və uca tutulacağı söylənilib.
Şəhidin yaxınları onun haqqında xatirələrini, igidliyi, şücaəti barədə danışıblar. Şəhid ailələrinin, qazilərimizin hər zaman olduğu kimi Prezident İlham Əliyevin və Birinci vitse-prezident Mehriban Əliyevanın diqqət və qayğısı ilə əhatələndiyi qeyd edilib, göstərilən diqqətə, qayğıya görə dərin minnətdarlıqlarını bildiriblər.
Sonra barelyefin açılışı olub, önünə tər gül dəstələri düzülüb.
Şəhid Sərxan Muxtarovun ailəsi onlara göstərilən diqqət və qayğıya görə Müzəffər Ali Baş Komandan İlham Əliyevə, Birinci vitse-prezident Mehriban xanım Əliyevaya təşəkkürünü bildirib.
Qeyd edək ki, Azərbaycan Silahlı Qüvvələrinin mayoru, Vətən müharibəsi iştirakçısı Sərxan Muxtarov Heydər Əliyev adına Azərbaycan Ali Hərbi Məktəbində təhsil alıb. Vətən müharibəsi dövründə Müdafiə Nazirliyinin müxtəlif hərbi hissələrinin tərkibində Ağcabədi, Ağdam, Qazax, Qubadlı və Sərhəd Qoşunlarında hərbi xidmətdə olub, qəhrəmancasına döyüşüb. Mayor Sərxan Muxtarov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib. Füzulinin, Cəbrayılın, Qubadlının, Laçının və Zəngilanın azadlığı uğrunda gedən döyüşlərdə vuruşub. Müharibə bitdikdən sonra Qubadlı rayonunda xidmətini davam etdirən tabor komandiri Sərxan Muxtarov 2021-ci il yanvarın 12-də vəzifə başında minaya düşərək şəhidlik zirvəsinə ucalıb.
Muxtarov Sərxan İlqar oğlu Azərbaycan Prezidenti İlham Əliyevin Sərəncamına əsasən ölümündən sonra "Vətən uğrunda" medalı ilə təltif edilib.
