Məlum olduğu kimi, Cənubi Qafqazda daimi sülh və sabitliyin yaradılmasına xidmət edən "3+3” formatındakı regional əməkdaşlıq platformasının ilk iclası dekabrın 10-da Moskvada keçiriləcək. İclasda Azərbaycan, Türkiyə, Rusiya, İran və Ermənistan XİN başçılarının müavinləri görüşəcək.
Sözügedən görüşün əhəmiyyəti barədə Sfera.az-a danışan deputat Naqif Həmzəyev "3+3" platformasının reallaşması ilə Azərbaycanın bütün istəklərinə çata biləcəyini deyib:
"Azərbaycan ilk gündən etibarən "3+3" platformasını dəstəkləyir və əməkdaşlığa hazır olduğunu bildirir. Bu platforma məlum olduğu kimi ilk başlarda bəzi qonşu ölkələr tərəfindən dəstəklənmədi, etirazlar oldu. Lakin yekun olaraq Azərbaycanın postmünaqişə formatında həyata keçirdiyi siyasət bu platformanın reallaşması əhəmiyyətini artırır. Bu gün Azərbaycan Şərqlə Qərbin, Şimalla Cənubun birləşdiyi, tranzit mərkəzində yerləşir. Lakin Zəngəzur dəhlizinin işə keçməsi ilə region dövlətlərinin də daha çox fayda götürəcəyini deyə bilərik. Bu baxımdan platformanın ilk iclası çox önəmlidir. Bu platformada ən çox xeyir görən tərəf isə Azərbaycan olacaq və yaxın gələcəkdə bütün istəkləri reallaşdırmaq mümkündür. Düşünürük ki, yaxın illərdə Gürcüstan da bu platformada olacaq".
Politoloq Qabil Hüseynli isə platformanın reallaşmayacağını da istisna etməyib:
"Sözügedən formatın harada yerləşəcəyi, hansı məsələlər üzrə işlərin aparılması və texniki məsələlər aydınlaşmalıdır. Ola bilər ki, tərəflər bəzi təkliflərlə razılaşmasın və platformanın reallaşması alınmasın. Format yenidir və gözləmək lazımdır ki, məsələ necə sonlanacaq. Rusiya sözügedən platformanı bəyəndiyini elan etsə də, özünün moderatorluğu ilə prosesləri tənzimləmək istəmir. Baxışlar müxtəlifdir və bəzən üzdə bir sözü deyirlər, arxada başqa cür hərəkət edirlər. Ona görə deyə bilmirəm ki, təşkilatın təşəbbüsü ilə regionda sülh yaranması mümkün olacaq ya yox..."