“Azərbaycan ordusu Qarabağı işğaldan azad etdi və ərazi bütövlüyünün bərpasına nail oldu. Postmuharibə dövründə Qarabağa qayıdışı ən çox ləngidən iki amil var. Bunlardan birincisi həmin ərazilərin ermənilər tərəfindən talan edilməsi, bütün kənd və şəhərlərdəki evlərin, infrastruktur layihələrinin darmadağın edilməsi, ikincisi isə işğaldan azad edilmiş torpaqların minalarla dolu olmasıdır. Təəssüflər olsun ki, mina xəritələrinin Azərbaycana təhvil verilməsi uzadıldı və həmin ərazilərdə həyatın bərpası da məhz buna görə müəyyən qədər ləngidi”.
Bunu Pravda.az-a açıqlamasında Milli Məclisin deputatı Naqif Həmzəyev deyib.
N.Həmzəyev bildirib ki, ötən müddət ərzində Qarabağda Prezident İlham Əliyevin rəhbərliyi altında quruculuq və abadlıq işləri sürətlə həyata keçirilir və Qarabağa qayıdış proqramı icra edilir: "Nəzərə almaq lazımdır ki Ermənistanın Azərbaycan təhvil verdiyi mina xəritələrinin cəmi 25 faiz doğru olduğu müəyyən edilib. Lakin minalarin təmizlənməsi prosesi isə olduqca uzun və riskli prosesdir. Digər ərazilərin də mina xəritələri bizə təqdim edildi, çünki onlar buna məcbur idilər. Beynəlxalq Ədalət Məhkəməsi bununla əlaqədar Ermənistana xüsusi cəza verə bilərdi, ona görə də ermənilər həmin xəritələri tələsik olaraq bizə təhvil verdilər. Təəssüflər olsun ki, araşdırmalar göstərir ki, ötən həftə təqdim edilən mina xəritələrinin də doğruluğu şübhə doğurur, çünki onların hazırlanma forması və qeydlər reallığa tam uyğun deyil. Hər zaman terrordan qidalanan ermənilərin mina xəritələrinin verməməsi də növbəti terror aktıdır. Bu gün iki nəfər azərbaycanlı da ermənilərin mina terrorunun qurbanı olub. Həmin minalar "sürpriz minalar" adlanır və diversiya hərəkətlərində istifadə edilir. Bu, ermənilərin xisləti və niyyəti ilə birbaşa üst-üstə düşür. İstənilən halda, Ermənistan prosesi ləngitməyə çalışsa da, Azərbaycan qonşu dövlətlərin də köməyi ilə əraziləri minalardan tamamilə təmizləyəcək və Qarabağa qayıdışı bərpa edəcək. Unutmasınlar ki, Ermənistanın bu cinayət əməli cavabsız qalmayacaq. Terror siyasətini həyata keçirən Ermənistanın hərbi və siyasi rəhbərliyi öz cəzasını mütləq almalıdırlar".