Naqif Həmzəyev: Azərbaycanın COVID-19-a qarşı qlobal mübarizəsi dünya ictimaiyyəti tərəfindən hər zaman müsbət dəyərləndiriləcək
“Bildiyimiz kimi, 2020-ci ildən başlayaraq bütün dünya COVID-19 pandemiyası ilə mübarizə aparmaq məcburiyyətində qaldı. Prezident İlham Əliyevin rəhbərliyi ilə Azərbaycan da bu ümumbəşəri bəlanın fəsadlarını aradan qaldırmaq, xalqın sağlamlığını və təhlükəsizliyini qorumaq istiqamətində silsilə tədbirlər həyata keçirdi.”
Bu fikri Milli Məclisin deputatı Naqif Həmzəyev “İki sahil”ə açıqlamasında söylədi.
N.Həmzəyev bildirdi ki, həmin ərəfədə Prezident İlham Əliyevin Qoşulmama Hərəkatının sədri olaraq verdiyi təkliflər və dünya ictimaiyyətini həmrəyliyə, pandemiyaya qarşı birgə mübarizəyə səsləməsi BMT-yə üzv olan 150-dən çox dövlət tərəfindən müsbət qarşılandı: “Məhz həmrəyliyə çağırış nəticə etibarilə pandemiyaya qarşı mübarizədə çox mühüm rol oynadı. Həmçinin Prezident İlham Əliyevin rəhbərliyi ilə COVID-19-la mübarizə Azərbaycanda yüksək səviyyədə təşkil olundu. Azərbaycanın COVID-19-la mübarizədə göstərdiyi səylər Ümumdünya Səhiyyə Təşkilatı tərəfindən müsbət dəyərləndirildi. Təkcə ölkəmizdə vətəndaşlarımızın COVID-19-la mübarizəsinin təşkili ilə deyil, həmçinin 30-dan çox dövlətə Azərbaycan tərəfindən hümanitar yardımlar edildi. 2021-ci ilin yanvar ayından başlayaraq Azərbaycanda Cənubi Qafqazda ilk dəfə olaraq peyvəndləmə kampaniyasına start verildi. Azərbaycan məhz vaksinasiyanın təşkilində əhalinin peyvəndlənmə faizinin yüksəkliyinə görə də qabaqcıl yerlərdən birini tutmaqdadır.”
N.Həmzəyev vurğuladı ki, məhz 2021-ci ildə Azərbaycan tərəfindən bir çox dövlətlərə vaksinlərin humanitar yardımlar olaraq çatdırılması həyata keçirilib: “2021-ci ilin sentyabr ayında BMT-nin Baş Assambleyasının 76-cı sessiyasında Prezident İlham Əliyevin Qoşulmama Hərəkatının sədri qismində videokonfrans formatında çıxışı və orada COVID-19 əleyhinə peyvəndlərlə bərabər, məqbul qiymətə, vaxtında və universal əlçatanlığının təmin edilməsi ilə bağlı qətnamə layihəsinin müzakirəyə çıxarılması da çox yerində verilmiş bir təklif idi. Dövlət başçısı İlham Əliyev öz çıxışında vaksinasiyanın təşkili ilə əlaqədar dünya ölkələrinin bu məsələdə ədalətli olmasının, digər inkişaf etməyən dövlətlərdə də vaksinasiyanın bütün əhaliyə çatdırılması üçün səylərin artırılmasının və beynəlxalq ictimaiyyətin bu məsələdə həmrəylik göstərməsinin vacibliyini vurğuladı. Çox sevindirici haldır ki, Prezident İlham Əliyevin təklif etdiyi bu qətnamə qəbul edildi. Bu qərarı BMT-nin əksər üzvləri qəbul etdi və əleyhinə heç bir ölkə səs vermədi.”
Deputat qeyd etdi ki, bu, onu deməyə əsas verir ki, beynəlxalq ictimaiyyət Prezident İlham Əliyevin COVID-19 pandemiyasına, “peyvənd millətçiliyi”nə qarşı qlobal mübarizəsini və təşəbbüslərini dəstəkləyir: “Dövlət başçısı İlham Əliyevin səsləndirdiyi bu fikirlərin, təklifin dünya ictimaiyyəti tərəfindən rəğbətlə qarşılanması bizi çox sevindirir. Azərbaycan Prezidenti qlobal səviyyədə liderlik qabiliyyətini ortaya qoyur, dünya ictimaiyyətini məhz pandemiya ilə birgə mübarizəyə səsləyir. Bu çağırış dünya ictimaiyyəti tərəfindən müsbət dəyərləndirilib. İnanıram ki, dünya dövlətləri bu təşəbbüsə qoşulmaqla, birgə mübarizə aparmaqla 2022-ci ildə COVID-19 pandemiyasına qalib gəlməyə nail olacaq. Azərbaycanın bu prosesdə göstərdiyi xidmətlər və səylər dünya ictimaiyyəti tərəfindən hər zaman müsbət dəyərləndiriləcəkdir.”