”Bildiyimiz kimi 2009-cu ildə Naxçıvan şəhərində Türk Şurası və türkdilli dövlətlərin birgə koordinasiya mərkəzi yaradıldı. Bu vaxta qədər bu ideya var idi. Ancaq faktiki olaraq Naxçıvan bəyannaməsi ilə və Naxçıvanda imzalanan sənədlər ilə bu təşkilat fəaliyyətə başladı”. Bu sözləri SİA-ya açıqlamasında deputat Naqif Həmzəyev deyib.
Onun sözlərinə görə, bu fəaliyyətin əsasını həm Türk Şurasının katibliyi, həm də Türk Akademiyası təşkil etdi və nəticə etibarilə ötən müddət ərzində Türk Şurası koordinasiya mərkəzindən artıq təşkilat halına çevrildi: “İki il Azərbaycanın sədrlik etdiyi bir müddətdə ilk növbədə koronavirus ilə mübarizə, pandemiyaya qarşı birgə mübarizə ilə əlaqədar Azərbaycanın səyləri və Türk Şurasına rəhbərliyi dönəmində bir çox təşkilati məsələlərin öz həllini tapması və bugün məhz bu şuranın təşkilata çevrilməsi üçün ən vacib, zəruri işlərin məhz bu iki ilə təsadüf etməsi çox mühüm əhəmiyyət kəsb edir. Həmçinin 2020-ci ildə Azərbaycanın 30 ilə yaxın həll olunmayan, işğal olunmuş ərazilərinin erməni terroristlərindən təmizlənməsi və Azərbaycanın zəfər çalması nəticə etibarilə türk dünyasının qələbəsi, uğuru kimi dəyərləndirildi və bu münaqişənin həlli zamanı Azərbaycanın mövqeyini Türk Şurasına üzv olan qeyd-şərtsiz dəstəklədilər”.
Deputat sözlərinə davam edərək həmçinin qeyd edib ki, Azərbaycanın mövqeyini bütün beynəlxalq platformalarda dəstəkləyən bəlkə də yeganə təşkilatlardan, yeganə beynəlxalq qurumlardan biri idi: “Bu da sevindirici haldır ki, Azərbaycan estafeti ötən gün Türkiyəyə verdi və Türkiyə Cümhuriyyətinin Prezidenti cənab Rəcəb Tayyib Ərdoğan tərəfindən Azərbaycan Respublikasının Prezidenti cənab İlham Əliyev Türk Şurasının ən Ali Ordeni ilə mükafatlandırıldı. Bu cənab Prezidentin iki illik sədrliyi dönəmindəki uğurlu fəaliyyəti və həmçinin Azərbaycanın 44 günlük Vətən müharibəsində qələbə çalması və bu qələbəyə aparan yolda cənab Prezident İlham Əliyevi liderliyi, türk dünyasına işıq saçması, türk dünyasına gələcəyi, hədəfləri göstərə bilməsi və təbii ki, Azərbaycanın türkdilli dövlətlərin bir araya gəlməsində açar rolunu oynaması ilə əlaqədardır. Azərbaycanın bu zəfəri türk dünyasının zəfəri kimi qiymətləndirilir və cənab Prezident İlham Əliyev də mükafatı alarkən bunun Azərbaycan xalqına verildiyini qeyd etdi. Bildiyimiz kimi Türk Şurası Türk Dövlətləri Təşkilatına çevrildi. Bu bir təşkilat olaraq daha çevik, daha funksional fəaliyyət göstərəcək. Ən əsası mədəni, siyasi əlaqələrin gücləndirilməsi ilə yanaşı iqtisadi əlaqələrin də inkişafına çox böyük töhfələr verəcək. Azərbaycan iki illik sədrlik dönəmində çox uğurlu fəaliyyət göstərdi. Pandemiya və müharibə şəraitinin olmasına baxmayaraq Azərbaycana cənab Prezident İlham Əliyev öz liderlik qabiliyyətini və türk dünyasına sədaqətini nümayiş etdirdi.
Münaqişələrin həlli ilə bağlı yeni yanaşmanın, yeni həll yolunu ortaya qoydu. Bütün bunlarla yanaşı regionda yaranmış yeni geo-strateji reallıqlar fonunda Türk Şurasının təşkilata çevrilməsi gələcəkdə türkdilli dövlətlərin və bu təşkilata üzv olan digər dövlətlərin daha çevik, daha faydalı işlər görəcəyinə xidmət etmiş olacaq”.