Xəbər verdiyimiz kimi, bu gün ermənilərin Şuşa şəhəri yaxınlığında törətdiyi təxribat nəticəsində üç hərbçimiz yaralanıb.
Son günlər ard-arda törədilən təxribatlar bölgədəki vəziyyəti gərginləşdirir. Daha təhlükəli və genişmiqyaslı digər təxribatların baş verəcəyi təqdirdə isə Azərbaycanın Qarabağda yeni antiterror əməliyyatına başlayacağı haqda fikirlər səslənir.
Mövzu ilə bağlı Sfera.az-a danışan deputat Naqif Həmzəyev bu təxribatdan sonra Rusiya sülhməramlılarının ciddi tədbirlər görməli olduğunu bildirib:
"44 günlük müharibdə Azərbaycanın zəfər qazanması regionla bağlı yeni reallıqlar yaradıb. Ermənistanda bu reallıqlarla barışmaq istəməyən, revanşist ideyalarla yaşayan qüvvələr isə regionda davamlı sülhün yaranmasına təhdid olaraq qalmaqdadır. Onlar Azərbaycanla yeni müharibəyə hazırlaşmaq, itirilmiş hesab etdikləri torpaqları yenidən geri almaq istəyirlər. Təəssüflər olsun ki, məlum hadisə də bu məqsədə xidmət edir. Lakin istənilən halda regionda xidmət aparan Rusiya sülhməramlıları baş verənlərdən nəticə çıxarmalı və ermənilərin Azərbaycan ərazisindəki qeyri-qanuni birləşmələrini zərərsizləşdirmək yönündə hərəkətə keçməlidir”.
Deputat əks halda Azərbaycanın antiterror əməliyyatlarına başlamaq hüququnu özündə saxladığını xatırladıb:
"Baş verənlərlə bağlı tədbirlər görülməsə, Azərbaycanın antiterror əməliyyatı keçirməyə tam haqqı çatır. Ancaq prosesin bu məcrada inkişaf edəcəyini düşünmürəm. Çünki üçtərəfli bəyanatdan irəli gələn müddəaların həyata keçirilməsi, komissiyanın fəaliyyətinin nəticələri qısa müddətdə hər kəsə məlum olacaq. Belə bir ehtimal var ki, Ermənistan Azərbaycanın ərazi bütövlüyünü tanısın və sülh danışıqlarına başlanılısın”.
Deputat düşünür ki, elə bu cür təxribatların əsl məqsədi də danışıqlar proseslərini pozmağa hesablanıb:
"İstənilən halda Azərbaycan öz mövqeyində qətidir. Bu gündən sonra bizim üçün regionda sülh və sabitlik lazımdır. Regionda kommunikasiyaların açılması, iqtisadiyyatın inkişafı, insanların sosial rifahının yaxşılaşdırılması prioritetdir. Ermənistan tərəfi də bunu anlayır. Əgər onlar Azərbaycanın sülh təklifini qəbul etməsələr, özlərinin acı aqibətlərini sürətləndirmiş olacaqlar”.