“İkinci Vətən müharibəsində Azərbaycan Zəfər çaldıqdan sonra cənab Prezident İlham Əliyev və Birinci vitse-prezident Mehriban xanım Əliyeva birlikdə işğaldan azad olunmuş ərazilərə dəfələrlə səfər etdilər. Elə ilk çıxışlarından etibarən cənab Prezident Qarabağ və Şərqi Zəngəzur torpaqlarını cənnət məkana çevriləcəyini və ən qısa zamanda bu ərazilərdə həyatın bərpa olunacağı fikirlərini səsləndirirdi”. Bu sözləri SİA-ya açıqlamasında deputat Naqif Həmzəyev deyib.
Onun sözlərinə görə, zəfərdən bir il keçməsinə baxmayaraq işğaldan azad olunmuş torpaqlarda abadlıq-quruculuq işləri sürətlə davam edir, yol-infrastruktur layihələri həyata keçirilir: “Artıq həmin layihələrin bir hissəsi reallaşıb. Həmçinin bütün işğaldan azad olunmuş ərazilərin elektrik enerjisi ilə təmin olunması üçün lazımi işlər görülüb və bəzi işlər də davam etdirilir. Dəmir yolu xətləri bərpa olunur. Bütün bunlarla yanaşı Qarabağda 3 beynəlxalq aeroportun tikiləcəyi mesajları da verilirdi”.
Deputat fikirlərinə davam edərək həmçinin qeyd edib ki, çox sevindirici haldır ki, zəfərin bir illiyi ərəfəsində Füzulidə beynəlxalq hava limanının rəsmi açılış mərasimi keçirildi: “Qardaş Türkiyənin prezidenti cənab Rəcəb Tayyib Ərdoğan işğaldan azad olunmuş ərazilərə ikinci səfərini edərək faktiki olaraq Füzuli hava limanına ilk rəsmi səfər etmiş xarici dövlət başçısı oldu. Füzuli beynəlxalq hava limanının açılış mərasimində Qarabağın simvolik açarları məhz iki qardaş dövlətin prezidentlərinə təqdim olundu. Bilindiyi kimi 2021-ci ilin yay aylarında Şuşa şəhərində hər iki prezident birlikdə Şuşa bəyannaməsini imzalamışdılar. Məhz Şuşa bəyannaməsi faktiki olaraq regionda yeni reallıqların, yeni gerçəkliklərin rəsmi sənədlərin üzərində əks olunması demək idi.
Füzuli beynəlxalq hava limanının açılış mərasimində iştirak isə onu deməyə imkan verir ki, bir il keçməsinə baxmayaraq nəinki infrastruktur layihələri hətta beynəlxalq aeroportun belə fəaliyyətə başlanmasına nail ola bildik. Bu isə burada baş verə biləcək yeni prosesləri daha da sürətləndirəcək. Quruculuq, abadlıq işlərinə yeni bir güc qatacaqdır. Gələcəkdə bu regionda həm kəmd təsərrüfatının, həm turizmin, həmçinin də beynəlxalq layihələrin daha sürətlə inkişaf etməsi üçün çox böyük təkan olacaqdır. Bildiyimiz kimi bu ərazidən Zəngəzur dəhlizi keçəcək və Zəngəzur dəhlizi dəmir yolu, avtomobil və hava yolunu da özündə birləşdirir. Bu da regionun açar nöqtəsi funksiyasını yerinə yetirməyə imkan verəcək. Tezliklə bu ərazidə Azərbaycan və Türkiyə dövlətinin birgə həyata keçirdiyi beynəlxalq və yerli layihələr reallaşacaq”.