Bu gün Azərbaycanın 2-ci böyük şəhəri olan Gəncənin Ermənistan işğalçıları tərəfindən raket atəşinə tutulmasından 1 il ötür.
2020-ci oktyabrın 17-də gecə saat 01:00 radələrində atılan ballistik raketlər əhalinin sıx yaşadığı əraziyə düşüb. Nəticədə yaşayış evləri və digər infrastrukturlar ziyan görüb.
Bununla da humanitar atəşkəsi kobud şəkildə pozan ermənilər dinc insanları qəsdən öldürüb və bununla da, müharibə cinayəti törədiblər. Ermənistan rəhbərliyi insanlıq əleyhinə törətdiyi bu cinayətə görə məsuliyyət daşıyır.
Qeyd edək ki, 44 günlük Vətən müharibəsi zamanı Gəncə şəhəri Ermənistan tərəfindən 5 dəfə raket atəşinə məruz qalıb.
“17 oktyabr 2020-ci il tarixində ermənilər tərəfindən Gəncə şəhərinə növbəti uzaqmənzilli raket atıldı. Atılmış bu raketlər nəticəsində 15 nəfər mülki şəxs şəhid oldu və 55-dən çox sakin yaralandı. Şəhər infrastrukturuna, evlərə, iş mərkəzlərinə çox böyük ziyanlar dəydi. Bildiyimiz kimi, ermənilər 44 günlük Vətən müharibəsinin gedişində 5 dəfə Gəncə şəhərinə uzaqmənzilli istifadəsi qadağan olunmuş raketlərdən hücum etdi”.
Bu sözləri Gəncə şəhərindən seçilən millət vəkili Naqif Həmzəyev herbiand.az-a açıqlamasında bildirib:
Naqif Həmzəyev söyləyib ki, ermənilər faktiki olaraq döyüş bölgəsindən uzaq məsafədə yerləşən Gəncəni, Bərdəni, Tərtəri, Mingəçeviri, Goranboyu, Naftalanı, digər rayon və şəhərlərimizi, buradakı mülki şəxsləri hədəfə aldılar:
“Nəticə etibarilə düşmənin istəyi insanlar arasında xaos yaratmaq, gəncəliləri qorxutmaq və bu yolla müharibəni dayandırmaq, ləngitməkə, Azərbaycanın qələbəsinə kölgə salmaq və qələbənin qarşısını almaq idi. Ancaq şükürlər olsun ki, bizim mərd xalqımız, gəncəlilər qətiyyən qorxmadılar, çəkinmədilər. Onlar Ali Baş Komandan cənab Prezident İlham Əliyevə ünvanladığı bütün mesajlarda sonuna qədər döyüşməyimizi və ordumuzun qələbə çalmağını, torpaqlarımızın işğaldan azad olmasını istəyirdi və belədə oldu. Gəncəyə, digər rayon və şəhərlərimizə hədəflənmiş uzaqmənzilli raketlər nəticəsində dinc sakinlərimiz şəhid olduqdan sonra ordumuz döyüş meydanında erməni faşistlərinə və terroristlərə qan uddurdu və şəhidlərimizin, yaralılarımızın qisasını aldılar. Şükürlər olsun biz bu döyüşlərdə və şəhərlərimizə atılmış raketlər və bombalar nəticəsində həyatlarını itirən şəhidlərimizə baxmayaraq torpaqlarımızı işğaldan azad edə bildik”.
Millət vəkili qeyd edib ki, düşməndən fərqli olaraq cənab Prezident, Ali Baş Komandan ədalətli və ləyaqətli müharibə aparıb:
“Biz nəticəni əldə etdik və bu günlər torpaqlarımız işğal altından azad olunub. Bütün sərhəd boyu Silahlı Qüvvələrimiz yerləşir və daha da möhkəmlənirlər. Müharibənin artıq 1 ili ərəfəsindəyik. Gəncə terrorunun 1 ilidir. Bizim yaralılarımızın, şəhidlərimizin, evləri dağılmış insanların maddi sıxıntıları və onlara dəymiş ziyanlar dövlət tərəfindən aradan qaldırılıb. Onlar yeni mənzillərlə təmin edilib və yaxud evləri təmir edilib. Ancaq bunlar hamısı maddi dəstəkdir. Hec cür onların mənəvi sarsıntılarını və mənəvi əzablarını aradan qaldırmaq mümkün deyi. Bu çox ağır bir prosesdir. Bu baxımdan da biz bu tarixi hər an xatırlamalı, bizim başımıza gətirilən bu hərbi cinayyəti və soyqırımı anlamalıyıq. Gələcək nəsillərə doğru düzgün formada ötürməliyik və çalışmalıyıq ki, dünya ictimaiyyəti ermənilərin əsl simalarını, iç üzlərini bilsinlər, tanısınlar. Bir daha ermənilərin belə bir cinayətə risk edib əl atmamaları üçün daim onlara təzyiq və təsirlər olsun. Ancaq bu yolla biz düşmənin haqq yoluna gəlməsinə məcbur edə bilərik. Allah şəhidlərimizə rəhmət eləsin, qazilərimizə Allahdan şəfa diləyirəm”.