"Prezident İlham Əliyevin oktyabrın 16-da imzaladığı "Əhalinin sosial rifahının qorunması sahəsində əlavə tədbirlər haqqında" Sərəncamı hər kəs tərəfindən müsbət qarşılanıb. Prezident ölkə rəhbərliyinə başladığı ilk gündən etibarən dövlətin əsas siyasətinin sosial siyasət olduğunu vurğulayıb və hər zaman sözünü tutub".
Bunu Reyting.az-a Milli Məclisin deputatı Naqif Həmzəyev Azərbaycan prezidenti İlham Əliyevin bu gün imzaladığı "Əhalinin sosial rifahının qorunması sahəsində əlavə tədbirlər haqqında" Sərəncamı barədə danışarkən deyib.
Deputat bildirib ki, dəfələrlə aztəminatlı ailələrin və sosial qayğıya ehtiyacı olan əhali qrupunun sosial rifahının yaxşılaşdırılması üçün dövlət tərəfindən sosial paketlər həyata keçirilib:
"Həmin kateqoriyadan olan vətəndaşlara dövlət dəstəyi və qayğısı heç zaman azalmayıb. "Əhalinin sosial rifahının qorunması sahəsində əlavə tədbirlər haqqında" Sərəncam birbaşa olaraq əmək pensiyalarının və əməkhaqlarının, sosial müavinətlər və təqaüdlərin artmasını təmin edəcək. Hökumət 2022-ci ilin dövlət büdcəsi layihəsində həmin artımların nəzərə alınması üçün xüsusi təkliflə çıxış edəcək. 2020-ci ildə yeni növ koronavirus (COVID-19) pandemiyası zamanı bütün dünya iqtisadiyyatında olduğu kimi, Azərbaycan iqtisadiyyatında da müəyyən ziyan müşahidə edildi və nəticədə, vətəndaşların sosial həyatında müəyyən çətinliklər yarandı. İş yerləri bağlandığı üçün xüsusən həssas qruplardan olan vətəndaşların üzləşdiyi çətinliklər artdı. Buna baxmayaraq, Azərbaycan dövləti məhz pandemiyanın vətəndaşlara, iş adamlarına vurduğu ziyanları aradan qaldırmaq üçün xüsusi sosial paket və tədbirlər həyata keçirtdi. Vətəndaşlara, aztəminatlı ailələrə birdəfəlik maddi yardımlar göstərildi, bank kreditlərində müvafiq güzəştlər tətbiq edildi, eyni zamanda sosial dəstəyə ehtiyacı olan ailələrin övladlarının təhsil haqqı dövlət tərəfindən ödənildi. Məhz pandemiya ilə əlaqədar yaranmış çətinliklərdən biri də ərzaqların, daha çox ehtiyac duyulan məhsulların qiymətlərində müəyyən artımlar idi. 2022-ci ildə bu kateqoriyadan olan vətəndaşların sosial ödənişlərində ediləcək dəyişiklik onların alacağı müavinət və təqaüdlərin artması deməkdir. Nəticə etibarilə, həssas əhali qrupuna aid olan vətəndaşların sosial rifahı daha da yaxşılaşacaq".